Mơ̆ng anun, amăng thun anai mơtăm, tơring amra prăp rơmet, ngă hơđong anih dŏ brơi kơ 1.133 boh sang anŏ ƀơi hơdôm anih hŭi rơhyưt amuñ ia dăo, đĭ tui 153 boh sang pơhmu hăng mrô blung a. Bruă pơplih anai kiăng tañ ba pơđuăi mơnuih ƀôn sang mơ̆ng anih lŏn tơhlŏm, ia dăo, nao dŏ pơ anih rơnuk rơnua hloh.

Hơdôm boh tơring glăk ngă bruă ječ ameč, amăng anun hơmâo: pơdong plơi phrâo ƀơi plơi Trà Cong, să An Hòa; pơdong plơi phrâo pơƀut ha anih plơi Sông Ba, să Ia Rsai hăng pơdong plơi ječ ameč anih tơhlŏm čư̆ Gành, plơi Xuân An, să Đề Gi. Mơ̆ng anai truh pơ thun 2030, tơring čar prăp rơmet, ngă hơđong anih dŏ, ba pơđuăi mơ̆ng kual ia dăo lŏn tơhlŏm lĕ 1858 boh sang anŏ ƀơi 13 bit anih pơdong plơi pơƀut ha anih hăng 3 kơčăo bruă pơdong pơmut plah amăng plơi pla. Prăk či ngă bruă lĕ rơbêh kơ 1.087 klai, amăng anun rơbêh 207 klai prăk djru tơl tơngan kơ mơnuh ƀôn sang kơ sang dŏ, bruă nao rai, ngă hmua pla pơjing, braih huă hăng ia mơñum./.