Khul khua pơ ala mơnuih ƀôn sang tơring čar Dak Lak hơmâo ngă hră pơtrun mrô 19 pơkă kơ jơlan hơdră djru ba pơhrua nao dơ̆ng hăng čơđai sang hră laih anun sang hră đôm lăm ƀơi hơdôm să giăm guai dêh čar hăng să ƀơi guai dêh čar mơtam. Tui hăng hră pơtrun, čơđai sang hră dŏ glăi huă ƀong tơhrơi ƀơi sang hră dưi djru 110.000 prăk sa čô sa blan, prăk huă ƀong yang hrơi dong, čơđai sang hră đôm lăm, kơnuk kơna čem rông ba lĕ 300.000 prăk sa čô sa blan.

Čơđai sang hră nao sang hră ataih mơ̆ng sang anŏ dưi djru brơi prăk đĭ rơdêh nao rai pơ sang hră. Hăng čơđai sang hră gưl sa, rơnoh djru lĕ 120.000 prăk rim blan tơdah sang ataih mơ̆ng sang hră truh 4 km pơngŏ truh gah yŭ 15 km, rơnoh prăk djru 240.000 prăk rim blan, tơdah sang ataih hlong kơ 15 km. Čơđai sang hră hramw gưl dua dưi djru hăng rơnoh prăk anŏ ataih mơ̆ng 7km truh gah yŭ kơ 15 km hăng mơ̆ng 15 km pơngŏ . Thun blan djru ba ƀu rơgao 9 blan ôh sa thun hrăm hră.

Thun hrăm anai, čơđai sang hră, čơđai gưl prong amăng tơring čar Dak Lak dưi djru ba mơ̆ng rơnoh prăk ngăn drăp kơnuk kơna 55% pơkă hăng rơnoh prăk djru hră pơhlom nua ia jrao, dưm dưm hăng 751.410 prăk rim čô sa thun. Dak Lak ăt amra mă yua prăk 41 klai, blơi hơdrôm hră hrăm brơi kơ djop sang hră pơpha kơ čơđai sang hră mă yua jăng jai sa thun hrăm.

Hrŏm hăng tơlơi djru ƀơi anăp mơta, Dak Lak ăt tuh pơ alin man pơdong, ming pơkra sang hră, gơnam yua pơtô hrăm, boh nik ñu ƀơi hơdôm anih ataih, tơnap tap. Thun hrăm 2026-2027, Dak Lak hơmâo dơ̆ng 3 boh sang hră đôm lăm dua gưl ƀơi hơdôm să guai dêh čar hăng 1 boh sang hră ƀơi să giăm guai kah hăng să Ea Rok hơmâo ngă giong laih. Hơdôm ring bruă dưi hơmâo tuh pơ alin sa hnơ̆ng, kiăng ngă gêh găl brơi čơđai sang hră hrăm gêh găl amuñ amĕ hloh. Lu ring bruă tuh pơ alin djop mơta gơnam yua pơtô hrăm, djru brơi 3.100 čô čơđai sang hră ƀơi guai dêh čar hăng giăm guai hơmâo sang hră hrăm hiam klă hơđong hloh.

Yă Lê Thị Thanh Xuân, Khua Gơnong bruă Pơtô hăng Pơjuăt tơring čar Dak Lak brơi thâo, anom bruă pơtô hrăm ăt hlăk pơtum lu tơlơi gêh găl, ĕp prăk kăk pioh yua sui thun hăng ƀiă thun ƀrô mơ̆ng Jơlan hơdră dêh čar djru amăng bruă pơtô hrăm pioh tuh pơ alin, ngă pơgiong sang hră, anih pơtô hrăm amăng tơring čar.

“Ƀơi anăp lĕ, rơkâo djop să khom kah pơpha rơnoh prăk či mă yua re se gah bruă pơtô hrăm. Kơnang kơ rơnoh prăk anun, anom bruă pơtô hrăm git gai djop sang hră, mă yua rơnoh prăk tuh pơ alin, ming pơkra glăi sang hră, anih hrăm, blơi prăp gơnam yua pơtô hrăm. Mơ̆ng anun, kiăng ngă djop anŏ gêh găl pơtô hăng hrăm thun hrăm phrâo, pơđĭ tui boh tŭ yua hiam hăng ngă djơ̆ bruă jao amăng rơnuk phrâo ră anai”.