Ƀơi să Ea Bung, yă Nguyễn Thị Định - bơnai tơhan ruă Nguyễn Huy Nuôi- ol kơdol lơ̆m hơmâo Khua jơnum min mơnuih ƀôn sang tơring čar Dak Lăk hrŏm hăng khul grup nao čuă, brơi gơnam. Yă Định ră ruai, hlâo adih yua tơnap, rơkơi ñu dŏ pơ anih čem rông ƀing ngă hơkrŭ đưm. 15 thun hăng anai, sang anŏ ba ñu glăi čem rông, wai lăng pơ sang laih, hơmâo tơlơi lăng ba mơ̆ng djŏp gưl gong gai.

“Mơ̆ng tơring čar, să, plơi pla rim thun truh hrơi ngă lơphet, hrơi ƀong Tê̆t, khul grup lêng kơ lăng ba, brơi gơnam, gơmơi hơmâo pran biă. Yua hơmâo Ping gah, Kơnuk kơna giong anun hơdôm khul grup kơnuk kơna, hăng sang anŏ tơnap tui hăng kâo anai hơmâo pran biă mă, plai ƀiă mơn tơnap”.

Ƀơi să Ea Knốp, ơi Nguyễn Ái Quế - tơhan rơka hăng tơlơi ruă 3/4, hơmâo djru 110 klăk man sang dŏ phrâo prong 50m2. Hlâo adih ñu blah pơ Quân khu 5, ruă kơtang biă mă ƀơi Quảng Nam thun 1973. Thun 1985, ñu jak ană bơnai ñu mut nao dŏ pơ Dak Lăk, lơ̆m anun glăk kơƀah kơtang biă:“Hlâo adih pơkra sang hăng kyâo hai tơnap mơn, ră anai Kơnuk kơna thâo pap tui anai jing mơak biă mă yơh. Bơni kơ khua mua djŏp gưl hơmâo lăng ba. Neh met wa rai ngui jing hơmâo anih dŏ hiam laih”.

Ƀơi să Quảng Phú, ơi Ngô Văn Tường glăk hrŏm hăng ƀing ngă sang glăk pơkra sang dŏ phrâo nua ñu 150 klăk, amăng anun Kơnuk kơna djru 110 klăk. Bơnai ñu - yă Võ Thị Nghĩa - jing mơnuih ngă hơkrŭ, hlâo adih ayăt mă krư̆ pơ sang mơnă Buôn Ma Thuột thun 1973 yua ñu djru ba nao braih, mơnŏng ƀong huă, mơ-it hră, lăi pơthâo tơlơi pơhing kơ ƀing tơhan ƀô̆ đô̆i:“Hơmâo sang dŏ anai jing rơkơi bơnai gơmơi hơđong pran jua či hyu mă bruă, ĕp prăk kăk, kiăng tơlơi hơdip dua rơkơi bơnai dơnap ƀiă”.

Tui hăng Tơlơi pơtrun 131 thun 2021 hăng Tơlơi pơsit 21 thun 2024 mơ̆ng Kơnuk kơna, tơring čar Dak Lăk hơmâo ngă giong djru ba 593 boh sang anŏ ngă hơkrŭ đưm, pơkra glăi hăng man phrâo sang dŏ (142 boh sang hơmâo man phrâo hăng 451 boh sang hơmâo pơkra glăi). Ƀrô tal anai, Dak Lăk hơmâo pơphun bruă tŭ ñang, tŭi apui hlin pơpŭ, hơdor tơngia ƀơi pơsat tơhan djai pơsăn drơi tơring čar, gưl să; brơi gơnam; ba mơnuih ngă hơkrŭ hyu ngui, pơbưp pơ Hà Nội.

Ơi Lê Đức Tịnh - Kơ-iăng gơnong bruă tơhan pôlih tơring čar Dak Lăk brơi thâo, tơring čar ăt pơphun bruă hơdor tơngia djŏp anih či wai lăng klă hloh hăng ƀing tơhan rơka, sang anŏ tơhan djai pơsăn drơi hăng ƀing ngă hơkrŭ:“Gơnong bruă čar pơphô brơi tơring čar pơtrut ngă bruă “Abih bang mơnuih lăng ba sang anŏ tơhan rơka, tơhan djai pơsăn drơi hăng mơnuih ngă hơkrŭ đưm”, pơhlôm ngă sit nik, abih bang hăng tŭ yua; iâu pơthưr tơlơi gum ngă mơ̆ng abih bang gong gai, anom bruă hăng abih bang mơnuih mơnam amăng bruă akŏ pơjing hăng pơlar tui Keh prăk Hơdor tơngia. Lăng ba na nao, thâo tơlơi pơmin, tơlơi čang rơmang mơ̆ng mơnuih ngă hơkrŭ, rơkâo hăng ping gah, gong gai tañ pơsir brơi hơdôm bruă bơdjơ̆ nao, pơhlôm tơlơi dưi kơ mơnuih ngă hơkrŭ”.

Hlâo kơ anun, Grup khua pơ ala mơnuih ƀôn sang tơring čar Gia Lai hơmâo pơphun Jơlan hơdră glăi čuă rơngôl đưm, anih gru grua dêh čar ƀơi să Đồng Xuân - anih akŏ pơdong Ping gah blung a mơ̆ng tơring čar Phú Yên hơđăp hăng Anih ngă hơkrŭ H9, ƀuôn Dăk Tuôr, să Čư̆ Pui tơring čar Dak Lăk. Pơ anai, ƀing khua, mơnuih ƀôn sang hơmâo hmư̆ tơlơi ră ruai ol kơdol, pơhưč pran yua mơ̆ng ƀing dŏ hơdip, ƀing ƀuh tơlơi blah wang đưm, hodor glăi abih bang, ƀu thâo wơr ôh kơ thun blan blah wang glêh tơnap ƀơi Anih ngă hơkrŭ H9 - kual lŏn hing ang, anih kơđŏm gru pran jua khin hơtai, khăng khăp, ƀu lua gŭ kơ ƀing ayăt mơ̆ng tơhan hăng mơnuih ƀôn sang ta. Yă Nguyễn Thị Thu Nguyệt - Kơ-iăng khua grup, gơgrong ba jơlan grup khua mua pơ ala mơnuih ƀôn sang dêh čar tơring čar Dak Lăk brơi thâo:“Amăng hrơi glăi čuă rơngôl, anih gru đưm anai djru kơ ƀing khua pơ ala, rim čô mơnuih mă bruă kơnuk kơna, mơnuih mă bruă gah rơngiao hăng mơnuih ƀôn sang hơdor glăi gru đưm hăng thâo hluh dlăm kơ tơlơi gum pơgôp, pơyơr pran jua mơ̆ng ơi yă ta đưm pơ anih gru đưm hmư̆ hing ngă hơkrŭ. Mơ̆ng anun, rim čô mơnuih jai thâo hluh kơ tơlơi djai drơi yua kơ lŏn ia mơ̆ng ơi yă, bơbă tui pran jua khăp kơ lŏn ia. Anai ăt jing bruă pơtrut abih bang ƀing khua, mơnuih mă bruă kơnuk kơna hăng mơnuih ƀôn sang gir gum pơgôp akŏ pơjing tơring čar jai hrơi đĭ kyar”.

Grup khua pơ ala mơnuih ƀôn sang dêh čar tơring čar Dak Lăk hrŏm hăng ƀing djru khăp pap hơmâo brơi 30 boh rơdêh tang wang, sum ao phrâo kơ ƀing čơđai sang anŏ tơnap, 236 anung gơnam kơ sang anŏ kơnuk kơna juăt djru, mơnuih djuai ƀiă, mơnuih ană plơi kơnang, hăng jao glăi tơdron đă boh lông, sang hơdor tơngia kơ ană plơi. Bruă lăng ba tơlơi hơdip mơnuih ngă hơkrŭ či Dak Lăk ƀu kơnong bruă khŏm ngă đôč ôh, ăt pơdah rai pran jua “Mơñum ia hơdor kơ pô klơi”, djru ngă kjăp tui khul gum pơgôp abih bang mơnuih./.