Sang anŏ ơi Điểu Thắng, djuai ania M’nông, dŏ amăng plơi Tân Bình, să Dak Ngo, tơring glông Tuy Đức, tơring čar Dak Nông hơmâo 5 čô mơnuih samơ̆ ră anai dŏ kơnong sa čô ñu yơh jing mơnuih mă bruă phun. Bơnai ñu ruă, anăn tơčoa rơdêh jrŏm, ră anai ƀu anăm mă bruă ôh. Ơi Điểu Thắng dŏ 2 čô ană đah kơmơi glăk 15 hăng 16 thun, hrăm anih 9 sang hră gưl dua hăng gưl tlâo Lê Hữu Trác, să Dak Ngo.

Akŏ thun hrăm phrâo, nai wai lăng anih hrăm hơmâo nao tơl sang anŏ kiăng pơanur ƀing čơđai nao sang hră hăng lăi pơthâo kơ tơlơi djru brơi tong ten mơng Kơnuk kơna. Ơi Điểu Thắng brơi thâo, hơdôm thun rơgao yua hơmâo hơdră djru mơng Ping gah, kơnuk kơna brơi ƀing čơđai sang anŏ tơnap tap, dua čô ană đah kơmơi lêng kơ dưi nao hrăm hră, hŭi pơmĭn lui sang hră dong tah.

“Sang anŏ tơnap tap biă mă, laih dong ataih mơng sang hră, ăt yua hơmâo tơlơi đing nao mơng Ping gah, kơnuk kơna, sang hră, gơñu djru brơi ƀing čơđai hơmâo prăk ƀong, prăk duh anih dŏ, prăk nao rai. Ƀing gơmơi ăt gir run pơanur ană bă gir kơtir hrăm hră kiăng thâo boh hră, thâo jŭ yap kiăng tơlơi hơdip plai ƀiă tơnap tap”.