Tlam lơ 30/7, ƀơi phường Plei Ku, tơring čar Gia Lai, Ding jum kông an jơnum pơƀut hơdră bruă “Lŏm lui sang tơ̆i, sang phŏ” amăng kual Dap Kơdư thun 2025. Mơ̆ng akŏ thun truh ră anai, tơhan kông an hơmâo pok pơhai man pơdong phrâo, ming pơkra glăi truh 6.370 boh sang djru mơnuih ƀun rin, sang anŏ giăm ƀun rin ƀơi tơring čar Gia Lai, Lâm Đồng hăng Quảng Ngãi.

Hăng rơnoh prăk truh 355 klai prăk, jơlan hơdră anai hơmâo ba glăi kơ hơdôm rơbâo sang anŏ hơmâo anŏ gêh găl, anih dŏ hơđong, hrưn đĭ bơwih ƀong huă yom biă kiăng hơđong tơlơi bơwih ƀong huă hăng pơđĭ kyar mơnuih mơnam amăng kual Dap Kơdư. Ƀơi tơring čar Gia Lai, bruă ngă anai hơmâo lu khul mơnuih, sang bruă mơ̆ng khua mua, truh ling tơhan amăng tơhan kông an tơring čar djru hrŏm hơmâo 5,4 klai prăk pơčruh hăng prăk blan, jak iâu djru dơ̆ng hơmâo 2,78 klai prăk hăng hơdôm rơbâo tơn gơnam man pơdong sang mơ̆ng mơnuih mơnam djru.

Kơnong hơdôm blan đôč giăm 6.400 boh sang ngă giong laih, yua ƀing tơhan kông an djop gưl djru man pơdong brơi kơ mơnuih ƀôn sang ƀơi kual Dap Kơdư, ba tơlơi hok mơak, tơlơi pơblih phrâo ƀuh rơđah ƀơi rim boh sang anŏ.