Tui lăi pơthâo, amăng hrơi blan rơgao, Ding jum kông ang hơmâo pơtrut pơsur ƀing mơnuih čơmah djru brơi tơring čar Kon Tum 84 klai prăk kiăng man pơdong phrâo 1.400 boh sang djru brơi sang anŏ ƀun rin, giăm ƀun rin hăng rĭm boh sang nua ñu 60 klăk prăk. Phrâo rơgao, hrŏm hăng bruă man pơdong brơi 500 boh sang, Ding jum kông ang hơmâo jao 2 boh sang pơƀuh brơi hlâo kiăng kơ pok prong man pơdong tui anun.

 Trung tướng Phạm Thế Tùng, kơ-iăng khua ding jum kông ang pơsit tong pơ anăp anai Ping gah kông ang gơnong glông, Ding jum kông ang amra gum hrŏm kjăp hăng khul apăn bruă hơdôm boh tơring čar kual Dap kơdư tŏ tui pơsur gum djru mơng ƀing čơmah pok pơhai kơtang hloh jơlan hơdră ruh pơkra glăi sang dŏ jang jai, sang tơ̆i phŏ amăng kual Dap kơdư. Amăng mông ngă lơphet pok pơphun, ƀing pơ ala hơdôm anom bruă djru ba lĕ sa, dua anom bơwih ƀong sĭ mơdrô hăng sang bruă prăk sĭ mơdrô, hơmâo jao prăk djru brơi tơring čar Kon Tum pioh ruh pơkra glăi sang dŏ jang jai, sang tơ̆i phŏ.