Tui hăng tơlơi lăi pơthâo, hơdôm thun rơgao, tơring čar Dak Lăk hơmâo lu hơdră djru kiăng hơmâo mơnuih mă bruă amăng tơring čar rơgơi mơbruă, djơ̆ hăng tơlơi kiăng ruah mơnuih rơgơi či pơđĭ kyar bơwih ƀong huă yôm phun. Rơwang thun 2021-2024, tơring čar brơi nao rơbeeh 28.000 klai prăk pioh pơtô pơjuăt mơnuih ngă khua, mơnuih mă bruă, jing hơmâo rơbêh 35% mrô prăk pioh mă yua amăng tơring.

Truh ră anai, rơbêh 64% khua mua, mơnuih mă bruă hơmâo hrăm bruă rơguăt. Ƀơi mông mă bruă, Jơnum min mơnuih ƀôn sang tơring čar Dak Lăk rơkâo đĭ hăng Ding jum bruă čar tañ pơtrun hră pơ-ar pơtô brơi mă yua hơdră djru hăng mơnuih rơgơi mơbruă amăng anom bruă kơnuk kơna; čih pơkra glông djă pioh kơ mơnuih rơgơi Việt Nam. Rơngiao kơ anun, hơdôm ding jum anom bruă bơdjơ̆ nao kiăng hơmâo hơdră djru kiăng anom bơwih ƀong mă bruă gơgrong hloh lơ̆m pơtô pơjuăt mơnuih mă bruă; pơhưč ƀing nai pơtô rơgơi, mơnuih kơhnăk, kĭ sư, kông ñơn apăn bruă kiăng bruă pơtô hrăm klă hloh./.