Amăng giăm truh 1.900 bôh sang anô̆ mơnuih ƀôn sang mơ̆ng tơring čar Kon Tum hmâo tlaih laih amăng tơlơi hơdip amăng sang tơ̆i, sang răm hmâo rơbêh kơ 1.400 bôh sang anô̆ dưi pơdŏng phrâo hăng rơbêh kơ 400 bôh sang dưi pơkra glăi.

Sang anô̆ amai Y Lan ƀơi plơi Kon Jri Xút, să Đăk Bla, plơi prong Kon Tum jing sang anô̆ mơnuih ƀôn sang čơkă sang dô̆ blung a amăng mrô 1.400 bôh sang mơ̆ng Jơlan hơdră lŏm lui sang tơ̆i, sang răm Ding jum kông ang pok pơhai ƀơi tơring čar Kon Tum. Đơ đam tơring čar Kon Tum hmâo 2.752 bôh sang tơ̆i, sang răm kiăng pơdŏng phrâo hăng pơkra glăi sang răm djru sang anô̆ ƀun rin, sang anô̆ hmâo tơlơi hơdip mơda tơnap hơđong anih ƀong huă, anih dô̆. Rơngiao kơ giăm truh 1.900 bôh sang hmâo pơdŏng phrâo, pơkra glăi sang răm giong, tơring čar Kon Tum čih tơbiă kơčăo bruă truh abih blan 6 pơ̆ anăp, amra pơkra giong giăm truh 870 bôh sang dô̆ glăi./.