Anai lĕ Jơnum Khua pơ ala mơnuih ƀôn sang dêh čar tui akô̆ bruă tal 7 mơ̆ng rơwang bruă Khua pơ ala mơnuih ƀôn sang dêh čar tal 15, amăng hơdôm hrơi abih bang glông bruă kơđi čar glăk pok pơhai tañ hơdôm bruă mă tô̆ tui dưm dăp glông mă bruă. Gah bruă anai, Khua git gai pơ ala mơnuih ƀôn sang dêh čar ta ơi Trần Thanh Mẫn brơi thâo, rơwang 1, hơdôm ding jum, gơnong bruă, ƀirô hmâo dưi dăp ngă rơbô̆t glông jơlan mă bruă, rơwang 2 pơphun pơplih pơkra Phaih phiăn, pơplih pơkra sa dua mơta tơlơi phiăn hăng dưm dăp 50% mrô anom bruă čar mơ̆ng tơring čar. Tal jơnum lok 9 pơkă hlâo jơnum amăng giăm truh kơ 2 blan, amăng hơdôm hrơi anai amra mă tơlơi gum pơhiăp mơ̆ng mơnuih ƀôn sang gah pơplih pơkra Phiah phiăn. Biă ñu, mơ̆ng rơnuč blan 4 truh akô̆ blan 5, Jơnum min apăn bruă Khua pơ ala mơnuih ƀôn sang ăt amra jơnum lu mông pioh dưm dăp anom bruă čar gưl să. Khua git gai pơ ala mơnuih ƀôn sang dêh čar ơi Trần Thanh Mẫn lăi rơđah:

“Hơdôm bôh tơhnal klă biă, pơplih phrâo amăng bruă čih pơkra tơlơi phiăn amăng Tal jơnum lok 7, lok 8 hăng tal jơnum ƀu hmâo pơkă hlâo tal 9 phrâo rơgao pơtŏng sit laih tơlơi djơ̆ sit mơ̆ng hơdră pơtrun pơplih phrâo tơlơi pơmin amăng bruă čih pơkra tơlơi phiăn ăt kah hăng bôh tŭ yua sit nik, yôm phăn mơ̆ng hơdôm mông Jơnum tui akô̆ bruă amăng pơhlôm klă hơdôm rơwang bruă tơlơi phiăn, lơ̆m lăi pơthâo kơ Khua pơ ala mơnuih ƀôn sang dêh čar. Kâo rơkâo, khom lăi pơthâo dơlăm hăng ngă tui ba glăi bôh tơhnal hơdră pơtrun pơplih phrâo tơlơi pơmin čih pơkra tơlơi phiăn, pioh tañ ba tơlơi pơtrun mơ̆ng Ping gah mă yua amăng tơlơi hơdip mơda. Hơdôm tơlơi phiăn khom rơguăt, tum djop, tŭ yua, ba glăi bôh tơhnal, pơtrut kơtang pơpha gưl, bruă apăn. Gah jơlan gah čih pơkra tơlơi phiăn, ƀirô lăi pơthâo bruă gơgrong đut hlah hăng rơwang bruă tơlơi phiăn truh kơ dưi hmâo Khua pơ ala mơnuih ƀôn sang pơsit pel ĕp”.

Amăng mông jơnum, ƀing Khua pơ ala mơnuih ƀôn sang tui akô̆ bruă hmâo bơkơtuai kơ rơwang bruă Tơlơi phiăn măi mok hơdră mă yua mrô. Khua pơ ala Nguyễn Thị Thu Nguyệt, Grŭp Khua pơ ala mơnuih ƀôn sang dêh čar tơring čar Dak Lak phun ñu tŭ ư hrŏm hăng hră čih pơkra tơlơi phiăn, hmâo hơdôm bôh yôm phrâo biă pơdah ƀơi hơdôm hơdră pơkă, bơhmutu ñu kah hăng kông ngăn mrô, pơkra gơnam tam mă yua mrô, blơi sĭ gơnam tam mrô, ... Djru rơđah amăng hră čih pơkra tơlơi phiăn, Khua pơ ala Nguyễn Thị Thu Nguyệt lăi lĕ, tui hăng bôh yôm Mơta tơlơi 10 hmâo ba tơbiă sa tơlơi kiăng pơhlôm klă kơ bruă măi mok hơdră mă yua mrô, samơ̆ črăn pơkă kơ hơđong plăng Internet hăng pơgang mrô dô̆ hrŏm hrŏm đơi, kơƀah rơđah gah tơhnal pơkă hơdră măi mok hăng glông jơlan wai lăng:

“Amăng pơplih mrô jai hrơi jai pơđĭ kyar lĕ mrô djă pioh anăn păn hăng mrô anom bơwih ƀong jing kông ngăn yôm, hrŏm hăng anun ăt lĕ tơhnal kơsung pơsur mơ̆ng hơdôm bơnah gah rơngiao. Bruă kơƀah hơdôm tơhnal pơkă ngă mă yua măi mok rơđah, glông jơlan wai lăng kơjăp amra ba truh hơdôm tơlơi ƀu tơphă, rơngiă đôč, ƀu kơđiăng ƀudah pơsuh mut amăng mrô djă pioh, yua anun kâo rơkâo Grŭp čih pơkra tâ̆o hloh hơdôm tơlơi pơkă rơđah kơ hơđong plăng internet hăng hơdôm tơlơi pơkă anai hluai tui hơdôm tơhnal pơkă jar kơmar ăt kah hăng hơdôm tơhnal pơkă yua kơ Ding jum Kông ang hăng Ding jum bôh thâo phrâo hăng Hơdră mă yua măi mok hmâo mă yua hlâo adih”.

Bơ̆ Khua pơ ala Phạm Trọng Nghĩa, Grŭp Khua pơ ala mơnuih ƀôn sang dêh čar tơring čar Lạng Sơn rơkâo:

“Pel ĕp pơhrua nao hơdră bruă pơđĭ kyar măi mok mă yua mrô pioh pơhlôm tơlơi dưi lŏn ia amăng plăng internet, pơhlôm hơđong Iternet, hơđong mrô djă pioh, pơhlôm klă tơlơi pơhing mơ̆ng khul grŭp hăng mơnuih. Anai lĕ sa amăng 5 tơlơi črâo ba amăng tơlơi pơtrun pơsit mrô 57. Dua lĕ, rơkâo pel ĕp pơhrua nao hơdră bruă kiăng ngă hret ƀiă rơwang mrô pioh djop mơnuih ƀôn sang, biă ñu lĕ ƀut mơnuih ƀu hmâo anih kơnang kah hăng neh wa djuai ania ƀiă ƀơi kual asuek, ataih dô̆ hmâo tơlơi tơnap dưi čơkă mă mơ̆ng tơlơi pơđĭ kyar mơ̆ng măi mok mă yua mrô pioh ƀu hmâo hlơi lui lơi gah tlôn tơdơi kơ pơđĭ kyar măi mok hơdră mă yua mrô ƀơi dêh čar ta”.

Tŭ mă hăng pơblang hơdôm tơlơi ƀing Khua pơ ala mơnuih ƀôn sang dêh čar tơdah, Khua Ding jum bôh thâo phrâo hăng hơdră măi mok Nguyễn Mạnh Hùng pơtŏng sit, Ping gah hăng Kơnuk kơna hmâo pơsit măi mok hơdră mă yua mrô jing măi mok phun, hmâo tơhnal khom ngă hăng biă ñu djơ̆ hăng tơhnal gal Việt Nam, hmâo bôh tŭ yua pơsit pioh pơđĭ kyar bơwih ƀong mrô lăi ha jăn hăng mơnuih mơnam lăi hrŏm amăng rơnuk phrâo.

Pơhiăp amăng mông pơđut jơnum, Kơ-iăng Khua git gai pơ ala mơnuih ƀôn sang dêh čar ơi Trần Quang Phương čih djă pioh, pơsit yôm tơlơi gum hrŏm djop, gơgrong prong mơ̆ng ƀing khua pơ ala mơnuih ƀôn sang dêh čar tui akô̆ bruă, hơdôm bôh ƀirô bơdjơ̆ nao. Ƀing khua pơ ala mơnuih ƀôn sang gơgrong bruă hmâo laih tơlơi prăp lui bôh yôm tŏng ten, hơdôm tơlơi gum pơhiăp hmâo tơhnal akô̆ pơjing rơguăt, tum djop, pơblang dơlăm biă./.