Rơnuč thun hlâo, Ding jum kơđi čar hơmâo Tơlơi pơtrun mrô 57 kơ pơplih kơtang bruă đĭ kyar boh thâo ia rơgơi, măi mok, pơčeh phrâo hăng pơplih boh thâo mrô dêh čar. Tơdơi kơ anun, ƀơi Sang jơnum prong Diên Hồng hơmâo pơphun Jơnum đơ đam dêh čar lăi pơthâo Tơlơi pơtrun mrô 57, Khua git gai Ping gah ơi Tô Lâm hơmâo pơhiăp git gai yôm ƀơi mông Jơnum hăng Khua git gai pơ ala mơnuih ƀôn sang dêh čar ơi Trần Thanh Mẫn ăt lăi pơthâo mơn kơ tơlơi anai. Ping gah khul khua pơ ala mơnuih ƀôn sang pơtrun akŏ bruă mrô 3260 kiăng ngă tui Tơlơi pơtrun mrô 57. Ƀơi mông jơnum ƀu tui tơđar tal9, Khua mua pơ ala mơnuih ƀôn sang sem lăng, pơsit brơi Tơlơi pơtrun mrô 193 kơ hơdôm hơdră ngă bruă phara hơjăn kiăng pơplih kơtang hloh, kơdăt đĭ glông biă amăng bruă kơsem min boh thâo, măi mok, pơčeh phrâo tơlơi rơgơi hăng pơplih mă yua boh thâo mrô dêh čar. Anai jing tơlơi pơtrun kiăng pơsir hĭ bruă hơmâo ƀơi anăp, sui thun amra pơplih hĭ hơdôm tơlơi phiăn anai đah mơ̆ng pơđĭ tui kơtang hloh bruă boh thâo ia rơgơi.

Pơhiăp ƀơi mông Jơnum, Khua git gai pơ ala mơnuih ƀôn sang dêh čar ơi Trần Thanh Mẫn lăi, tơlơi pơtrun mrô 57 kiăng hơmâo ngă truh pơ thun 2030, Việt Nam dong amăng mrô 3 boh dêh čar ba akŏ kual Ngŏ Dơnung ASIA, dong amăng mrô 50 boh dêh čar ba akŏ ƀơi rŏng lŏn tơnah kơ mrô bơkơtưn boh thâo mrô hăng mrô rơnoh đĭ kyar Gong gai mă yua điện tử. Việt Nam čang rơmang dong amăng mrô 3 boh dêh čar ba akŏ kual Ngŏ Dơnung ASIA kơ kơsem min hăng đĭ kyar ia rơgơi ană mơnuih pơčeh mă, anih đĭ kyar phun hơdôm bruă mă yua boh thâo ia rơgơi mrô. Ơi Trần Thanh Mẫn kiăng Khul khua wai lăng djuai ania, hơdôm Jơnum min mơ̆ng Ƀirô khua pơ ala mơnuih ƀôn sang, Anom bruă khua pơ ala mơnuih ƀôn sang pơƀut lăi pơthâo rơđah rơđông ngă hơdôm bruă akŏ phun kah hăng: “Pơđĭ tui boh thâo ia rơgơi, pơčeh phrâo tơlơi rơgơi, pơplih jing bruă yôm phun, khŏm kiăng đah mơ̆ng akŏ pơjing Ƀirô khua pơ ala mơnuih ƀôn sang mă bruă tui rơnuk phrâo, rơđah rơđông, dưm kơnar, apăn bruă, tŭ yua. Ia rơgơi pơčeh mă jing gum djru bruă biă djru ba Khua mua pơ ala sem lăng, ba tơbiă hơdră ngă bruă tơpă sit, djơ̆ hăng tơlơi kiăng, tŭ yua bruă krăp lăng, pơtruh klă hloh hăng mơnuih ƀôn sang. Khua mua pơ ala mơnuih ƀôn sang kiăng nao hlâo tuh pơ alin man pơkra anih anom boh thâo mrô, mă yua boh thâo ia rơgơi, măi mok phrâo pơtô pơjuăt mơnuih mă bruă rơgơi bơwih brơi kơ dêh čar mă yua boh thâo mrô. Ngă tui tañ, tŭ yua hơdôm Tơlơi pơtrun, akŏ bruă hơmâo pơtrun hăng Ƀirô khua pơ ala mơnuih ƀôn sang; pơtô pơjuăt prăp rơmet tơlơi rơgơi mă yua mrô, djru ƀing khua pơ ala hăng khua mua amăng hơdôm anom bruă pơ ala mơnuih ƀôn sang mă yua boh thâo tŭ yua. Đĭ kyar anih anom mrô rơnuk phrâo, tuh pơ alin akŏ pơdong anih mă yua ia rơgơi ană mơnuih pơčeh phrâo...bơwih brơi bruă mă mơ̆ng Khua mua pơ ala mơnuih ƀôn sang dêh čar”.

Khua git gai pơ ala mơnuih ƀôn sang dêh čar pơtă hlâo, kiăng hrăm nao rai tơlơi thâo thăi ngă bruă hăng pơtrut gum hrŏm kơsem min hăng jao glăi tŭ mă boh thâo măi mok hăng hơdôm boh dêh čar gah bruă pơčeh tơlơi rơgơi, boh thâo mrô rơnuk phrâo amăng anom bruă pơ ala mơnuih ƀôn sang, či pơđĭ tui hơdră ngă bruă lăp djơ̆ hăng tơlơi kiăng sit nik mơ̆ng Ƀirô khua pơ ala mơnuih ƀôn sang Việt Nam.

Khua git gai pơ ala mơnuih ƀôn sang pôr pơthâo, ƀơi mông jơnum lok 9, amăng blan 5 pơ anăp, Khua pơ ala mơnuih ƀôn sang amra sem lăng pơgôp hiăp kơ Tơlơi phiăn Boh thâo ia rơgơi hăng pơčeh phrâo; sem lăng pơsit mă yua Tơlơi phiăn Boh thâo măi mok mrô, či pơklaih brơi tơlơi gun, pơgăn đĭ kyar, pok jơlan kơ boh thâo ia rơgơi đĭ kyar, pơčeh phrâo, pơplih boh thâo mrô dêh čar.

Pơčrông sai ƀơi mông jơnum, Khua ding jum boh thâo ia rơgơi dêh čar ơi Nguyễn Mạnh Hùng lăi, amăng Tơlơi pơtrun mrô 57, boh thâo phrâo, tơlơi pơčeh phrâo jing tơlơi yôm phun hloh, jing tơlơi gêh gal kiăng Việt Nam jing dêh čar đĭ kyar:“Hăng tơlơi đĭ kyar bơwih ƀong khŏm kiăng hơmâo hơdră ngă bruă pơplih phrâo, hơkrŭ đĭ, laih anun Tơlơi pơtrun mrô 57 jing hơdră ngă bruă pơplih tui anun. tơlơi git gai anun jing phun tơhnal kiăng lŏn ia ta đĭ kyar. Kiăng huăi kơdun glăi, huăi đĭ kyar kaih đơi, pơplih phrâo, kơdăt đĭ, găn rơgao mrô prăk pơhrui aset jing anai yơh jơlan nao lăp djơ̆ hloh. anun jing ƀing ta lăng kar hăng bruă ngă hơkrŭ mơn, pơmin dlăm hăng abih bang. Việt Nam truh kih hăng đĭ kyar kơtang lơ̆m hơmâo sa bruă hơkrŭ mơ̆ abih bang gum ngă”.

Jơnum “Ƀirô khua pơ ala mơnuih ƀôn sang mă yua boh thâo mrô hăng mă yua ia rơgơi ană mơnuih pơčeh mă amăng pơplih mă yua mrô mơ̆ng Ƀirô pơ ala mơnuih ƀôn sang” hơmâo pơsit tơlơi gir kơtang biă mơ̆ng Khua mua pơ ala mơnuih ƀôn sang dêh čar amăng bruă nao hlâo pơplih boh thâo mrô, mă yua boh thâo ia rơgơi đah mơ̆ng pơđĭ tui boh tŭ yua lơ̆m ngă bruă. Hơdôm tơlơi prong ba tơbiă amăng Tơlơi pơtrun mrô 57 hăng hơdôm tơlơi pơtrun bơdjơ̆ nao ƀu kơnong kiăng hơmâo tơlơi pơplih prong gah boh thâo, pơčeh phrâo ia rơgơi hăng pơplih boh thâo mrô dêh čar đôč ôh mơ̆ ăt dăp atur kjăp kơ sa Ƀirô khua pơ ala mơnuih ƀôn sang mă bruă pơplih phrâo, rơđah rơđông hăng apăn bruă hloh./.