Hmâo laih tơring glông amăng tơring čar anăp nao giăm tơhnal ngă giong bruă lŏm lui sang tơ̆i kơ mơnuih ƀôn sang. Kon Braih lĕ tơring glông blung a mơ̆ng tơring čar Kon Tum truh ră anai hmâo pơphun pơdŏng hăng pơkra glăi abih bang 155 bôh sang tơ̆i, sang răm kơ hơdôm bôh sang anô̆ mơnuih ƀôn sang. Amăng anun mrô kiăng pơdŏng phrâo lĕ 102 bôh sang hăng pơkra glăi lĕ 53 bôh sang. Ơi Nguyễn Văn Thuỷ, Kơ-iăng Khua Jơnum min mơnuih ƀôn sang tơring glông Kon Braih, brơi thâo ră anai hmâo ha mơkrah mrô sang kiăng pơdŏng phrâo, pơkra glăi pơdŏng giong hăng jao kơ sang anô̆ mă yua.

Tơring glông hrưn đĭ khom ngă giong bruă lŏm lui sang tơ̆i, sang răm amăng rơnuč blan 4/2025. Hrŏm hăng tơring glông Kon Braih, ƀơi tơring čar Kon Tum hmâo tơring glông Đăk Hà ăt kơnong kơ dô̆ 9 bôh sang hăng tơring glông Sa Thầy dô̆ 34 bôh sang pơdŏng giong. Hăng hơdôm bôh tơring glông kual asuek, kual tơnap mơ̆ng tơring čar hmâo lu sang tơ̆i, sang răm kiăng pơdŏng phrâo, pơkra glăi, kah hăng: tơring glông Đăk Glei 646 bôh sang, Kon Plông 572 bôh sang, Tŭ Mrông 423 bôh sang, truh ră anai mrô pơphun bruă pơdŏng, pơdŏng phrâo hăng pơkra glăi ăt dưi hmâo laih rơbêh kơ ha mơkrah./.