Sang hră čơđai anet Sao Mai lĕ sa amăng hơdôm boh sang hră hơmâo Ding jum ling tơhan hăng hơdôm anom bơwih ƀong gah ling tơhan man pơdong ƀơi kual giăm guai. Sang hră anai hơmâo anih yua lăp djơ̆ hăng tơlơi rơkâo amăng pơtô hrăm brơi rơbêh 300 čô čơđai ƀơi 24 boh plơi pla amăng hơdôm să giăm guai gah yŭ Gia Lai.

Đại tá Khuất Bá Cao, Khua git gai Ping gah, Kơ-iăng Khua anom bruă git gai tơhan Binh đoàn 15 brơi thâo: Bruă pok yua sang hră čơđai anet Sao Mai pơgôp djru brơi djop tơlơi kiăng amăng pơtô hrăm brơi ƀing ană bă kơ ƀing apăn bruă, ling tơhan, mơnuih mă bruă hăng mơnuih ƀôn sang, pơjing atur brơi pơđĭ kyar hơđong kjăp ƀơi kual giăm guai. Binh đoàn 15 čang rơmang ƀôn lan, sang hră amra hrŏm hăng Binh đoàn tŏ tui hơđong kjăp hơdôm anŏ yôm phara mơng sang hră.