Phường Quy Nhơn jing sa amăng hơdôm boh tơring pơphun prăp rơmet tañ kơ hrơi ruah khua. Mơ̆ng akŏ rơwang bruă, phương akŏ pơdong giong laih Khul git gai hăng Jơnum min ruah khua phương, laih dong akŏ pơdong 5 grup hơmâo: mơnuih mă bruă; djru prăp rơmet anih anom, ia mơñum; pôr pơhing; pơsir bruă tơgŭ kơđi; rơnuk rơnua hăng ia jrao. Hơdôm grup hơmâo soh grup djru bruă, jao bruă tong ten, rơđah rơđông kơ rim čô mơnuih, pơhlom prăp mă pô, djơ̆ hrŏm tơlơi črâo bruă, hăng pơphun ngă tui.

Tui hăng bruă prăp rơmet, ƀơi phương amra hơmâo 6 anih ruah khua, him lăng ruah mă 30 čô amăng Khul khua pơ ala mơnuih ƀôn sang phương rơwang thun 2026-2031. Ƀơi mông jơnum pơčrông sai ruah pô tơbiă anăn tal sa, hơmâo 48 čô hơmâo tơbiă anăn ba ruah. Amăng anun mrô đah kơmơi hơmâo 45,8%. Mrô mơnuih hrăm gưl prong truh kơ prong hloh. Jơnum min ruah khua phường Quy Nhơn mă hră pơ-ar ƀing tơbiă anăn ruah khua tui tơlơi pơtrun, laih dong prăp rơmet hlâo hơdôm bruă kiăng ngă amăng mông jơnum pơčrông sai tal dua, lăng glăi hăng tĕp hră čih anăn mơnuih nao plĕ hră, pơhlom djơ̆ tơlơi pơkă, djơ̆ hăng tơlơi kiăng prăp lui kơ mông ruah khua.

Ơi Nguyễn Đức Toàn - Khua ping gah, Khua Jơnum min mơnuih ƀôn sang phương Quy Nhơn brơi thâo: “Phương Quy Nhơn ba pơƀuh anăn 48 čô khua, kiăng mơnuih ƀôn sang ruah mă 30 čô khua tui tơlơi pơtrun, pơhlom ba pơƀuh mơnuih rơgơi, klă, đăo kơnang mut amăng Jơnum min pơ ala mơnuih ƀôn sang phương či djru phương akŏ pơjing gong gai jê̆ giăm mơnuih ƀon sang, pơƀut đĭ kyar bơwih ƀong huă - mơnuih mơnam ƀơi phương. Rơngiao kơ anun, gơmơi lăng glăi či akŏ pơdong grup ruah khua ƀơi 63 boh plơi hăng lăng glăi, čih anăn, pơsit anăn mơnuih dưi plĕ hră ruah khua”.

Tui hăng akŏ bruă, ƀơi tal ruah khua blan 3 pơ anăp, tơring čar Gia Lai hơmâo 6 anom bruă ruah khua pơ ala mơnuih ƀôn sang, him lăng ruah mă 16 čô. Hăng jơnum min pơ ala mơnuih ƀôn sang tơring čar, abih bang hơmâo 18 anih ruah khua, him lăng ruah mă 85 čô khua, pơhlom djơ̆ mrô, anih ngă khua tui tơlơi pơtrun.

Kiăng tal ruah khua rơnuk rơnua, dưi ngă pô hăng truh kih, mơ̆ng rơnuč blan 11/2025, Khul khua apăn bruă ping gah tơring Gia Lai pơphun jơnum lăi pơthâo bruă ruah khua mơ̆ng ataih lăng amăng tivi hăng 135 boh să, phương. Truh ră anai, anih ruah khua mơ̆ng tơring čar truh pơ să hơmâo ngă giong, djơ̆ hrŏm ha amăng plĕ tơlơi git gai, pơphun ngă. Khul khua Jơnum min djŏp djuai ania mơnuih mơnam Việt Nam tơring čar ăt pơphun jơnum pơtô brơi bruă ba pơƀuh mơnuih či ruah, ngă djơ̆ hrŏm hơdră ruah, boh tơhnal ruah hăng tơlơi kiăng jơnum pơčrông sai tui tơlơi phiăn. Hrŏm hăng anun, bruă pôr pơthâo ruah khua pơtrut kơtang mơn, djru mơnuih plĕ hră thâo hluh tơlơi dưi, tơlơi kiăng ngă mơ̆ng pô hăng anŏ pơkă kơ pô pơ ala brơi mơnuih ƀôn sang.

Ră anai, hơdôm boh tơring amăng Gia Lai glăk pơƀut pơtŏp brơi bruă kơ hơdôm grup ruah khua, čih giong anăn khua či ba ruah; laih dong prăp rơmet gơnam, hơdră pơhlom rơnuk rơnua, hơđong mơnuih mơnam hăng ia jrao amăng hrơi ruah khua. Akŏ blan 1/2026, Jơnum min ruah khua tơring čar Gia Lai pơphun lu wơ̆t grup pel ĕp lăng ƀơi să, phương đah mơ̆ng pơplih ming kiăng djơ̆. Nao lăng ƀơi phương Quy Nhơn, ơi Thái Đại Ngọc - Ding kơna Ping gah, Khua ping gah tơring čar, Khua Jơnum min ruah khua tơring čar Gia Lai kiăng:“Ngă hră pơ-ar ană mơnuih rơđah rơđông, tơlơi anai yom biă. Ngă hiư̆m pă lĕ ta ngă, khŏm pơhlom klă, ană mơnuih khŏm lăp djơ̆, ƀu djơ̆ kơnong kiăo tui tơlơi pơkă. Yua dah anai lĕ ƀing pơ ala brơi mơnuih ƀôn sang. Anun abih bang anom bruă kơđi čar mơ̆ng tơring čar truh pơ să khŏm ngă klă bruă anai”.