Ha wŏt hrơi tơjuh anai, mơng mơguah mơtăm, giăm 400 čô mơnuih ƀôn sang dŏ amăng să giăm guai Ia O, tơring čar Gia Lai hơmâo ƀuh ƀô̆ djop ƀơi să kiăng nao hrăm mă hră mơgăt rơdêh mô tô gưl A1. Anai lĕ kual plơi pla hơmâo giăm 70% lĕ mơnuih djuai ania ƀiă, tơlơi hơdip dŏ lu tơnap tap, yua anun bruă pơtô hrăm hăng pơphun pơplông kiăng hơmâo hră mơgăt rơdêh sol sel ngă kơ neh met hok mơ-ak biă mă. Ayong Ksor Thí, dŏ amăng plơi O, să Ia O brơi thâo:

“Kâo thâo đĭ rơdêh thut sui laih samơ̆ aka ƀu hơmâo hră mơgăt. Tơdơi kơ hmư̆ arăng pơtô pơblang, kâo nao čih anăn hrăm kiăng kơ thâo tong ten tơlơi phiăn amăng pơhlôm rơnuk rơnua amăng jơlan glông. Lơm hrăm giong, hơmâo hră mơgăt rơdêh kâo amra đĭ hyu klă ƀiă”.

Kiăng djru brơi mơnuih ƀôn sang amuñ nao hrăm, hơdôm anom bruă bơdjơ̆ nao hơmâo gum hrŏm pơphun anih pơtô ƀơi să mơtăm. Rơngiao kơ bruă pơtô brơi tơlơi phiăn đuăi rơdêh amăng jơlan, neh met wa ăt hơmâo črâo ba brơi đĭ rơdêh tui arăng pơhmutu mă hlâo anun lĕ: Đuăi dar tui glông mrô 8, đuăi tui jơlan giăt tơpă, đuăi wer gơnam dưm rôk jơlan…Yă Võ Thị Hà, kơ-iăng khua anom bruă pơtô hrăm hăng pơplông mă hră mơgăt rơdêh, phường Pleiku, tơring čar Gia Lai brơi thâo, bruă pơphun pơtô hrăm ƀơi kual ataih hơmâo prap lui sui laih kiăng gêh gal brơi neh met wa hăng pơhlôm brơi kơ klă hloh:

“Pok pơhai sa, dua boh tơhnal anun lĕ phĭn rup, pok pơhai ngă hră pơ-ar brơi neh met wa. Ƀơi anom bruă pơtô hrăm mă ngă mơgăt rơdêh ăt glăk hơmâo jơlan hơdră pơtô brơi soh sel, sit biă ñu lĕ neh met wa sang anŏ ƀun rin, giăm ƀun rin”.

Mơng pel ĕp, amăng tơring čar Gia Lai ăt dŏ hơdôm rơbâo čô mơnuih aka ƀu hơmâo hră mơgăt rơdêh gưl A1, lu hloh ƀơi hơdôm boh să kual ataih, asuek, kual mơnuih djuai ania ƀiă. Thượng tá Ksor H’Bơ Khăp, kơ-iăng Khua kông ang tơring čar Gia Lai brơi thâo, kiăng pơsir hĭ bruă anai, mơng akŏ thun 2025 truh ră anai, kông ang tơring čar Gia Lai hơmâo git gai anom bruă bơdjơ̆ nao gum hrŏm hăng hơdôm anom bruă pơtô hrăm mă hră pơ-ar mơgăt rơdêh, gong gai ƀon lan, hơdôm anom bruă ia jrao amăng tơring čar hăng anom bruă djru ba pơphun khăm, pơtô hrăm, pơphun pơplông brơi soh sel, ngă brơi hră pơ-ar mơgăt rơdêh gưl A1 brơi mơnuih ƀôn sang ƀơi hơdôm boh ƀon lan glăk kiăng.

“Ƀu djơ̆ kơnong ƀơi hơdôm kual ataih, asuek, kual giăm guai đôč ôh mơ̆ ăt wŏt hơdôm să, phường tong krah samơ̆ ăt dưi pơphun mơn, yua lu mơnuih tơnap tap kiăng hơmâo kơnuk kơna djru brơi. Tŏ tui ƀing gơmơi gum hrŏm amăng hơdôm bruă bơdjơ̆ nao nao pơphun bruă ngă brơi hră pơ-ar mơgăt rơdêh. Pơphun jơnum hăng mă bruă hăng hơdôm anom bơwih ƀong sĭ mơdrô, ƀing mơnuih čơmah čih anăn kiăng pơphun hơdôm bruă djru brơi mơnuih ƀôn sang amăng bruă pơplông hăng ngă brơi hră mơgăt rơdêh”.

Tui tơlơi pơkă, mơng anai truh abih thun 2025, kông ang tơring čar Gia Lai hrŏm hăng hơdôm anom bruă bơdjơ̆ nao ba tơbiă hơnong pơkă pơphun pơtô hrăm, pơplông hăng ngă brơi hră mơgăt rơdêh gưl A1 brơi giăm 47.000 čô mơnuih, lu hloh lĕ mơnuih djuai ania ƀiă. Hơdôm bruă mă anai ăt lĕ hơdră bruă phun kiăng hluh rơđah tơlơi phiăn, pơgôp plai ƀiă hăng hrŏ trun rơdêh pơjrŏm amăng kual mơnuih djuai ania ƀiă amăng tơring čar./.