Dơ̆ng mơ̆ng kơnôl 1/11/2025 truh ră anai, tơhan djop sang bruă kơnuk kơna ƀơi tơring čar Gia Lai hơmâo hyu sem, hơduah ĕp ƀơi 37 bit anih, kual, tơring amăng dêh čar ta pô hăng ƀơi 4 kual ƀơi dêh čar arăng, rŭ kual 85 per tơlang ƀing tơhan pơsăn drơi. Tơring čar ăt pơƀut glăi 3.100 mơta čơđeh, meh tơlang mơnuih djai hăng ƀing dŏ hơdip kiăng ba pơčrang; rŭ đĭ ƀơi pơsat dor tơhan pơsăn drơi aka ƀu thâo anăn, hơmâo 12.000 per tơlang, mă pơƀut 7.800 čơđeh, meh tơlang djop anŏ gêh găl ba pơčrang ADN. Đại tá Võ Tấn Tài, ding kơna anom bruă git gai ping gah, sang bruă khua tơhan tơring čar, Kơ-iăng khua khul git gai mrô 515 mơ̆ng Gia Lai lăng yom, bruă ngă hrŏm plah wah djop sang bruă kơnuk kơna, ling tơhan djop sang bruă ƀơi tơring čar, hơmâo pơgiong bruă jao črăn 1. Yak nao amăng črăn 2 dơ̆ng, ngă tui tơlơi pơtrun 500 hrơi mlam, hơduah ĕp, rŭ kuai dơ̆ng, kiăng pơsit anăn krăn pô tơlang ƀing tơhan djai pơsăn drơi jăn yua kơ lơ̆n ia:

“Hrơi blan pơ anăp, Khul ăt git gai ngă tui, lăi pơthâo khua mua pơdlông, khul khua mua ping gah tơring čar, brơi git gai djop gơnong bruă, sang bruă ngă hrŏm, gum ba khut khăt hloh laih anun gơgrong ba 6 mơta bruă phun hăng djop gơnong bruă, sang bruă ƀơi tơring čar. Hăng djop să, phường tơdơi kơ jơnum, pơtong glăi ăt khom ngă tui khut khăt hloh mơ̆n amăng bruă anai, biă mă ñu tơlơi gơgrong ba mơ̆ng mơnuih ƀôn sang ăt kah hăng tơlơi găn rơgao mơ̆ng ƀing tom ƀuh ƀô̆ mơta rơnuk blah ngă đưm, đah mơ̆ng amuñ ƀiă hơduah ĕp pơsat hăng rŭ kuai tơlang ƀing tơhan pơsăn drơi jăn yua kơ lơ̆n ia. Mơ̆ng anai pơ anăp kiăng ngă hiư̆m pă bruă hơduah ĕp, pơtong glăi anăn ƀing tơhan pơsăn drơi jăn yua kơ lơ̆n ia djơ̆ rơnoh jao kơ tơring čar Gia Lai”.

Yak nao amăng thun 2027, Khul khua git gai 515 tơring čar Gia Lai amra pơtum abih bang brơi kơ črăn 2 kah hăng hơdôm tơhnal pơkă: ngă giong 100% mrô rơnoh hyu ĕp, rŭ kuai tui hăng khua tơhan kual 5 jao; ngă giong bruă mă meh tơlang tơhan pơsăn drơi jăn yua kơ lơ̆n ia, čih pioh abih tơlơi pơhing pơsat, anih dor, čih pơmut amăng mrô abih bang mrô tơhan pơsăn drơi, hơduah ĕp anăn hăng ba pơčrang ADN, tui čơđeh asar gah kơnung djuai amĭ, čih pơmut amăng plang mrô dêh čar. Pok pơhai bruă mă dua bơnah anih blah ngă amăng dêh čar ta pô hăng ƀơi tač rơngiao hlâo adih. Thượng tá Hoàng Viết Ngọc-ding kơna khul bruă kơđi čar Grup K52 lăi pơthâo bruă či ngă khut khăt hloh:

“Črăn rơnuč amăng bruă mă tal anai, ƀing gơmơi amra pơđĭ kơtang hloh ngă tui hơduah ĕp pơsat tơhan pơsăn drơi amăng dêh čar ta pô hăng ƀơi tač rơngiao. Gơmơi lăi pơthâo tong ten hăng abih bang khua mua, ling tơhan pơđĭ tui bruă mă, glăm ba, pơtong rơđah tơlơi gơgrong amăng bruă mă, ƀu hŭi hrơi hăng mlam ôh, khut khăt gir run kiăng găn rơgao tơlơi tơnap tap đah mơ̆ng ngă giong bruă jao klă hloh”.

Ƀrô tal anai, 14 grup hăng 32 čô mơnuih ngă bruă hur har hloh amăng bruă hơduah ĕp,  rŭ kuai hăng pơsit anăn krăn pô tơhan pơsăn drơi jăn yua kơ lơ̆n ia, dưi hơmâo Khua jơnum min mơnuih ƀôn sang tơring čar Gia Lai brơi hră apah bơni gưl tơring čar.