Jing sa amăng hơdôm sang anŏ tơnap tap dưi tŭ mă sang arăng djru yua kơ Grup khua pơ ala mơnuih ƀôn sang dêh čar tơring čar Dak Lak ngă hrŏm Sang bruă prăk gah ling tơhan pơdong brơi, ơi Y Nguyên Niê dŏ ƀơi Ƀuôn Jŭng B, să Ea Ktur, tơring glông Čư̆ Kuin, ol kơdol pran jua biă mă yua mơak đơi. Sang anŏ gơñu hyăl amăl biă mă, ñu tha rơma, bơnai hơmâo tơlơi ruă rơngiă laih 2 thun hăng anai. Ană bă hyu mă bruă apah pơ ataih ĕp ƀong huă, lui hơjăn ñu dŏ pơ sang hăng 2 čô tơčô aka ƀu thâo phe pho. Djop mơta prăk yua amăng sang anŏ kơnang kơ đang kơphê sô tha laih, hrŏm hăng hyu mă bruă apah prăk pơhrui glăi ƀu hơđong ôh. Sang gơñu dŏ, sang tơr, hnăl sô laih, hluh jum dar, lăng gah ngŏ bơbung ƀuh pơtŭ lăng trun gah yŭ atur ƀuh eh mơnŭ bơbui, samơ̆ ƀu hơmâo prăk ming pơkra pơhrêp glăi ôh. Yua kơ anun, lơ̆m hơmâo tơlơi djru 80 klăk prăk man pơdong sang phrâo, ñu hok mơak tơl ƀu thâo pit. Dŏ krăo lăng rim hrơi hơbô̆ sang arăng pơdong đĭ, tơlơi mơak amang pran jua hik hăk. Ơi Y Nguyên Niê lăi:

"Hlâo adih sang hluh tơ̆i rơ̆i, ră anai kơnuk kơna djru sang anŏ gơmơi dưi man pơdong sang phrâo. Kâo bơni kơ ping gah, kơnuk kơna lu biă mă hơmâo djru ba”.

Dưi jao tŭ mă sang khăp pap hrŏm hăng čăl hơbit hăng ơi Y Nguyên Niê rơnuč blan 9 phrâo rơgao mơ̆n, yă H’Sang Pang Ting dŏ ƀơi Ƀuôn Buôk, să Nam Ka, tơring glông Lak, tơring čar Dak Lak ăt hok mơak ƀu thâo anŏ pia. Sang dŏ anŏ pit tơnap tap ƀun rin, lŏn ngă hmua ƀu hơmâo, bruă mă ƀu hơđong, kơnong hyu mă bruă apah, ĕp ƀong huă rim hrơi. Abih bang 8 čô amăng sang anŏ lơ̆m anun prăk pơhrui glăi hrơi hơmâo, hrơi soh sel đôč, anun yơh ñu ƀu khin pơmin nao ôh kơ bruă ming pơkra glăi sang dŏ răm ƀăm, tơ̆i tel sui thun baih. Lơ̆m tŭ mă sang mơ̆ng kơnuk kơna djru pơdong brơi, giong jao glăi kơ ñu, yă H’Sang ol kơdol pran jua lăi:

“Sang anŏ tơnap tap biă mă hlâo adih ƀu khin pơmin kơ bruă ngă sang, kơnong dŏ na nao amăng sang tơ̆i đôč. Tơ tă anai hơmâo sang, kơnuk kơna djru brơi, sang anŏ gơmơi dưi hơmâo sang phrâo djơh hăng anai kâo pô ƀu thâo anŏ pia dơ̆ng tah, kâo kơnong gir run mă bruă bơwih ƀong huă pơđĭ kyar sang anŏ kiăng tañ pơklaih mơ̆ng ƀun rin”.

Yă Lê Thị Thanh Xuân, Kơ-iăng khua grup ƀing pơ ala mơnuih ƀôn sang dêh čar ƀơi tơring čar Dak Lak brơi thâo: Hrŏm hăng bruă mă jao rim hrơi, Grup khua mua pơ ala gơñu, lăng nao bruă djru tơlơi hơdip kơ mơnuih ƀôn sang ƀun rin jing bruă glăm prong, gum tơngan hrŏm hăng jơnum min djop djuai ania mơnuih mơnam djop gưl, anom bruă khul grup kơđi čar kiăng djru ba tơlơi hơdip mơda mơnuih ƀôn sang dŏ ƀơi kual ataih, tơnap tap…djru kơ gơñu hrưn đĭ mă bruă amăng tơlơi hơdip mơda kiăng tañ hơđong, bruă anun ăt hơmâo gum hrŏm ngă hơđong tơlơi rơnuk rơnua amăng kual mơ̆n:

“Mơ̆ng akŏ rơwang bruă truh ră anai ƀing gơmơi jak iâu djru, man pơdong brơi 22 boh sang hăng rơnoh prăk 1 klai 400 klăk. Prăk aka ƀu lu ôh, samơ̆ hơmâo djru ngă bang bơngač bruă mă pơtrut djop mơnuih gum hrŏm ping gah hăng kơnuk kơna, đing nao kơ mơnuih tơnap tap kiăng mơnuih ƀôn sang đăo kơnang kơ ping gah kơnuk kơna, biă mă ñu mơnuih ruah khua đăo kơnang kơ ping gah hăng kơnuk kơna tong ten hloh. Mơ̆ng anun, ping gah kơnuk kơna ăt đing nao lu bruă djru ba mơnuoh ƀôn sang kiăng huăi hơmâo mơnuih lui hĭ gah klôn”.

Phrâo anai hloh, amăng bruă mă phun mơ̆ng gơñu, lơ̆m jơnum lok 8 ƀing pơ ala mơnuih ƀôn sang dêh čar tal XV hlăk dŏ jơnum ƀơi Hà Nội, Grup pơ ala mơnuih ƀôn sang dêh čar ƀơi tơring čar Dak Lak hơmâo rơkâo đĭ lu tơlơi pơgôp hiăp yôm kiăng pơsir brơi tơlơi tơnap tap ƀơi tơring čar. Rơđah biă mă ñu, pok pơhai kơčăo bruă pơkra glăi tơdrông tua ia hleo tong krah guai tơring čar Dak Lak hăng Gia Lai juăt lăi tơdrông tua "cầu 110", man pơkra giong 88%, dŏ glăi 12% đôč hlăk dŏ kơđông hĭ, yua aka ƀu duh glăi sir kơ mơnuih ƀôn sang hăng prăk mơ̆ng kơnuk kơna djru. Tơring čar Dak Lak hơmâo ngă hră mơ-it kơ Ding jum jơlan glông sem glăi, tuh pơ alin pơkra khom giong tơdrông tua anai kiăng huăi phăk phai hĭ đôč đač. Ăt amăng mông jơnum lok anai mơ̆n, Grup khua mua pơ ala mơnuih ƀôn sang dêh čar tơring čar Dak Lak hơmâo lăi pơthâo anŏ aka ƀu găl ƀơi tơring čar, jing tơring čar dưi pơđĭ kyar bruă pơkra apui lơtrik pơdar hăng jua angin, pil pơ-iă yang hrơi, samơ̆ ră anai djop kơčăo bruă pơkra pil pơ-iă yang hrơi ƀơi Dak Lak, pơblih nao rai sĭ mơdrô apui lơtrik yua kiăng pơkĕ apui lơtrik dêh čar, hrĕ apui lơtrik aka ƀu djop rơnoh pơkă; rơkâo kơ Ding jum tuh tia pơkra ming hăng sĭ mơdrô đing nao man pơdong gong pơkĕ apui lơtrik jua kơtang hăng hrĕ prong hloh dưi pơkĕ apui lơtrik dêh čar pơmut hrŏm; Rơkâo kơnuk kơna, hơdôm ding jum wai lăng bruă mă, ding jum pơtô hăng pơjuăt pơtong glăi bruă pok sang hră pơtô bruă mă, pơtong glăi boh tŭ yua mơ̆ng sang hră anai, bruă pok anih pơtô hrăm re se hơmâo hră pơtô brơi tong ten, dăp glăi, anom bruă anai brơi djơ̆, pơhlôm boh tŭ yua kơ bruă mă amăng kơnuk kơna wai lăng sang hră pơtô bruă mă, pơtô hrăm re se.