Sang anô̆ amai Tao Thị Coong, djuai ania Lự, ƀơi plơi Phiên Chá, să Nậm Tăm, tơring glông Sìn Hồ, tơring čar Lai Châu hlâo adih lĕ sang anô̆ ƀun rin hloh plơi. Pơhrui glăi mơ̆ng sang anô̆ kơnong kơ kơnang kơ hmua pơdai 1 bơyan, anun kơƀah ƀap rim thun. Rim wot hmâo bruă kiăng yua prăk, rơkơi bơnai ñu khom sĭ pơdai kơtor. Kơƀah tap biă, ƀu ƀiă tal rơkơi bơnai hmâo tơlơi ƀu djơ̆ hrom.

Mơ̆ng ngăn rơnoh čan mă kơmlai ƀiă gah Rơwang bruă 8 kơ "Ngă tui tơlơi dưm kơnar bơnai hăng rơkơi hăng pơsir hơdôm tơlơi kiăng hloh pioh kơ đah kơmơi hăng čơđai muai”, sang anô̆ ñu dưi hmâo gong gai ƀơi anai hăng hơdôm gưl Khul đah kơmơi djru ba, pơtô brơi hơdră bơwih ƀong huă.

Kơnang kơ triăng mă bruă, thâo gir run, rơkơi bơnai ñu hmâo ngă dong lŏn đang hmua pioh pơjing hơdră bơwih ƀong đang – dơnao ia – war hlô. Truh ră anai, sang anô̆ ñu hmâo laih đang phun bôh rơbêh kơ 3.000 m2 lŏn, dơnao rông akan rơbêh kơ 1.000m2 hăng 5 drơi kơbao. Ƀu kơnong kơ tơtlaih mơ̆ng ƀun rin, sang anô̆ ñu dô̆ jing sang anô̆ ngă đang hmua ba gru hlâo mơ̆ng plơi, mơ̆ng să. Dưi hmâo Khul pơlir hơbit đah kơmơi lăi pơhing kơ bruă dưm kơnar bơnai hăng rơkơi, rơkơi bơnai ñu hmâo gum nao rai amăng bruă ngă đang hmua hăng bruă mă amăng sang rim hrơi, bơwih brơi kơ ană bă nao hrăm hră tum djop”.

Să kual čư̆ siăng Tà Ngảo, tơring glông Sìn Hồ (Lai Châu) hmâo 13 bôh plơi hăng 2 djuai ania Mông, Dao dô̆ hơdip mơda. Yua kơ tơlơi pơmin hăng phiăn juăt sô hơđăp ƀu tŭ yua mơ̆ng djuai ania, anun hlâo adih, đah kơmơi amăng plơi kuh thun kơnong kơ thâo mă bruă, tơkeng ană hăng ƀu hmâo bôh pơhiăp amăng sang anô̆. Yua anun yơh, kơnang kơ hơdôm gưl gong gai, hơdôm khul grŭp, biă ñu Khul đah kơmơi lăi pơthâo klă bruă pơtô juăt tơlơi phiăn hăng djru gah tơlơi phiăn, anun adơi amai ƀơƀrư̆ pơplih tơlơi pơmin, amăng ƀrư̆ pơdah pô dưm kơnar amăng mơnuih mơnam.

Tha plơi Vừ A Páo, Khua kơnung djuai Vừ ƀơi plơi Thà Giằng Chải, să Tà Ngảo brơi thâo: ră anai adơi amai đah kơmơi ƀơi anai dưi gum hrŏm laih hơdôm bruă jơnum plơi, kơnung djuai hăng gum hrŏm lu bruă mă mơ̆ng plơi pla, mơnuih mơnam.

“Dưm kơnar bơnai hăng rơkơi yôm phăn biă, ƀu klă bruă dưm kơnar bơnai hăng rơkơi thơ amra tơnap biă amăng bruă djă pioh yâo mơ-ak amăng sang anô̆; tơlơi taih amang amăng sang anô̆ amra hmâo na nao, biă ñu hăng đah kơmơi hăng čơđai muai. Mơ̆ng hrơi kâo ngă khua kơnung djuai truh kơ ră anai, drơi pô kâo glăk dô̆ hơdip mơda hmâo 127 bôh sang anô̆, giăm truh 800 čô mơnuih lĕ djop mơnuih ngă tui tơlơi dưm kơnar bơnai hăng rơkơi klă biă. Ƀu hmâo hlơi rơkơi taih amang bơnai dong tah”.

Khul pơlir hơbit đah kơmơi Sìn Hồ ră anai hmâo rơbêh kơ 180 grŭp, rơbêh kơ 16.000 čô adơi amai, hăng năng ai ñu 95% lĕ mrô djuai ania ƀiă.

Yă Lâm Bích Hiến, Kơ-iăng Khua Khul pơlir hơbit đah kơmơi tơring glông brơi thâo: kiăng adơi amai amăng ƀrư̆ pơplih tơlơi pơmin, thâo pơmin hrưn đĭ pơdah bruă mă mơ̆ng pô amăng sang anô̆ hăng mơnuih mơnam, hơdôm thun rơgao, hơdôm gưl khul hmâo lăi pơhing hyu klă, lăi pơthâo abih hơdôm bôh yôm mơ̆ng Tơlơi phiăn dưm kơnar bơnai hăng rơkơi truh mơnuih amăng khul hăng mơnuih ƀôn sang. Mơ̆ng akô̆ thun truh ră anai, hơdôm gưl khul amăng tơring glông hmâo lăi pơhing laih rơbêh kơ 600 mông, hăng giăm truh 50.000 wot čô mơnuih gum hrŏm. Bruă lăi pơhing hyu dưi ngă tui lu hơdră kah hăng: pơdah ƀơi anih adôh suang, pơplông, bơkơtuai, lăi pơhing hyu hăng mơbah... Bôh yôm lăi pơhing hyu đing nao tơlơi taih amang amăng sang anô̆, pơjing sang anô̆ tâ̆o yâo, sang anô̆ pơđĭ kyar kơjăp...

“Khul pơlir hơbit đah kơmơi tơring glông Sìn Hồ ăt hmâo pok pơhai mơn bruă ngă tui hơdôm bruă jơnum, kiăng pơtrut tơlơi dưm kơnar bơnai hăng rơkơi amăng djop bruă. Ƀing gơmơi hmâo pơphun lăi pơhing hyu, pơtô pơhrăm pơđĭ dlông tơlơi pơmin kơ dưm kơnar bơnai hăng rơkơi kơ mơnuih apăn bruă, mơnuih amăng khul đah kơmơi hăng mơnuih ƀôn sang amăng tơring glông. Hrŏm hăng anun, pơphun hơdôm tal pơhrăm bôh thâo hơdip mơda, tơlơi phiăn pioh đah kơmơi pơđĭ kyar hăng phing kơ pran jua hloh, mơ̆ng anun pơđĭ dlông bôh thâo kơ đah kơmơi”.

Hơdôm tơlơi pơplih amăng tơlơi pơmin, thâo pơmin gah bơkơnar rơkơi hăng bơnai mơ̆ng plơi pla hmâo ba truh laih hơdôm bôh tơhnal sit nik ƀơi Lai Châu, lơm hơdôm hơdră sang anô̆ trơi pơđao, dưm kơnar bơnai hăng rơkơi, pơplih phrâo, yâo mơ-ak jai hrơi jai đĭ tui. Hơdôm hơdră grŭp khul đah kơmơi, mơnuih amăng khul hmâo ană rơkơi ƀu gơñ hot jrao hăng ngă soh tơlơi phiăn hmâo lu biă. Anai lĕ gru than pioh pơjing mơnuih mơnam hơđong rơnuk rơnua, pơđĭ kyar. Ƀơi lu anih anom, đah kơmơi dô̆ jing phun than amăng pơdŏng plơi pla phrâo, ba jơlan hlâo amăng pơđĭ kyar bơwih ƀong, hrŏ trun rin rơpa, mơ̆ng anun djru lăp yap ba amăng pơdŏng plơi pla, plơi pla jai hrơi pơđĭ kyar pơdrŏng asah klă hiam./.