Ƀơi plơi H’Bel, să Ia Kdăm, tơring glông Ia Pa, tơring čar Gia Lai, sang anŏ yă Kpă H’Mrat (thun tơkeng 1974) lĕ sang anŏ ƀun rin sui thun laih hăng tơnap biă mă kiăng pơklaih mơng ƀun rin. Sang anŏ hơmâo 8 čô samơ̆ ƀu hơmâo lŏn ngă hmua. Mơnuih mă bruă phun lĕ rơkơi ñu, ăt duam ruă na nao mơn. Tơlơi hơdip gơnang nao bơnai hăng anăn tơčua. Yă H’Mrat brơi thâo, mah tŭ mă lu tơlơi gum djru mơng hơdôm jơlan hơdră mơng Kơnuk kơna hăng mơnuih mơnam, samơ̆ sang anŏ ñu ăt aka ƀu dưi pơklaih mơng ƀun rin:

“Sang anŏ gơmơi tơnap tap biă mă, ană bă lu hăng dŏ anet. Kâo juăt hyu mă bruă arăng kiăng kơ hơmâo prăk ƀong. Ƀu hơmâo lŏn ngă hmua, ƀu hơmâo bruă mă hơđong, lơm ană bă duam ruă mơ̆ sang anŏ ƀu hơmâo prăk blơi jrao lơi anun glêh tơnap biă mă yơh”.

Tơdah să Chư Mố hơmâo 34 boh sang anŏ djuai ania Jarai ƀun rin kar hăng sang anŏ yă H’Mrat, ƀơi să Pờ Tó, ăt tơring glông Ia Pa mơn, bruă kơƀah lŏn ngă hmua, ba truh kơ lu sang anŏ aka ƀu dưi pơklaih mơng ƀun rin. Ơi Nguyễn Quốc Việt, Khua jơnum min mơnuih ƀôn sang să Pờ Tó brơi thâo, amăng 6 boh plơi djuai ania ƀiă hơmâo truh 214 boh sang anŏ ƀun rin, lu hloh lĕ yua aka ƀu hơmâo lŏn ngă hmua, Ƀu kơƀah djop mơta ngă boh tŭ yua mơng hơdôm jơlan hơdră pơhrŏ trun ƀun rin aka pơdah tong ten.

“Pơklaih mơng ƀun rin hơđong kjăp ăt kiăng pơphun amăng sui thun mơ̆ ƀu djơ̆ sa hrơi, dua hrơi đôč. Sit biă ñu lĕ hơdôm boh sang anŏ amăng plơi Bi Giông, Bi Gia bruă kơƀah lŏn ngă hmua ăt dŏ lu. Kiăng pơđĭ kyar bơwih ƀong huă, pơklaih mơng ƀun rin kiăng kơ hơmâo prăk tuh pơ alin, lŏn ngă hmua. Bơ rĭm hrơi mơ dŏ tơguăn bơyan yuă hơpă, hyu mă bruă arăng ăt tơnap biă mă. Ră anai neh met wa ƀơi anai tơnap tap djop mơta. Mah hơmâo pơlir hơbit djop ngăn rơnoh amăng hơdôm jơlan hơdră tui hơnong pơkă dêh čar kiăng djru brơi neh met wa hơmâo sang anŏ, bơwih ƀong huă dong”.

Yap truh abih thun 2023, đơ đam tơring čar Gia Lai ăt dŏ rơbêh 31.500 boh sang anŏ tui hơnong pơkă ƀun rin djop mơta, dưm dưm 8,11%. Amăng anun, lu hloh sang anŏ ƀun rin lĕ mơnuih djuai ania ƀiă. Kơnong ƀơi tơring glông Ia Pa hơmâo rơbêh 2.174 boh sang anŏ ƀun rin, dưm dưm 15,26%. Lu sang anŏ tơnap tap hơmâo tơlơi gal kiăng pơklaih mơng ƀun rin yua kơƀah lŏn ngă hmua.

Amăng thun blan rơgao, tơring glông Ia Pa hơmâo gir run pơtô pơblang, pơtrut pơsur neh met wa anăm sĭ lŏn. Laih dong, yua lŏn ngă hmua ƀu dŏ, tơring glông rơkâo jơnum min mơnuih ƀôn sang tơring čar Gia Lai mă glăi lŏn anom bơwih ƀong glăk ngă ƀu glăi tŭ yua, tơdơi anun jao glăi tơring glông kiăng kah pơpha brơi mơnuih ƀôn sang. Ră anai bruă blung hlâo lĕ đing nao iâu pơthưr tuh pơ alin kiăng ba glăi tơlơi yak nao phrâo amăng pơđĭ kyar bơwih ƀong huă, ĕp brơi bruă mă amăng ƀon lan. Ơi Ksor Suy, Kơ-iăng khua jơnum min mơnuih ƀôn sang tơring glông Ia Pa, tơring čar Gia Lai brơi thâo:

“Amăng hrơi blan rơgao, tơring glông iâu pơthưr hơdôm anom bruă tuh pơ alin, sit biă ñu bruă man pơdong hơdôm boh sang măi pơkra gơnam đang hmua kiăng pơhlôm blơi pơhrui gơnam tam, hơmâo bruă mă brơi mơnuih ƀôn sang. Mơng anun djru brơi mơnuih ƀôn sang hơmâo prăk pơhrui hơđong; pơtô pơblang brơi mơnuih ƀôn sang gum hrŏm hăng gong gai ƀon lan kiăng pơhlôm bơkơnar, hơđong amăng plơi pla ala ƀon”./.