Jơnum bơkơtuai ƀơi sang jơnum kơ sa, dua boh tơhnal dŏ pơmĭn phara mơng črăn tơlơi phiăn kơ mơnuih aka ƀu truh thun hlăk ai, ƀing khua pơ ala tŭ ư hrŏm lơm črăn tơlơi phiăn pơkă bruă pơtô pơjuăt ƀơi sang pơtô ba lĕ hơdră bruă pơsir tui tơlơi djru hăng tơlơi pơkă ten brơi rĭm čô mơnuih dưi pơsir tui hơdră anai. Ơi Phạm Văn Hòa, Khua pơ ala mơnuih ƀôn sang tơring čar Đồng Tháp brơi thâo:

“Hơdră pơsir pơtô pơjuă ƀơi sang pơtô ba lăp djơ̆ biă mă tui tơlơi sit nik amăng lŏn ia ră anai, ngă hiưm pă hăng ƀing mơnuih ngă soh kơtang soh kơtang hloh ƀu dưi mă krư̆. Yua tơdah mă krư̆ amăng hrơi blan anom bruă pel ĕp, ƀom kiơng him lăng mơng 9-12 blan, tơdơi kơ ba nao, kâo pơmĭn ƀing čơđai ăt mă krư̆ jang jai laih, yua anun mơng blung a tơdah ngă soh brơi pơplih tui hơdră djru ba, kâo pơmĭn kiăng pơplih tui anun”.

Ƀing khua pơ ala mơnuih ƀôn sang rơkâo tŏ tui pel ĕp tong ten hơdôm tơlơi pơkă rơđah rơđông kơ bruă phak mă yua hăng ƀing mơnuih aka ƀu truh hlăk ai hơmâo pơhlôm tui tơlơi phiăn kiăng pơhlôm bơtơhmal, pơgang, pơgăn bruă ngă soh, lăng pơhlôm tơlơi khăp pap amăng pơsir hĭ kơđi hăng ƀing mơnuih aka ƀu truh thun hlăk ai. Laih dong kiăng hơmâo hơdră bruă kiăng mơnuih aka ƀu truh thun hlăk ai hluh rơđah kơ bruă ngă soh, kiăng ƀing gơñu hluh hăng pơplih pơkra, anăm brơi ngă soh dong tah. Ơi Nguyễn Tạo, Khua pơ ala mơnuih ƀôn sang tơring čar Lâm Đồng lăi pơtong:

“Tơlơi pơkă tong ten mơng črăn tơlơi phiăn anai kiăng pơtô pơjuăt, djru brơi ƀing mơnuih aka ƀu truh thun hlăk ai, pơplih pơkra tơlơi ngă soh jing mơnuih hơdip hiam klă amăng plơi pla ala ƀon. Samơ̆, Tơlơi 40 amăng črăn tơlơi phiăn aka ƀu lăi nao bruă mơnuih aka ƀu truh thun hlăk ai hluh rơđah kơ bruă ngă soh mơng gơñu amra hluh rơđah, pơplih pơkra, anăm ngă soh dong tah. Tơdah ngă tui hơdôm hơdră pơsir djru ba ƀing mơnuih aka ƀu truh thun hlăk ai mơ̆ ƀu tŭ ư hrŏm tơlơi gal hăng djop mơta tui tơlơi lăi nao, tơlơi anai amra ngă ƀing gơñu tŏ tui ngă soh. Yua anun, ƀing gơmơi amra ƀu dưi ngă djơ̆ tơlơi phiăn kiăng pơtô pơjuăt brơi ƀing gơñu kiăng dưi pot glăi hơdip hiam klă amăng plơi pla”.

Lu tơlơi pơgôp hiăp tŭ ư hrŏm črăn tơlơi phiăn kiăng pơčlah kơđi hơmâo mơnuih aka ƀu truh thun hlăk ai ngă soh kiăng pơsir hĭ. Samơ̆, ơi Lê Tất Hiếu, khua pơ ala mơnuih ƀôn sang tơring čar Vĩnh Phúc brơi thâo, mơnuih ngă soh aka ƀu truh thun hlăk ai glăk tŏ đĭ tui, lu bruă ngă soh hăng mơnuih aka ƀu truh thun hlăk ai ăt lĕ ngă soh phun…Yua anun, lơm pơsir hĭ kiăng hơmâo tơlơi pơhaih, tơlơi jăm ƀuah amăng abih bang mơnuih bơdjơ̆ nao:

“Tơdah pơčlah ƀing mơnuih bơdjơ̆ nao lĕ mơnuih aka truh thun hlăk ai hăng ƀing truh thun laih lêng kơ nao phat kơđi amăng dua wŏt pơphun. Sit biă ñu dong, tơdah bruă phat kơđi bơdjơ̆ nao rơnang ƀiă amăng kơđi hình sự. Pơhmutu bruă bơrơjah kơ bruă duh glăi arăng đŭ amra pơsir amăng sang phat kơđi hiưm pă ñu ? Amăng mông pơsir kơđi ƀing aka ƀu truh thun ƀudah ƀing mơnuih truh thun laih ?. Tơlơi 40 pơkă tui hluai mơnuih mơn, tơdah dưi kiăng pơčlah ăt pơčlah mơn, tơdah ƀing pô anai ƀu dưi pơčlah amra brơi mut hrŏm hăng ƀu pơčlah ôh”.

Ƀing khua pơ ala mơnuih ƀôn sang ba tơbiă hơdră phak hrŏm hăng pơplih pơkra tui jơlan gah: ƀu rơgao 12 thun mă krư̆ hăng mơnuih mơng 14 truh pơ yŭ 16 thun hăng ƀu rơgao 18 thun mă krư̆ hăng ƀing mơnuih aka ƀu truh 16 thun truh pơ yŭ 18 thun hăng ngă tui bơkơnar hăng ƀing ngă soh pơkŏn. Tơlơi pơkă tui anun pơhlôm pơkah tui hơdră pơsir kơđi kơplah wah mơnuih aka truh thun hlăk ai ngă soh 1 tơlơi hăng ƀing aka truh thun hlăk ai ngă soh; tơlơi anai kiăng huăi ngă kơtang tui tơlơi glăm ba pơhmu hăng tơlơi pơkă mơng črăn tơlơi phiăn hình sự; laih dong huăi hơmâo tơlơi bơdjơ̆ nao phrâo dong lơm tum pơƀut glăi hơdôm tơlơi phak bơtơhmal./.