15 čô khua, ling tơhan Khul git gai tơhan pơgang hlâo kual 6 (Anom bruă git gai tơhan tơring čar Gia Lai, Tơhan kual 5) ječ ameč ruh tah hĭ pơnăng tơdlưh, rơmet rơmot, kuăi pơƀut asuk ruk, pơkă, klơi atur man pơdong sang kơ sang anŏ amai Trần Thị Lợi, să Phù Mỹ, tơring čar Gia Lai (hlâo adih lĕ să Mỹ Quang, tơring glông Phù Mỹ, tơring čar Bình Định). Đại uý Đỗ Xuân Nam, mơnuih mă bruă gah kơđi čar, Khul git gai pơgang hlâo Kual 6 brơi thâo, hăng 15 čô khua, ling tơhan trun nao djru ană plơi, anom bruă amra man giong sang hlâo lơ 31/1/2026:“Tơhan kual 5 jao bruă mă, git gai tơhan blah ngă Khul tơhan pơgang hlâo gum ngă bruă khut khăt, hmao tlôn pơphô bruă Anom bruă khua git gai tơhan tơring čar pơphun bruă man pơdong sang hăng pơkra ming sang kơ neh met wa hlâo kơ Tê̆t mơak thun phrâo. Ping gah Khul pơgang hlâo kual 6 pơsit, anai jing bruă kơđi čar yom phun, kiăng man pơdong sang dŏ kơ neh wa tañ hloh, djru brơi neh wa hơđong glăi tơlơi hơdip, ba glăi tơlơi hơdip trơi pơđao yâo mơak kơ mơnuih ƀôn sang”.

Amăng tal hơjan kơthel ia dăo kơtang phrâo rơgao, sang dŏ mơ̆ng amai Trần Thị Lợi, ia jroh pơčah, tơdlưh abih laih; 3 tơn pơdai, hrŏm hăng tivi, hip rơ-ơ̆ hăng lu gơnam yua dong ia kor đuăi abih mơn. Tơdơi kơ ia dăo, Kơnuk kơna djru ba 60 klăk brơi sang anŏ amai Lợi pơdong sang phrâo; ling tơhan djru man pơdong, djru mơ̆ng bruă anet hloh. Amai Trần Thị Lợi ol kơdol yua ƀing tơhan djru ñu man pơdong sang phrâo, adai pơ-iă ƀudah hơjan hlim ăt ngă bruă đôč:“Blung a kâo bơni kơ adơi ayong ling tơhan lu biă mă, yua djru sang anŏ gơmơi hơmâo sa boh sang dŏ phrâo či dŏ, brơi ană bă kâo hơmâo anih dŏ dong ƀong huă, hrăm hră pơ-ar”.

Ơi Võ Trọng Đàng, dŏ pơ să Hòa Thịnh, tơring čar Dak Lăk (hlâo adih lĕ să Hòa Thịnh, tơring glông Tây Hòa, tơring čar Phú Yên hơđăp), ia kor đuăi mơn sang ñu, abih bang dram gơnam ñu pơkom, ia pơđung đuăi abih. Sang anŏ ñu hơmâo anăn Kơnuk kơna djru pơdong glăi sang, ling tơhan djru pran, ngă bruă man pơdong pơnăng, pŏng pơbung tôl. Lăng ƀing tơhan mơ̆ng Khul tơhan git gai pơgang hlâo kual Tuy Hòa ƀu hŭi kơ glêh glar, hrơi mlăm djru man sang, ơi Võ Trọng Đàng ol biă mă:“Mơ̆ng hrơi Khua dêh čar git gai kiăng man pơdong sang kơ neh met wa, adơi ayong ngă tơhan gum ngă abih pran jua mơtăm yơh či man pơdong sang kơ neh wa. Kar hăng sang gơmơi anai, rim hrơi hơmâo rơbêh 10 čô tơhan nao man pơdong sang, ră anai man giong laih atur”.

Kơthel mrô 13 hăng hơjan ia dăo tơdơi kơ anun ngă tơdlưh rơbuh abih 1.653 boh sang hăng ngă răm rai 39.462 boh sang pơ 4 boh tơring čar Gia Lai, Dak Lăk, Lâm Đồng hăng Khánh Hòa. Tơdơi kơ hơjan kơthel, Khua dêh čar ơi Phạm Minh Chính iâu pơthưr “Bruă mă Quang Trung hơdeč hmar” či man pơdong sang dŏ kơ neh met wa pơ anih ia dăo. Ling tơhan yơh sa amăng hơdôm khul nao hlâo ngă bruă. Ƀơi 2 boh tơring čar Gia Lai hăng Dak Lăk, kơnong kơ 10 hrơi tơdơi kơ Khua dêh čar iâu pơthưr, hơmâo laih rơbêh 750/1.075 boh sang hơmâo man pơkra, hăng năng ai 80% mrô sang anai ƀiă či giong laih.

Đại tá Trần Minh Trọng, Kơ-iăng khua kơđi čar Khul tơhan kual 5 brơi thâo, rơbêh 5.000 čô tơhan glăk rim hrơi gum ngă bruă, pơhlom pơkra sang djơ̆ hăng tơlơi kiăng ngă ječ mơ̆ng Khua dêh čar:“Hơdôm anom bruă mơ̆ng Ding jum hăng Khul tơhan kual 5 hơmâo akŏ pơdong 279 grup man pơdong, hăng rơbêh 5.300 čô khua, tơhan ha amăng plĕ man pơdong sang djru kơ neh met wa. Ră anai, hơdôm anom bruă, ling tơhan glăk ngă hrŏm hăng gong gai ƀon lan, man pơdong sang dŏ, hrơi mlăm ăt ngă bruă mơn, đah mơ̆ng tañ giong tui hrơi pơkă hlâo kơ lơ 30/1/2026 jao sang dŏ yơh, djru sang anŏ tañ mut dŏ, čơkă Tê̆t thun 2026 amăng sang dŏ ƀhêm hiam tơlơi khăp tơhan hăng mơnuih ƀôn sang”.

Ƀơi hơdôm boh plơi bưp tơlơi truh lŏn adai ngă, hơdôm boh sang hơmâo man pơkra hăng ƀrik mriah hăng ia hâ̆o ia hang mơ̆ng ƀing tơhan, kar hăng bơnga hiam ƀhêm hrưn đĭ rim hrơi rim mông. Hơdôm boh sang dŏ kjăp ƀu kơnong djru ană plơi tañ hơđong tơlơi hơdip đôč ôh, ăt ngă jă bơngač pran đăo kơnang, bơbă tui tơlơi khăp ƀu-eng tơhan - mơnuih ƀôn sang kjăp phik, jing tơlơi ƀuăn mơ̆ng Ping gah, Kơnuk kơna, gong gai ƀôn lan kơ anih dŏ hơđong kjăp kơ kual Dơnung Tong Krah hăng Dap Kơdư./.