Ƀơi mông jơnum lok 7, Jơnum min pơ ala mơnuih ƀôn sang tơring čar Lâm Đồng tal 10, pơƀut pơčrông sai, pơsit brơi 32 hră lăi pơthâo bruă hăng 21 tơlơi pơtrun, amăng anun hơmâo lu tơlơi pơtrun yom, sui thun kah hăng: Tơlơi pơtrun mă yua prăk kăk 5 thun 2026-2030; Tơlơi pơtrun đĭ kyar bơwih ƀong huă - mơnuih mơnam 5 thun 2026-2030; akŏ bruă đĭ kyar bơwih ƀong huă - mơnuih mơnam thun 2026...Hrŏm hăng anun lĕ lu tơlơi pơtrun bơdjơ̆ nao bruă pơhlom brơi tơlơi bơwih ƀong hơdip mơda mơnuih ƀôn sang.

Găn rơgao lu tơlơi tơnap tap, lông lăng, thun 2025 tơlơi bơwih ƀong Lâm Đồng ăt đĭ na nao mơn hăng 16/19 rơnoh pơkă dưi ngă, hăng rơgao akŏ bruă jao; prăk pơhrui glăi kơ Kơnuk kơna mơ̆ng tơring čar hơmâo rơbêh kơ 31.200 klai prăk, jing đĭ 17% pơhmu hăng akŏ bruă mơ̆ng Kơnuk kơna jao. Bruă ngă hmua ăt pơsit tơlơi gơgrong bơwih ƀong mơ̆ng tơring čar; bruă apui lơtrik, pơkra bôxit alumin ăt pơgôp prong amăng rơnoh đĭ kyar mơ̆ng tơring čar...Ơi Tiêu Hồng Phúc, Kơ-iăng khua jơnum min pơ ala mơnuih ƀôn sang tơring čar Lâm Đồng, brơi thâo, tơring čar glăk pơkaih brơi hơdôm tơlơi tơnap či pơplih prong kơtưn đĭ kơtang hloh amăng bruă bơwih ƀong, mơnuih mơmam:“Tơdơi kơ pơmut hrŏm gong gai tơring čar dua gưl amăng bruă mă, blung a hơmâo lu boh than yom. Khă hnun, ăt dŏ hơmâo lu tơlơi gun aka ƀu hruaih khŏm kiăng pơčrông glăi dong laih anun ba tơbiă hơdră pơsir hĭ. Yua hnun amăng mông jơnum tui tơđar anai jing Khua mua pơ ala mơnuih ƀôn sang tơring čar ƀu jơnum tơña hăng glăi ôh”.

Ƀơi mông jơnum mơ̆ng Jơnum min pơ ala mơnuih ƀôn sang tơring čar Gia Lai, ƀing khua pơ să Tuy Phước Bắc lăi pơthâo glăi amăng tal hơjan kơthel phrâo rơgao, Gia Lai hơmâo 5 čô mơnuih djai, 11 čô mơnuih ruă, rơbêh 32.000 boh sang ia dăo, ia kor pơđuăi. Ƀing khua kiăng anom bruă hmua hăng ayuh hyiăng ngă rơđah hơmâo mơn hă ƀô̆ bruă sang măi drai ia pơđoh ia amăng dơnao ngă ia dăo kơtang, sem lăng tong ten anŏ klă mơ̆ng bơnư̆ pơđoh đuăi ia dăo ră anai, tơlơi gơgrong bruă mơ̆ng pô wai lăng hăng hơdră ngă bruă sui pơ anăp anai...

Lăi glăi tơlơi tơña, ơi Cao Thanh Thương - Khua gơnong bruă hmua hăng ayuh hyiăng Gia Lai - pơsit ƀu hơmâo bruă pơđoh ia ƀơi ia krông Hà Thanh ôh. Gah ia krông anai ƀu hơmâo dơnao kŏng ia ôh. Dua boh bơnư̆ dơnao kŏng ia prong gah Ngŏ tơring čar lĕ Núi Một hăng Định Bình amăng tal ia dăo phrâo rơgao leng kơ kŏng bă ia, laih anun bruă pơđoh ia bơdjơ̆ nao ia krông Côn đôč. Ơi Cao Thanh Thương ăt črâo pơƀuh tơlơi aka ƀu djơ̆ lơ̆m pơđoh tơbiă ia dăo ră anai kah hăng bruă man pơdong tek nao hang ia krông, pla phun keo amăng kual pơđoh ia dăo ngă añip hĭ glông ia rô; sa črăn bơnư̆ Hà Thanh pơčah hơdôm pluh met yua ia tlă, hăng tek djơ̆ hang ia. Sui pơ anăp, hơdôm boh tơring khŏm lăng glăi ba pơđuăi mơnuih ƀôn sang kiăo tui tơlơi hŭi rơhyưt lŏn adai ngă. Ơi Cao Thanh Thương brơi thâo, ră anai anom bruă ngă hmua hơmâo 3 hơdră pơsir:“Kiăng pơhlôm pơđoh đuăi ia, gơnong bruă lăi pơthâo hăng Jơnum min mơnuih ƀôn sang tơring čar pơkă hơnong, prăp rơmet tong ten kơ kual pơđoh ia blai ƀơi ia krông Hà Thanh, samơ̆ prăk ngă bruă lu biă, kiăng prăp rơmet sui kah mơ̆ng dưi ngă. Ƀơi anăp, gơnong bruă lăi pơthâo laih hăng Jơnum min mơnuih ƀôn sang tơring čar kơ bruă hyu kuăi, kor, dloh amăng ia rô. Dua lĕ khŏm kli, đăl bơnư̆ kŏng ia pơgang ba kual plơi pla. Tal klâo lĕ khŏm sem lăng, pơsir hĭ bruă tek nao glông pơđoh ia. Anai jing 3 mơta bruă khŏm kiăng ngă hlao”.

Ƀơi mông jơnum rơnuč thun, Jơnum min pơ ala mơnuih ƀôn sang tơring čar Quảng Ngãi pơtŏng glăi, tơring čar hơmâo ngă giong 24/24 rơnoh pơkă đĭ kyar thun 2025, laih dong pơƀuh rơđah 3 tơlơi dŏ đom prong kiăng pơklaih brơi, đah mơ̆ng dưi đĭ kyar kơtang hloh amăng thun 2026-2030. Anun lĕ, hơbô̆ bruă đĭ kyar aka ƀu hơđong lơ̆m pơhrui prăk kơ kơnuk kơna kơnang kơ hơdôm prăk pơhrui yom phun; ba sĭ gơnam pơ čar rơngoao trun; ngă hmua pơtruh hrŏm tơdu; bruă tuai hyu ngui aka ƀu djơ̆ hăng tơlơi gêh găl. Anih anom jơlan nao rai, logistics, tơdrun kom păn hăng hơdôm glông jơlan pơtruh kual aka ƀu dưm kơnar; bruă čuk pơkra pok anih man pơdong, brơi prăk tuh pơ alin dŏ kaih; lu tơlơi pơkă gah gru grua - pơtô hrăm - ia jrao trun tui...

Mut amăng rơwang đĭ kyar phrâo, tơring čar Quảng Ngãi kiăng pơplih kơtang hloh. Ơi Nguyễn Hòang Giang, Khua Jơnum min mơnuih ƀôn sang tơring čar Quảng Ngãi pơhiăp: “Hăng pran jua ngă bruă truh pơ anăp lĕ ngă bruă hmar hloh - kơtang hloh - khut khăt hloh; pơsir bruă truh anih đut tơhnal; lăi nao hrŏm hăng ngă, Jơnum min mơnuih ƀôn sang tơring čar Quảng Ngãi amra pơƀut djŏp tơlơi hơmâo, pơtrut tơlơi gêh găl, hơdôm bruă hơmâo ngă, hrŏm hăng pơsir hĭ hơdôm tơlơi dŏ đom, aka ƀu djơ̆, aka ƀu hruaih, gir ngă rơnoh đĭ kyar bơwih ƀong huă mơnuih mơnam thun 2026, ngă atur kjăp kơ rơwang thun 2026-2030”./.