Dong amăng kual mrô 1, akŏ bruă 3 Jơlan hơdră tui hơnong pơkă dêh čar amăng pơđĭ kyar bơwih ƀong huă-mơnuih mơnam kual mơnuih djuai ania ƀiă hăng čư̆ siăng rơwang tal 1 thun 2021-2025, samơ̆ truh ră anai bruă djru braih apiăng brơi hơdôm sang anŏ pla glai hăng pơđĭ kyar glai rưng rơngiao kơ kyâo pơtâo ƀơi tơring čar Kon Tum aka ƀu ngă tui. Anai lĕ bruă hơmâo khua mua Khul pơ ala mơnuih ƀôn sang tơring čar Kon Tum tal XII đing nao, tơña amăng jơnum lok 7 glăk pơphun ƀơi plơi prong Kon Tum. Bơdjơ̆ nao tơlơi gun anai, hơmâo thâo tơring čar Kon Tum hơmâo lu hră pơ-ar mơ-it nao hơdôm ding jum, gơnong bruă gơnong glông rơkâo črâo ba pơsir hĭ.

Samơ̆ truh ră anai djop ding jum, gơnong bruă ăt aka ƀu hơmâo tơlơi črâo ba tong ten kiăng pơsir hĭ yua anun tơring čar aka ƀu dưi ngă tui hơdră djru braih apiăng brơi hơdôm sang anŏ mut hrŏm pla glai hăng pơđĭ kyar glai rưng rơngiao kơ kyâo pơtâo. Lu tơlơi pơgôp hiăp mơng khua mua Khul pơ ala mơnuih ƀôn sang tơring čar Kon Tum brơi ƀuh, tơlơi črâo trun, hơdră bruă hơmâo laih samơ̆ kaih mut amăng tơlơi hơdip, yua anun glăk bơdjơ̆ nao hơnong pơkă pơđĭ kyar bơwih ƀong huă-mơnuih mơnam kah hăng bruă pơplih tơlơi hơdip mơda kơ mơnuih ƀôn sang.