Bruă ruah mơnuih apăn bruă hơmâo pơphun kjăp phik tui tơlơi pơkă mơng Ping gah, tơlơi phiăn mơng Kơnuk kơna, hơmâo tơlơi tŭ ư, mut hrŏm hloh mơng ƀing khua pơ ala mơnuih ƀôn sang. Ƀirô khua pơ ala mơnuih ƀôn sang dêh čar tŭ yap tơlơi pơtrun kơ bruă ruah pơhrua kơ-iăng khua dêh čar hăng 432/432 čô khua mua dong yua. 3 čô khua hơmâo ruah pơhrua ngă kơ-iăng khua dêh čar hơmâo: Ding kơna Ding jum kơđi čar ơi Nguyễn Hòa Bình, Ding kơna Ping gah, Khua ding jum prăk kak ơi Hồ Đức Phớc hăng Ding kơna Ping gah, Khua ding jum pơtom hiăp ơi Bùi Thanh Sơn. Ruah pơhrua Khua ding jum phiah phiăn hăng ơi Nguyễn Hải Ninh hăng Khua ding jum wai lăng lon mơnai glai čư̆ hăng ơi Đỗ Đức Duy.

Đĭ pohiăp pơđut mông jơnum, pơ ala brơi Ƀirô khua pơ ala mơnuih ƀôn sang, Jơnum min apăn bruă khua pơ ala mơnuih ƀôn sang, Khua git gai pơ ala mơnuih ƀôn sang dêh čar ơi Trần Thanh Mẫn pơpŭ bơni tơlơi git gai kjăp mơng Khul apăn bruă Ping gah, Ding jum kơđi čar, Khul git gai Ping gah, hăng ƀơi anăp lĕ Khua git gai Ping gah, Khua mir sir ơi Tô Lâm kơ bruă prap lui hăng pơphun jơnum. Ƀing khua pơ ala mơnuih ƀôn sang lêng gơgrong, pơčrông sai tơpă, tơlơi pơsit kơ bruă ruah khua mua hơmâo tơlơi tŭ ư amăng abih bang. Khua git gai pơ ala mơnuih ƀôn sang dêh čar lăi pơtong:

“Ƀing ta đăo gơnang, tui tơlơi git gai mơng Ping gah;tơlơi gum hrŏm mơng djop anih anom kơđi čar, djop gưl, gơnong bruă; tơlơi gir run mơng Ping gah, abih bang mơnuih ƀôn sang, khul ling tơhan, anom bơwih ƀong sĭ mơdrô, mơnuih ƀôn sang pơ tač rơngiao, lŏn ia ta amra găn rơgao tơnap tap, tơlơi lông, pơgiong klă hloh djop hơnong pơkă amăng pơđĭ kyar bơwih ƀong huă-mơnuih mơnam, pơgang rơnuk rơnua, bruă pơtom hiăp hăng pơgang, pơgăn hưp ƀong kông ngăn, bruă ngă soh thun 2024, pơgôp ngă truh kih tơlơi pơtrun mơng Jơnum Ping gah đơ đam dêh čar tal 13; prap lui Jơnum Ping gah djop gưl, anăp nao Jơnum Ping gah đơ đam dêh čar tal 14”.

Tơdơi kơ pơđut hĭ mông jơnum, anom bruă Ƀirô khua pơ ala mơnuih ƀôn sang jơnum lăi pơthâo kơ boh than mơng jơnum anai. Khua čih pioh, Khua anom bruă Ƀirô khua pơ ala mơnuih ƀôn sang Bùi Văn Cường brơi thâo: Jơnum ƀu tui tơđar lok 8, Khua pơ ala mơnuih ƀôn sang tal 15 pơđut hiam klă, ƀing khua mua hơmâo ruah pơhrua hơmâo tơlơi dong yua amăng abih bang:

“Khua mir sir tui tơlơi pơtrun mơng gơnong glông amăng blan 10 pơ anăp amra ruah đĭ. Khua ding jum prăk kak amra ngă bruă truh hrơi ruah pơhrua khua ding jum phrâo, Bơ Khua ding jum pơtom hiăp ră anai lĕ kơ-iăng khua dêh čar samơ̆ amra tŏ tui ngă rah Khua ding jum tui mrô dưm dăp ding kơna Kơnuk kơna, akŏ rơ wang mă bruă, tui tơlơi pơtrun mơng Ƀirô khua pơ ala mơnuih ƀôn sang amra ruah 4 čô kơ-iăng khua dêh čar, phrâo rơgao khua pơ ala mơnuih ƀôn sang tŭ ư mơng 4 đĭ 5 čô. Ƀing kơ-iăng khua hơmâo ruah laih, 2 čô kơ-iăng khua dêh čar ruah hlâo anun hăng 3 čô phrâo ruah pơhrua jing 5 čô”.

Khua khul ruah mơnuih apăn bruă ơi Nguyễn Thanh Hải brơi thâo: tui đăo lăng hlâo mơng gơnong glông, mơng anai truh abih thun 2024 amra đing nao ruah pơhrua ƀing khua mua pơprong hăng gưl Ping gah, gong gai djop gưl, kiăng kơtưn amăng bruă git gai mơng Ping gah hăng bruă jao pơđĭ kyar bơwih ƀong huă-mơnuih mơnam, gru grua, pơgang rơnuk rơnua, pơtom hiăp hăng prap lui Jơnum ping gah djop gưl anăp nao Jơnum Ping gah đơ đam dêh čar tal 14. Bruă ruah mơnuih apăn bruă kiăng pơhlôm anih anom kơđi čar klă ƀiă dong; gum pơgôp; mă bruă mut hrŏm; kjăp bruă, tŭ yua hăng hơmâo lu tơlơi gal ƀiă dong, klă tui dong amăng pơđĭ kyar bơwih ƀong huă mơnuih mơnam; hrưn đĭ tơlơi hơdip kơ mơnuih ƀôn sang; kơtưn pơlir hơbit hăng mơnuih ƀôn sang, hơkrŭ pran đăo gơnang mơng mơnuih ƀôn sang hăng Ping gah, kơnuk kơna:

“Ƀing apăn bruă ră anai hơmâo ruah đĭ tui jơlan gah hơmâo mơnuih đĭ, hơmâo trun, hơmâo mut, hơmâo tơbiă tui tơlơi rơkâo bruă jao, tơlơi rơkâo amăng bruă mă hăng tơlơi thâo thăi amăng pơgiong bruă jao mơng rĭm čô mơnuih. Bruă Ƀirô khua pơ ala mơnuih ƀôn sang ruah pơhrua 3 kơ-iăng khua dêh čar, 2 čô khua ding jum hrơi anai, hluai tui tơlơi pơtrun hăng rơbêh 90% djơ̆ hăng tơlơi rơkâo mơng Ping gah, pran đăo gơnang mơng mơnuih ƀôn sang, Ping gah rơkâo, mơnuih ƀôn sang ruah đĭ hơmâo tơlơi dong yua, tŭ ư hrŏm mơng khua pơ ala mơnuih ƀôn sang”./.