Lơ 6/9, ƀơi plơi prong Huê, Sang bruă kơsem min gah bruă Đah kơmơi Việt Nam jơnum pơčrong sai ĕp boh thâo phrâo gưl dêh čar ƀơi kual Tong krah hăng Dap Kơdư, kơ bruă ngă tui tơlơi bơkơnar đah rơkơi hăng đah kơmơi amăng kual mơnuih ƀôn sang djuai ƀiă laih anun kual čư̆ siăng; rơkâo đĭ boh yôm phun, hơdră mă bruă jak iâu djru ba kơ ƀing đah kơmơi mơnuih djuai ƀiă amăng hơdôm thun črăn tŏ tui. Jơnum pơčrong sai ĕp boh thâo phrâo anai hơmâo tŭ mă 70 mơta tơlơi čih mơ̆ng ƀing mơnuih kơhnâo rơgơi hăng ruah mă 39 mơta tơlơi čih pioh dăp hơdră, čih pơkra glăi in amăng hơdôm hră kơ mông jơnum pơčrong anai.

Hrŏm hrŏm hăng bruă kiăng thâo krăn djop tơlơi ječ ameč biă mă hăng ƀing đah kơmơi laih anun čơđai muai djuai ƀiă, kual čư̆ siăng jơnum pơčrong sai hơmâo pơtum lăi nao laih anun čih pioh tơlơi rơkâo bruă khom ngă, hơdră pơsir tŭ yua mơ̆ng Kơčăo bruă mrô 8 thun blan pơ anăp adih. Kơčăo bruă 8 lĕ sa amăng 10 kơčăo bruă amăng Hơdră pơtrun ƀơi dêh čar pioh kơ Khul đah kơmơi Việt Nam pô git gai, wai lăng hăng pơčrâo ba ngă tui. Djop bruă mă pơtum nao kơčăo bruă pơtô pơblang, pôr tơlơi pơhing, jak iâu pơblih tơlơi pơmin kah ania pơpha rơkơi hăng bơnai, kah pơpha anŏ pơpŭ ba đah rơkơi hăng đah kơmơi, akŏ pơjing hăng pok pơhư prong lu hơbô̆ bruă hiam pơpŭ nao rai bơkơnar đah rơkơi hăng đah kơmơi….Mơ̆ng anun, djru hrŏm kiăng pơtrut lu hloh hơdôm tơlơi ngă bơkơnar anŏ lăng ba plah wah đah kơmơi hăng đah rơkơi amăng kual anai.