Tal tơña lăi glăi kơdok kơdor mơtam yơh, yua tơlơi tơña pơkhuer tơpă lăi nao pơkĕ apui lơtrik kơ bruă ngă hmua hăng apui yua amăng sang anŏ. Khua pơ ala ơi Phạm Văn Hòa, grup mơ̆ng tơring čar Đồng Tháp lăi lĕ, bruă jŭ yap rơnoh kah hăng ră anai aka ƀu djơ̆ găl đơi ôh hăng anŏ kiăng mơ̆ng mơnuih ƀôn sang, boh nik ñu rơnoh duh jia 10% juăt duh jia VAT. Khua pơ ala anai rơkâo kơ Khua ding jum tuh tia hăng sĭ mơdrô lăi glăi rơđah kơ tơlơi anai? Khua ding jum ơi Nguyễn Hồng Diên brơi thâo:

“Ding jum Tuh tia hăng Sĭ mơdrô git gai brơi pơblih glăi, pơhrua nao Hră pơtrun 28. Tui hăng anun, amăng hră čih dăp hlâo pơdah đĭ hăng Kơnuk kơna amăng hrơi anai, brơi pơhrŏ trun mơ̆ng 6 yak dŏ 5 yak. Yak blung a yap mơ̆ng 0-50 kwh truh 100 kwh mông apui lơtrik. Tui hăng tơlơi rơkâo mơ̆ng pô pơ ala Phạm Văn Hòa gơmơi čih pioh hăng pơdah đĭ hăng kơnuk kơna, djơ̆ tui hăng pô anun rơkâo”.

Lăi glăi tơlơi tơña mơ̆ng khua pơ ala Dương Khắc Mai, grup mơ̆ng Dak Nông lăi nao kơ anŏ hơđong apui yua, ia jâo tŭi, pơblih yua hăng apui yua pơkra ming glăi, Khua ding jum ơi Nguyễn Hồng Diên lăi:

“Việt Nam hơmâo tơlơi gêh găl prong biă mă pơkra ming apui yua pơkra ming glăi, apui lơtrik pơkĕ hăng jua angin. Yua kơ angin kơtang, phang pơ-iă lu gêh găl. Samơ̆ yua tơlơi gêh găl bơwih ƀong huă hơdră boh thâo ră anai mơ̆ng Việt Nam aka ƀu pơđĭ tui lu ôh rơnoh apui yua ming pơkra glăi aka ƀu dưi pơđĭ tui lu kơtang ôh laih anun hăng tơlơi bơwih ƀong huă ƀơi Việt Nam. Yua kơ apui yua pơkra ming glăi pơkĕ hăng jua angin, pơ-iă yang hrơi, tơdah ñu kơtang đơi lĕ hŭi ƀu pơhlôm rơnuk rơnua lơ̆m pơkĕ apui lơtrik. Tơdah tuh pơ alin nao amăng bruă pơkra ming anih anom pơhrip pioh, răk lui apui; laih anun dăng hrĕ apui ba yua  djơ̆ hnơ̆ng, boh nik ñu bruă yua apui hăng hơdră ia rơgơi phrâo, kiăng pơhlôm rơnuk rơnua hơđong kah dưi”.

Tơña kơ Khua ding jum Bruă hmua hăng Pơđĭ kyar plơi pla ơi Lê Minh Hoan kơ tơlơi pơhing ƀơi Lâm Đồng, tơdơi kơ tlâ̆o jrao vaccine pơgang klin bơbrah atông ƀơi klĭ, hơmâo 6.631 drơi rơmô brung djet ia tosâo ruă kian pơčroh hăng 357 drơi djai, khua pơ ala ơi Trịnh Tú Anh, grup pơ ala mơ̆ng tơring čar Lâm Đồng rơkâo:

“Khua ding jum lăi pơthâo tong ten hơdră pơkra ming ia jrao pơgang vaccine tlâ̆o pơgang hŭi klin bơbrah atông ƀơi klĭ rơmô laih anun bruă sem glăi pơsit ia jrao anai hiư̆m pă pơdjơ̆ nao kơ rơmô brung. Laih dơ̆ng hăng tơlơi răm ƀăm anun rơkâo pơsir brơi tañ, pơtong rơđah hlơi pô gơgrong, glăm ba hăng hơmâo hơdră djru glăi kơ mơnuih ƀôn sang rơngiă rơngiom, kiăng pơhlôm brơi bruă mă tơlơi hơdip mơda kơ mơnuih ƀôn sang”.

Tui hăng Khua ding jum ơi Lê Minh Hoan lĕ ră anai, Ding jum hlăk pơtum abih bang ƀing rơgơi kơhnâo, nai ia jrao pơjrao hlô mơnong mơ̆ng dua kual gah dơnung hăng ƀơi dêh čar mơtam, hơdôm čô dŏ mă bruă dŏ glăi ƀơi anih hơmâo tơlơi pioh krăo lăng, pơjrao brơi phung rơmô ruă:

“Sit lăi răm ƀăm laih khom hơmâo glăi hơdră djru. Ƀing gơmơi ăt amra ngă hrŏm tơring čar Lâm Đồng pơblang rơđah, prăp lui hơdră djru lăp djơ̆ kơ mơnuih ƀôn sang. Gơmơi git gai dua mơta boh yôm phun tui anai: Sa lĕ, hlăk sem lăng, tơña pơñen kơ hơdră pơkra ming ia jrao pơgang, čih anăn rơkâo ba yua sĭ mơdrô, truh pơ tlâ̆o vaccine pơgang anai. Kiăng thâo tong ten truh pơ rơnuč ñu yua kơ hơgĕt, ƀing ta ĕp glăi tơlơi hrăm kơ ƀing ngă bruă sĭ mơdrô anom pơkra ming ia jrao hăng djop sang bruă kơnuk kơna pô git gai wai lăng mơ̆ng gơnong dlông truh pơ tơring čar, kiăng huăi hơmâo glăi tơlơi truh răm ƀăm djơh hăng anai dơ̆ng kơñ pơgi”.

Hơdră pơđĭ tui rơnoh kơ gơnam đang hmua, djru ngă hơđong sĭ mơdrô, pơđĭ tui rơnoh pơhrui glă kơ mơnuih ƀôn sang lu khua mua pơ ala đing nao. Khua ding jum ơi Lê Minh Hoan lăi lĕ, kiăng pok pơhai ngă tui Hră pơtrun mơ̆ng anom bruă khua pơ ala mơnuih ƀôn sang dêh čar, jao Kơnuk kơna ngă hră pơtrun kơ čih anăn gơnam sĭ mơdrô anăn ia jrao kiăng hơdôm anih pơkra ming, anih pơjing rai gơnam sĭ mơdrô boh troh mơ̆ng đang hmua khom pơhlôm djơ̆ anŏ hiam klă tŭ yua gơnam sĭ mơdrô:

“Kiăng ngă tui anun lĕ, ƀing ta khom hơmâo anih pla pơjing sa ƀut, ngă tui djơ̆ tơhnal pơkă kơ abih bang gơnam sĭ mơdrô mơ̆ng đang hmua, ngă gơnam sĭ mơdrô phun kơ dêh čar. Klâo lĕ hrŏm hăng khul wai lăng gơnam sĭ mơdrô čih pơkra tơlơi phiăn pơkă kiăng pơhlôm rup rap gơnam sĭ mơdrô boh troh đang hmua Việt Nam ƀing ta dưi hyu sĭ mơdrô pơ jar kmar. Ding jum Bruă hmua hăng Pơđĭ kyar plơi pla hăng Ding jum wai lăng tua tia hăng Sĭ mơdrô hlăk rơkâo đĭ hăng Khua dêh čar khom akŏ pơjing khul pơsit braih pơdai dêh čar. Tơdơi kơ anun ăt kơsem min dơ̆ng mơ̆n hăng lu boh troh gơnam pơkŏn mơ̆ng đang hmua kah hăng boh sầu riêng, kơphê, tiu…”.

 Pơđut mông tơña lăi glăi amăng 3 mơta bruă mă: ngă hmua hăng pơđĭ kyar plơi pla, bruă tuh tia pơkra pơjing hăng sĭ mơdrô; bruă gru grua hiam, pơrơguăt drơi jăn hăng tuai čuă ngui, Kơ-iăng Khua pơ ala mơnuih ƀôn sang dêh čar ơi Nguyễn Đức Hải lăi pơtong, jơnum tơña hăng lăi glăi ƀuh kơdok kơdor mơtam yơh, tơlơi gơgrong glăm ba, tơpă hnơ̆ng hăng djru pơgôp hiăp mơak ƀu hơmâo tơlơi jăm ƀuah ôh. Jơnum min apăn bruă phun pơ ala mơnuih ƀôn sang lăng yôm biă mă ƀing khua ding jum, anom bruă ƀơi gơnong dlông lăi glăi, hơmâo prăp lui tơlơi či lăi glăi hơdôm tơlơi mơnuih pơ ala tơña; tơlơi mơnuih ƀôn sang đing nao; lăi glăi, pơblang rơđah, tong ten hơdôm tơlơi dưi ngă, bruă aka ƀu dưi pơsir. Laih dơ̆ng, čih pioh hăng bơni mơ̆n tơlơi gir run mơ̆ng ƀing khua ding jum amăng bruă pok pơhai, ngă tui djop hră pơtrun mơ̆ng Jơnum min apăn bruă phun pơ ala mơnuih ƀôn sang dêh čar hăng rơkâo đĭ hăng lu mơta bruă kiăng pơsir khŏp djop tơlơi dŏ kơƀah amăng tơlơi dưi git gai wai lăng mơ̆ng ñu./.