Khua git gai Ping gah dêh čar ơi Nguyễn Phú Trọng lĕ sa čô mơnuih Cộng sản hơdip tơpă sit, khua git gai rơgơi kơhnâo, mơnuih lơm pơhiăp hăng ngă mơtăm, lăng mơnuih ƀôn sang lĕ phun, gir run ngă bruă kiăng ba glăi tơlơi dưi brơi mơnuih ƀôn sang; lêng kơ hơdip jê̆ giăm mơnuih ƀôn sang, hăng pran jua hơdip hiam klă.

“Lŏn ia ta aka ƀu hơmâo lu tơlơi dưi hăng kơdrưh ang amăng jar kmar kar hăng ră anai, anai lĕ hơdôm tơlơi gêh gal kiăng yak nai kjăp tui jơlan gah mơ̆ Ping gah, mơnuih ƀôn sang hăng wa Hô kiăng khăp ruah”.

Anai lĕ tơlơi pơsit tong mơng Khua git gai Ping gah dêh čar ơi Nguyễn Phú Trọng amăng jơnum lok I Khul apăn bruă Ping gah tal XIII hăng amăng lu mông jơnum yôm phăn lơm Khua git gai Ping gah nao jơnum hăng hơmâo hơdôm tơlơi pơhiăp git gai yôm phăn. Ƀu djơ̆ tô̆ tơnô̆ mơ̆ Khua git gai Ping gah hơmâo lăi pơtong kơ tơlơi anai lơm tui tơlơi sit nik brơi ƀuh, tơdơi kơ giăm 40 thun pơphun pơplih phrâo, mơng sa boh lŏn ia rin rơpa, hơmâo gơnam măi mok-boh thâo ia rơgơi, anih anom bơwih ƀong huă-mơnuih mơnam dŏ sô hơđăp, aka ƀu klă, truh ră anai, Việt nam hơmâo hrưn đĭ jing dêh čar glăk pơđĭ kyar, hơmâo prăk pơhrui đĭ ƀiă; gru grua, mơnuih mơnam tŏ tui pơđĭ kyar, tơlơi hơdip mơda kơ mơnuih ƀôn sang hơmâo pơplih phrâo; bruă pơjing Ping gah hăng anih anom kơđi čar dưi pơplih klă tui dong; pơhlôm gum pơgôp djop djuai ania ƀu pơdơi hơkrŭ kjăp; bruă kơđi čar, mơnuih mơnam hơđong, pơhlôm wai pơgang rơnuk rơnua, ngă pô; kơdrưh ang mơng lŏn ia jai hrơi hrưn đĭ amăng jar kmar.

“Ta lĕ ană tơčô wa Hô, Ping gah lĕ Ping gah Cộng sản Việt Nam, djuai ania lĕ djuai ania Việt Nam, lŏn ia ta amra pơđĭ kyar tañ, hăng huăi dŏ glăi gah tlôn pơhmu hăng hơdôm boh dêh čar pơkŏn, anăm kiăo tui tlôn kơ hlơi ôh, ƀing ta kiăng pơsit tong tơlơi gơgrong anih pran tui anun”.

Kiăng ba lŏn ia ta tŏ tui pơđĭ kyar bơkơnar hăng hơdôm boh dêh čar djop kual rŏng lŏn tơnah tui tơlơi čang rơmang mơng wa Hô, tui Khua git gai Ping gah dêh čar rơngia kơ pran mut hrŏm mơng djop anih anom kơđi čar hăng abih bang mơnuih ƀôn sang đơ đam dêh čar ăt kiăng biă mă bruă ruah mơnuih apăn bruă. Nao jơnum hăng đĭ pơhiăp amăng mông git gai jơnum blung a mơng Kơnuk kơna rơwang thun 2021-2026, Khua git gai Ping gah dêh čar ơi Nguyễn Phú Trọng rơkâo, ngă klă ƀiă dong bruă ruah mơnuih apăn bruă Ping gah, sit biă ñu amăng wai lăng, pơsit tong glăi ƀing apăn bruă kiăng kơ ruah, dưm dăp djơ̆ mơnuih thâo rơgơi; lĕ ƀing mơnuih hơdip tơpă sit, abih pran jua amăng bruă mă; gir run abih pran yua kơ lŏn ia, yua mơnuih ƀôn sang amăng hơdôm anih anom git gai wai lăng amăng Kơnuk kơna hăng gong gai djop gưl. Khua git gai Ping gah dêh čar pơtă pơtăn:

“Anăm “lăng mơnŭ kar kơčong”, “anăm lăng mriah pơmĭn tơsă”, anăm lê̆ pran amăng hơdôm tơlơi dưi sat răm, hơdôm bruă mă soh glăi. Gir run pơgăn hĭ ƀing mơnuih sat răm, tơdu amăng bruă kơđi čar, tơlơi hơdip; pơgăn hĭ abih hơdôm bruă đĭ bruă hơgŏm, pơđĭ brơi ƀing mơnuih amăng sang anŏ, kơnung djuai, ƀing mơnuih ƀu pơhlôm djop hơnong pơkă”.

Bơ amăng mông pok pơphun jơnum lok 1, Khua pơ ala mơnuih ƀôn sang dêh čar tal XV amăng lơ 20/7/2021, pơsit tong lĕ anom bruă prong hloh kơ mơnuih ƀôn sang, anom bruă prong hloh amăng dêh čar Cộng hòa xã hội chủ nghĩa Việt nam, Khua git gai Ping gah dêh čar ơi Nguyễn Phú Trọng rơkâo, Khua pơ ala mơnuih ƀôn sang dêh čar kiăng tŏ tui tơlơi dưi hăng tơlơi găn rơgao amăng 75 thun rơgao, tŏ tui pơplih phrâo, hrưn đĭ klă dong hăng ba glăi tŭ yua amăng bruă mă kiăng lăp djơ̆ hăng tơlơi rơkâo, bruă kơđi čar amăng lŏn ia amăng rơwang phrâo. Tơdah kiăng dưi tui anun Khua git gai Ping gah dêh čar ơi Nguyễn Phú Trọng ăt ƀu wơr pơtă pơtăn tui anai:

“Abih bang Khua pơ ala mơnuih ƀôn sang dêh čar rơwang mă bruă tal anai kiăng tŏ tui pran gơgrong, abih pran yua kơ lŏn ia, yua kơ mơnuih ƀôn sang, pơgôp djru kơ lŏn ia, djru mơnuih ƀôn sang, pơhrăm pô na nao, djă pioh gru hơdip hiam klă amăng djop mơta, jê̆ giăm hăng đing tơngia hmư̆ mơnuih ƀôn sang, ngă tui hăng pơgiong klă hloh bruă jao mơ̆ mơnuih ƀôn sang jao”.

Hơdôm tơlơi pơhiăp, pơtă pơtăn glăi mơng Khua git gai Ping gah dêh čar ơi Nguyễn Phú Trọng-mơnuih Cộng sản hơdip tơpă sit, khua git gai rơgơi kơhnâo, mơnuih pơhiăp amra ngă mơtăm, lăng mơnuih ƀôn sang lĕ phun, hơnong pơkă bruă mă, lăng tơlơi dưi kơ mơnuih ƀôn sang lĕ hơnong pơkă gir run, lêng kơ jê̆ giăm mơnuih ƀôn sang hăng pran jua hơdip hiam klă./.