Mơneč mă mông pơdơi yang hrơi dong, Trung tá Y Dhăm Byă, Kơ-iăng khua Kông an să Quảng Phú, tơring čar Dak Lăk, mơgăt rơdêh thut nao pơ ƀuôn Ea Mắp. Ñu tui nao truh pơ sang tha plơi Y Lưng Êban, mơnuih ană plơi kơnang, ăt jing Khua grup rơnuk rơnua hơđong plơi pla, či pơhiăp tom, pơčrông bruă mă, thâo tơlơi rơnuk rơnua amăng plơi pla hiưm pă hlâo kơ hrơi pơdơi prong Akŏ pơdong Kơnuk kơna.

Tơdơi kơ ha thun laih, hơdôm mông bơbưp djơ anai hơmâo ngă re se yơh. Ƀu tơguan hrơi kiăng wai lăng plơi pla kơtang hloh ôh, Trung tá Y Dhăm hăng ơi Y Lưng ăt pơhiăp tom na nao laih kiăng thâo djŏp bruă hơmâo amăng plơi, amăng ƀon. Ơi Y Lưng lăi:“Y Dhăm jing pô jê̆ giăm hăng ană plơi laih, biă ñu mơ̆ng hrơi pơmut hrŏm hăng ngă tui gong gai dua gưl. Ñu juăt mut rai pơ plơi anai kiăng thâo tơlơi hơdip mơda, tơlơi rơnuk rơnua hiưm pă, biă ñu lĕ ƀơi sang jơnum đăo, pơhmư̆ bruă mă mơ̆ng khul đăo tui tơlơi phiăn mơn hă. Lơ̆m ñu nao sem lăng tui anun kâo kiăo tui mơn, gum pơblang brơi hăng pơtô lăi ană plơi”.

Mơ̆ng bruă bơbưp hăng tha plơi, tơlơi pơhing kơ tơlơi hơdip, tơlơi kiăng khăp mơ̆ng mơnuih ƀôn sang hơmâo mơit glăi kơ kông an să. Lơ̆m hơmâo bruă hơget thơ, mơnuih ană plơi kơnang hrŏm hăng gong gai, kông an să bưp hlao ƀơi anăp, pơblang glăi, iâu pơthưr, lui hĭ bruă ƀu mơak, bơrơdjơ̆ pơsao sui đơi.

Hơdră ngă bruă anai tŭ yua biă ƀơi ƀuôn Ea Mắp amăng bruă pơsir hĭ bruă bơdjơ̆ nao tơlơi đăo. Sui mơ̆ng anai năng ai 7 thun, hơmâo hơdôm boh sang anŏ nao đăo ƀu djơ̆ tơlơi phiăn ôh. Kông an să Quảng Phú ngă hrŏm hăng ping gah, gong gai, tha plơi hăng mơnuih ană plơi kơnang bơbưp, pơtô lăi kiăng ană plơi thâo hluh hăng ngă djơ̆ tơlơi phiăn. Rơbêh 200 čô mơnuih tơdơi kơ anun pơwơ̆t glăi jơnum tui đăo djơ̆ tơlơi phiăn laih.

 Pô pơtô đăo Y Nuer Bdap, Wai lăng Khul đăo Lutheran ƀuôn Ea Mắp brơi thâo, gong gai hăng tơhan kông an juăt nao hiăp tom, pơtô brơi kiăng bruă jơnum djơ̆ tơlơi phiăn kơnuk kơna. Ră anai, hơbô̆ bruă “Tơlơi đăo kjăp phik - plơi pla rơnuk rơnua”, glăk hơmâo ngă tui amăng plơi, anăp nao plơi pla tui đăo gum pơgôp, hơdip klă, đăo hiam, hơdip kiăo tui tơlơi phiăn, hăng gum bong kjăp rơnuk rơnua plơi pla: “Neh met wa tui đăo hok mơak biă mă lơ̆m sit nik hơmâo kơnuk kơna tŭ ư, brơi jơnum ƀơi sa anih. Abih bang lêng iâu pơthưr, pơtô lăi ƀing gŏp hmư̆ tui tơlơi pơtô ba mơ̆ng gong gai, triang bruă mă, bơwih ƀong huă. Lơ̆m hơbô̆ bruă “Tơlơi đăo kjăp phik, plơi pla rơnuk rơnua” ba pơƀuh, mơnuih ƀôn sang hơmâo bưp ƀơi anăp, jê̆ giăm hloh hăng gong gai mơ̆ng să truh pơ tơring čar. Mơnuih nao đăo jing hơ’et pran jua laih”.

Tơdơi kơ pơmut hrŏm, să Quảng Phú (tơring Dak Lăk) hơmâo 37 boh plơi, ƀon hăng giăm 62 rơbâo čô, amăng anun hơmâo 9 boh plơi leng kơ djuai ania Êđê hơdip mơda. Plơi pla prong, ană plơi hai lu phung djuai mơn, bruă đăo, ngă yang phara mơn, anun jing bruă bong kjăp rơnuk rơnua amăng plơi khŏm kiăng ƀing apăn bruă, ƀing khua thâo kjăp mơn, thâo hluh tơlơi dŏ dong ƀong huă mơ̆ng neh met wa.

Jing mơnuih djuai ania Êđê, hơmâo pơtô rơguăt bruă wai lăng rơnuk rơnua, Trung tá Y Dhăm Byă gêh găl mơn yua dah ñu thâo pơhiăp tơlơi Êđê hăng thâo hluh gru grua, tơlơi phiăn neh met wa. Kiăng thâo rơđah djŏp anŏ hơmâo amăng plơi pla hăng pơsir brơi bruă hơmâo mơ̆ng plơi, ñu juăt nao mơ-ai pơ plơi pla, bưp mơnuih ƀôn sang, ƀing tha plơi, mơnuih ană plơi kơnang hăng hơduah ĕp phun tơhnal bruă rung răng. Trung tá Y Dhăm Byă brơi thâo, mơ̆ng tơlơi hmư̆ hing, tơhan kông an thâo ĕp jơlan pơsir brơi hlao hơdôm bruă hơmâo mơ̆ng plơi pla, ƀon ƀut:“Ta khŏm nao rai, hiăp tom ană plơi na nao, pơhmư̆ anŏ hơget gơñu kiăng, laih dong lăi glăi tơlơi pơtrun mơ̆ng ngŏ kiăng ană plơi ñu thâo, ngă tui djơ̆ hăng tơlơi phiăn. Ta ăt khŏm jê̆ giăm ană plơi, tơña bla, hiăp tom pô ană plơi ñu kơnang, ƀing tha plơi, ƀing khua đăo, kiăng thâo hluh djŏp mơta, mơ̆ng anun pôr pơthâo kơ abih bang mơnuih ngă tui tơlơi pơtrun klă hloh”.

Ƀơi hơdôm boh plơi pla hơmâo tơlơi hơdip gru grua, tơlơi đăo, tơlơi ngă yang phara, bong kjăp rơnuk rơnua hơmâo mơ̆ng bruă jê̆ giăm, đăo kơnang nao rai. Hăng Trung tá Y Dhăm Byă, anun jing hơdôm wơ̆t ñu trun nao pơ plơi, bưp ƀing tha, mơnuih ană plơi kơnang, pơhmư̆ mơnuih ƀon sang lăi, mơ̆ng anun thâo hăng pơsir brơi kơđi hơmâo mơ̆ng plơi pla mơtăm. Hơdôm bruă ngă anun djru ƀing khua, mơnuih apăn bruă kơnuk kơna jê̆ giăm hloh hăng mơnuih ƀôn sang. Rup mơnuih ngă bruă čar mơneč mă mông pơdơi yang hrơi dong či tui nao pơ sang tha plơi ăt jing sa tơlơi hrăm hăng hla tui Wa: giăm ană plơi, trun nao tơl plơi pla, kiăng bong kjăp rơnuk rơnua mơ̆ng rim boh plơi pla./.