Jao bruă wai lăng hơmâo lăng jing boh pơkhoă či pơđĭ tui boh tŭ yua mă yua tơlơi phiăn gah bruă ngă hmua, biă ñu ƀơi hơdôm boh tơring čar hơmâo kual ngă hmua pơkra gơnam prong. Ơi Phạm Văn Hòa, Grup pơ ala mơ̆ng Đồng Tháp, lăi bruă jao tơlơi dưi pơsir bruă kơ tơring čar amăng wai lăng gơnam čem rông jing bruă kiăng biă, djru plai ƀiă rơngiă mông ngă hră pơ-ar, glăm bruă kơtang hloh mơn:

“Kâo kiăng jao glăi tơlơi gơgrong bruă kơtang kơ tơring čar mơtăm, kơ bruă pơhrui, brơi hră dưi pơkra gơnam čem hlô rông, ƀu kiăng Ding jum ôh ngă. Jao kơ Khua jơnum min mơnuih ƀôn sang tơring čar dưi pơkra brơi hră, mă glăi hră dưi yua, tơdah anih pơkra djơ̆ hăng tơlơi pơkă lĕ tơring čar yơh gơgrong ba”.

Mah hnun, hrŏm hăng bruă jao tơlơi dưi pơsir, lu khua lăi kiăng pơđĭ tui tơlơi rơgơi, mơnuih mă bruă rơgơi amăng plơi pla, biă ñu lĕ anom bruă pơjrao hlô rông ƀơi ƀôn lan, anih glăk kơƀah mơnuih mă bruă tơdơi kơ dăp glăi anom bruă kơnuk kơna. Yă Chu Thị Hồng Thái, grup khua mơ̆ng Lạng Sơn lăi rơđah anŏ aka ƀu găl amăng anom bruă pơjrao hlô rông lơ̆m lu să, phường ƀu hơmâo dong tah ƀing apăn bruă, lơ̆m anun amăng tơlơi phiăn jao thim bruă pơgang klin kheng kơ gưl să dong. Ƀing khua kiăng hơmâo tơlơi pơkă rơđah rơđông hăng khŏm ngă kơ bruă prăp rơmet mơnuih pơjrao hlô rông ƀơi hơdôm boh tơring, pơhlôm tŭ yua pơgang klin kheng amăng bruă rông hlô:

“Hăng tơlơi phiăn pơjrao hlô jing kâo hơmâo tơlơi rơkâo lĕ anom čih pơkra tơlơi phiăn hăng anom pel ĕp ăt kơsem min mơn či ba tơbiă tơlơi pơkă lĕ hơdôm boh tơring khŏm hơmâo mơnuih pơjrao hlô rông. Hăng hơdôm tơlơi pơkă amăng tơlơi phiăn anai kâo lăng hơmâo lu bruă mă gah pơjrao hlô rông mơ̆ng gưl tơring glông hơđăp jao kơ gưl să mơ̆ hlâo adih hơmâo anom bruă pơjrao hlô pơ tơring glông dong. Bơ ră anai ƀu hơmâo dong tah ƀing anai, jing glăi pơ sang să hlơi pô ngă?”

Sit nik brơi ƀuh, bruă pơjrao hlô dưi pơhmu “jing amăng tơngia, jing mơta, jing tơkai” mơ̆ng anom bruă rông hlô, pơjrao hlô, tơdah kơƀah amra hơmâo anŏ hông amăng bruă krăp lăng klin kheng. Yua hnun, bruă jao bruă mă khŏm nao hrŏm hăng pơtô brơi tong ten kơ mơnuih mă bruă, hơnong pơkă hăng tơlơi gơgrong mơ̆ng gong gai ƀôn lan.

Hrŏm hăng anun, yă Nguyễn Thị Sửu, grup pơ ala mơ̆ng Ƀôn prong Huế lăi: Jao tơlơi dưi ngă bruă kơtang kơ tơring čar kiăng pơlir hăng tơlơi phiăn črâo bruă ha amăng plĕ, kiăng pơhlôm dưm kơnar, huăi bơrơkua mơnuih dưi pơsir, biă ñu lĕ amăng bruă tơjŭ pla hăng ngă hmua hơdjă.

“Lơ̆m pơmut hrŏm dua Ding jum bruă hmua hăng ayuh hyiăng, ƀing ta kiăng pơsit hrŏm sa hơnơ̆ng anom bruă git gai či wai lăng bơbruai mơ̆ng Gơnong dlông truh pơ tơring čar ƀôn prong. Kâo kiăng akŏ pơdong Anom kah pơpha bruă dêh čar kơ Ngă hmua hơdjă Hữu cơ hăng Sinh học, ngă phun či črâo bruă ha amăng plĕ, hŭi kơ rim boh tơring drơi pơ ngă, ƀu dưm kơnar hăng ƀu tŭ yua”.

Hơdôm tơlơi pơgôp hiăp mơ̆ng ƀing khua brơi ƀuh tơlơi djơ̆ hrŏm: Jao tơlơi dưi kơ gưl ngă bruă ƀu djơ̆ jao tơlơi dưi pơsir bruă đôč ôh ăt jao tom bruă kah pơpha, git gai, krăo lăng hăng gơgrong bruă. Lơ̆m tơring čar hơmâo pơđĭ tui tơlơi jao bruă, nao hrŏm lĕ khŏm thâo ngă bruă, mrô hră pơ-ar khŏm djơ̆ hrŏm, tơlơi phiăn wai lăng rơđah rơđông kiăng pơhlôm tŭ yua sit nik.