Pơ ala Kơnuk kơna, Khua ding jum pơtô pơjuăt ơi Nguyễn Kim Sơn pơđok hră lăi pơthâo hơdră bruă tuh pơ alin Jơlan hơdră tui hơnong pơkă dêh čar pơplih phrâo, hrưn đĭ klă dong amăng pơtô pơjuăt rơwang thun 2026-2035 hơmâo abih tih ngăn rơnoh jak iâu pơgôp kiăng ngă tui Jơlan hơdră rơwang thun 2026-2035 giăm 580.000 klai prăk.

Ĕp lăng boh tơhnal anai, Jơnum min apăn bruă Khua pơ ala mơnuih ƀôn sang dêh čar  rơkâo anom bruă čih pơkra kiăng kơsem min, jŭ yap glăi tong ten hơdôm tơlơi gal, pơhlôm ngă tui hơnong pơkă truh thun 2030 hơmâo 30% sang bruă pơtô čơđai anet, pơtô gưl tlâo ba tơlơi hrăm Angle jing tơlơi hrăm mrô dua hăng đĭ tui truh 100% amăng thun 2035.

Bơdjơ̆ nao kơ ngăn rơnoh tum pơƀut glăi kiăng ngă tui jơlan hơdră amăng djop rơwang 10 thun mơng thun 2026-2035 giăm rơbêh 580 rơbâo klai prăk tui hră mơ-it nao Kơnuk kơna, Jơnum min apăn bruă Khua pơ ala mơnuih ƀôn sang dêh čar rơkâo kah mă yua prăk djơ̆ hơnong pơkă hăng pơhlôm bruă jao prăk, pơhlôm brơi djơ̆, tŭ yua. Sem lăng bruă pơtum pơƀut ngăn rơnoh mơng gah rơngiao kiăng bĕ hĭ ngă kơtrâ̆o amăng ngăn drăp, pơtrut kơtang tuh pơ alin tui jơlan gah ngă hrŏm hrŏm kơnuk kơna hăng mơnuih ƀôn sang PPP amăng man pơdong anih anom, tuh pơ alin blơi gơnam măi mok.

Pơgôp hiăp amăng jơlan hơdră, Khua git gai pơ ala mơnuih ƀôn sang dêh čar ơi Trần Thanh Mẫn rơkâo kiăng hơmâo tơlơi lăng nao sui pơ anăp, đăo lăng hlâo kơ tơlơi yak nao pơđĭ kyar mơng mơnuih mơnam, anih anom mă bruă kơñ pơgi, rơkâo kơ boh thâo, tơlơi thâo thăo kiăng pơhlôm dưi ngă bruă phrâo hăng boh tŭ yua sui pơ anăp, bruă kah pơpha; đing nao hơdôm bruă akŏ phun, ječ ameč anun lĕ pơplih mrô, pơgô brơi mă bruă klă hloh, pơtô hrăm brơi kual ataih, asuek, kual mơnuih djuai ania ƀiă.

Hrŏm hăng anun kiăng thâo rơđah hơnong pơkă hăng ngăn rơnoh mơng jơlan hơdră honong pơkă dêh čar hăng hơdôm jơlan hơdră, akŏ bruă juăt ngă mơng Ding jum pơtô pơjuăt; pơsit tong ƀing mơnuih tŭ mă, đing nao kual tơnap tap, kual mơnuih djuai ania ƀiă, sang hrăm čơđai anet, pơtô pơjuăt gưl prong, kiăng hơmâo ngăn rơnoh mă yua lăp djơ̆. Khua git gai pơ ala mơnuih ƀôn sang dêh čar ơi Trần Thanh Mẫn rơkâo:

“Čih pơkra tơhnal pơkă pơhưč kiăng pơsur hơdôm anom bơwih ƀong sĭ mơdrô, hơdôm khul grup, ƀing mơnuih mut hrŏm tuh pơ alin amăng bruă pơtô pơjuăt. Kâo kiăng lăi nao tơlơi yôm anai lĕ ƀing ta dŏ tơguăn nao ngăn drăp kơnuk kơna ăt ƀu djop ôh, mơ̆ kiăng ngă hiưm pă hơmâo hơdră ngă hrŏm kơnuk kơna hăng mơnuih ƀôn sang PPP amăng man pơdong anih anom, tuh pơ alin blơi gơnam măi mok. Hơmâo lu sang hră tuh pơ alin mơng gah rơngiao, kiăng ƀing čơđai dêh čar ta huăi nao hrăm pơ tač rơngiao. Tơdah ngă klă, ƀing čơđai pơ anăp anai huăi rơngiă lu prăk kak nao hrăm hră”.

Hơmâo thâo, amăng jơnum lok 10, Khua pơ ala mơnuih ƀôn sang dêh čar amra pơplih pơkra bruă dưm dăp djop dêh čar rơwang thun 2021-2030, anăp nao truh thun 2050, amăng anun hơmâo hơdôm boh tơhnal dưi ngă tui hơdôm tơlơi črâo trun mơng Ping gah, kơnuk kơna kơ bruă pơtô pơjuăt, tui Khua git gai pơ ala mơnuih ƀôn sang dêh čar kiăng pơhlôm pơlir hơbit kơplah wah jơlan hơdră hăng bruă dưm dăp djop dêh čar hăng hơdôm tơlơi phiăn bơdjơ̆ nao; laih dong rơkâo pơmut hrŏm 3 jơlan hơdră kiăng kơ bĕ hĭ bơdjơ̆ nao rai kơ anih tuh pơ alin, boh tơhnal tuh pơ alin, tŏ tui ha amăng plĕ ba glăi tŭ yua. Sa wŏt dong Khua git gai pơ ala mơnuih ƀôn sang dêh čar čang rơmang, jơlan hơdră anăm ngă raih daih mơ̆ đing nao hơdôm bruă akŏ phun, ječ ameč.

Kơ-iăng Khua git gai pơ ala mơnuih ƀôn sang dêh čar ơi Nguyễn Khắc Định tŭ ư hăng bruă kiăng ngă ba tơbiă jơlan hơdră hăng brơi thâo jơlan hơdră tui hơnong pơkă dêh čar lĕ hơdôm bruă prong amăng dêh čar, kiăng đing nao tuh pơ alin kiăng pơplih kơtang amăng sa rơwang.

“Amăng anai kâo ƀuh hơmâo tlâo mơta tơlơi pơplih kơtang: sa lĕ man pơdong anih anom, dua dong lĕ boh thâo măi mok hăng pơplih mrô, tlâo dong lĕ bruă pơtô hrăm tơlơi Angle. Samơ̆ kâo ƀuh hơmâo sa, dua tơlơi aka ƀu lăi nao amăng anai. Anun lĕ hơdôm tơlơi pơtrun, ƀing ta juăt lăi lĕ pơtô hrăm brơi ană mơnuih kiăng pơđĭ kyar djop mơta. Samơ̆ ƀing čơđai sang hră đa aka ƀu thâo luai ia. Pơtô boh hră kiăng hrŏm hăng pơtô jing mơnuih hăng pơtô brơi bruă mă. Ƀing hlăk ai čơđai ngă tui rơma mơta tơlơi wa Hô pơtô: Khăp kơ lŏn ia, khăp kơ ană plơi pla, gir hrăm hră, gir mă bruă. Samơ̆ bruă hrăm hră đa hơmâo čơđai thâo, đah ƀu thâo, samơ̆ mă bruă ăt ƀu aka ƀu klă ôh”.

Yua anun, tui kơ-iăng Khua git gai pơ ala mơnuih ƀôn sang dêh čar ơi Nguyễn Khắc Định, hrŏm hăng bruă pơtô boh hră, pơtô jing mơnuih ăt kiăng dưm dăp glăi hơdôm boh sang hră kiăng pơhlôm brơi hơdôm boh sang hră dưi pơphun hơdôm bruă pơkŏn dong lăp djơ̆ tơlơi rơkâo pơtô hrăm djop mơta brơi ƀing čơđai.

Lăi glăi hơdôm bruă ƀing ding kơna Jơnum min apăn bruă Khua pơ ala mơnuih ƀôn sang dêh čar lăi, Khua ding jum pơtô pơjuăt Nguyễn Kim Sơn brơi thâo, kơ ngăn rơnoh ngă tui jơlan hơdră, lơm ĕp lăng lu wŏt, jŭ yap mă yua prăk kak, Ding jum prăk kak kiăng kơ jŭ yap djop ngăn rơnoh hăng Kơnuk kơna hơmâo mơ-it Ƀirô Khua pơ ala mơnuih ƀôn sang dêh čar kiăng đing nao bruă pơhlôm djop ngăn rơnoh.

“Kơ bruă pel ĕp glăi hơdôm boh tơhnal kơplah wah tơlơi phiăn, ngăn drăp yôm phara amăng jơlan hơdră tui hơnong pơkă. Ƀing gơmơi pel ĕp, samơ̆ tơlơi anai kơnong kiăng hơmâo djop ngăn rơnoh kiăng pok pơhai hơdôm boh tơhnal tui jơlan gah amăng tơlơi pơtrun mrô 71. Pơhmutu tơlơi pơtrun mrô 71 hơmâo pơsit brơi hơdră bruă phara anai”.

Hơdôm tơlơi pơgôp hiăp amăng jơnum lok 51 brơi ƀuh hơdôm boh tơhnal amăng jơlan hơdră tui hơnong pơkă dêh čar kơ pơplih phrâo pơtô pơjuăt amăng rơwang thun 2026-2035 glăk hơmâo lu tơlơi đing nao mơng mơnuih ƀôn sang: Boh tŭ yua amăng mă yua ngăn rơnoh rơbêh 580 rơbâo klai prăk, bruă ngă tui hơdôm hơnong pơkă anun lĕ pơtô tơlơi Angle, pơplih mrô, ƀudah pơhlôm anih anom hăng gơnam măi mok, tơlơi pơtô hrăm brơi djop mơta kơ ƀing čơđai./.