Să kual čư̆ siăng Khánh Sơn, tơring čar Khánh Hòa hơmâo giăm 12 rơbâo čô mơnuih, jing hơmâo rơbêh 8.500 čô mơnuih djuai ania Raglai. Ơi Cao Minh Khánh, Khua ping gah să Khánh Sơn, brơi thâo, 5 thun rơgao sang anŏ rin pơ anai trun tañ biă, samơ̆ ăt dŏ mơn rơbêh kơ 20%, prăk pơhrui yap tui akŏ mơnuih kơnong hơmâo 30 klăk/thun. Hăng lu hơdră djru lăp djơ̆ glăk hơmâo ngă, bruă ngă hmua pơkra gơnam mơ̆ng neh met wa đĭ tui laih:“Hơdôm jơlan hơdră bơwih ƀong huă kual čư̆ siăng phrâo rơgao hơmâo ngă ƀơi lu anih laih, neh met wa hơmâo tŭ mă djŏp tơlơi gêh gal. Mah hnun, nao dlăm, nao giăm hăng neh wa ăt ƀuh mơn hơdôm boh sang aka ƀu dưi ngă tŭ yua ôh jơlan hơdră anai. Bơ lu mơnuih lĕ ngă klă laih hơdôm jơlan hơdră djru laih anun pơklaih laih mơ̆ng ƀun rin”.

Yap abih bang amăng tơring čar Khánh Hòa, mrô sang anŏ rin amăng kual mơnuih ƀôn sang djuai ƀiă hrŏ trun rơbêh 5% rim thun; truh ră anai dŏ rơbêh 6.400 boh sang anŏ, hơmâo 10,7%. Rơbêh kơ 3.500 boh sang dŏ yik yuk, ƀu rup hơmâo plih jing sang dŏ kjăp. Jơlan nao rai, sang hră, sang ia jrao să, apui lơtrik, ia yua hơmâo prăp brơi abih bang mơnuih ƀôn sang laih. Ƀơi lu plơi pla, tơdơi kơ pơmut hrŏm gong gai, kual lŏn, mrô ană mơnuih lu tui, hơmâo thim lu anih či pơđĭ kyar, pơkra gơnam blung a hơmâo jơlan hơdră phrâo. Kah hăng ƀơi Trung Khánh Vĩnh glăk pok prong hơbô̆ bruă pla boh troh. Gong gai djru anah, djuai phun, prăk čan, pơtô brơi tơjŭ pla, rông phun, jing pơtrut neh met wa pơplih hơdră ngă hmua. Yă Cao Thị Ngọc Thanh, Khua jơnum min mơnuih ƀôn sang să Trung Khánh Vĩnh brơi thâo:“Pơ să hơmâo prăp rơmet bruă pơđĭ kyar hơbô̆ bruă pla djuai yôm phun, ruah mă phun lăp djơ̆ hăng lŏn tơnah, ayuh hyiăng, ƀrô djơ̆ hăng tơlơi kiăng pơđĭ kyar bơwih ƀong huă, ƀrô pơplih bruă ngă hmua tui jơlan tŭ yua hloh. Lu gơnam mơ̆ng hmua hơmâo ba sĭ, pơhlôm anŏ klă, hơmâo lu, djru pơđĭ bruă bơwih ƀong hăng hơmâo prăk pơhrui hơđong kơ neh met wa”.

Tui hăng tơlơi lăi pơthâo mơ̆ng tơring čar, kuak Ngŏ Khánh Hòa hơmâo ngă giong 29/30 rơnoh pơkă Jơlan hơdră dêh čar pơđĭ kyar kual mơnuih ƀôn sang djuai ƀiă hăng čư̆ siăng; prăk pơhrui amăng kual mơnuih ƀôn sang djuai ƀiă đĭ 2,14 wơ̆t pơhmu hăng thun 2020. Ƀơi Dơnung Khánh Hòa, 19/22 rơnoh pơkă dưi ngă hăng rơgao hơnong, amăng anun hmư̆ hing lĕ 100% mrô sang anŏ rin djuai ƀiă hơmâo djru sang dŏ. Khă hnun hai, ăt hơmâo mơn hơdôm rơnoh pơkă aka ƀu dưi ngă kah hăng hrŏ trun mrô să tơnap kơtang, pơđĭ tui mrô čơđai sang hră djuai ƀiă hrăm gưl 3, ƀudah kyâo amăng đang glai.

Tui hăng ơi Nguyễn Ngọc Sơn, Kơ-iăng khua gơnong bruă Djuai ania hăng Tơlơi đăo tơring čar Khánh Hòa, kual mơnuih ƀôn sang djuai ƀiă hăng čư̆ siăng mơ̆ng tơring čar dŏ tơnap biă, samơ̆ hơmâo mơn anŏ kjăp kơtang, biă ñu bruă ngă hmua. Bơwih ƀong huă pơ anai amra pơplih, lơ̆m tơring čar iâu pơthưr anom bơwih ƀong gum ngă, akŏ pơdong lu anih pơtrut nao rai. Ơi Nguyễn Ngọc Sơn pơhmu nao să Khánh Sơn:“Ƀơi kual čư̆ siăng Khánh Sơn, ră anai phun sầu riêng jing phun pla yôm hloh. Akŏ pơjing anăn hmư̆ hing laih anun hơmâo hơdră tuh pơ alin blơi măi pơkra, anung gơnam amăng hruh, jing sầu riêng ƀơi Khánh Sơn amra hmư̆ hing, hrưn ataih hloh. Samơ̆ kiăng dưi ngă, khŏm hơmâo hơdră djru phara, djru brơi klă hloh kơ bruă anun. Mơ̆ng anun pơtrut hơdôm plơi pla djuai ania ƀiă đĭ kyar”.

Bruă hrŏ trun ƀun rin, pơđĭ tui tơlơi hơdip mơda kual mơnuih ƀôn sang djuai ƀiă pơ Khánh Hòa hơmâo lu boh tŭ yua rơđah rơđông, jai hrơi kjăp lơ̆m mut hrŏm hăng anih anom, sang dŏ, jơlan nao rai, pơtô hrăm hăng bơwih ƀong. Anom bruă sĭ mơdrô ăt glăk gum hrŏm či rŭ đĭ tơlơi gêh gal. Hră lăi pơthâo bruă čar mơ̆ng tơring čar Khánh Hòa lăi dlăm kơ tơlơi pơmin “ƀu lui hĭ pô hlơi gah tlôn ôh”, dưi hrŏ trun ƀun rin djŏp hơnong pơkă mơ̆ng 1 truh 1,5% rim thun, pơsit tơlơi gir run ba glăi tơlơi gêh gal či pơđĭ kyar abih bang, hơđong kjăp kơ kual mơnuih ƀôn sang djuai ƀiă hăng čư̆ siăng./.