Tui hăng hră lăi pơthâo mơ̆ng Birô khua pơ ala mơnuih ƀôn sang dêh čar, 6 blan akŏ thun, bruă mă lăi pơthâo, bơwih brơi pok pơhai hơdôm bruă mă čih pơkra tơlơi phiăn dêh čar dưi đing nao hlâo hloh, bruă mă pơđĭ tui boh tŭ yua. Rơgao 4 wơ̆t jơnum lok, khua mua pơ ala mơnuih ƀôn sang dêh čar pơsit hăng ngă giong 13 mơta tơlơi phiăn, 3 pok hră pơtrun pơkă tong ten amăng tơlơi phiăn, pơgôp hiăp kơ 11 mơta tơlơi phiăn pơkŏn; boh nik ñu, djă gru kơđŏm pioh ƀuh rơđah amăng bruă mă čih pơkra tơlơi phiăn amăng thun 2024.

Pơhiăp amăng mông jơnum, khua git gai pơ ala mơnuih ƀôn sang dêh čar ơi Trần Thanh Mẫn lăi rơđah, 6 blan akŏ thun, lŏn ia ta hơmâo nga wbruă ba glăi lu boh tơhnal tŭ yua hiam klă, amăng boh tơhnal anun, hơmâo tơlơi pơgôp hrŏm ƀu anet ôh mơ̆ng anom bruă pơ ala mơnuih ƀôn sang dêh čar, Jơnum min apăn bruă phun pơ ala mơnuih ƀôn sang dêh čar, djop sang bruă, anom bruă gah jơnum min phun pơ ala mơnuih ƀôn sang dêh čar. Bruă mă čih pơkra tơlơi phiăn, bruă krăo lăng dlông hloh hăng pơsit bruă mă pơprong kơ dêh čar ăt dưi pơđĭ tui laih mơ̆n kơ boh tŭ yua, djơ̆ lăp hăng djop bruă mă mơ̆ng mơnuih ƀôn sang ruah khua hăng mơnuih ƀôn sang đing nao.

Tui hăng bruă ngă anun, Khua git gai pơ ala mơnuih ƀôn sang dêh čar ơi Trần Thanh Mẫn bơni kơ tơlơi gir run mơ̆ng Anom bruă Khul wai lăng djop djuai ania ƀiă, djop jơnum min, anom bruă amăng sang bruă khua pơ ala mơnuih ƀôn sang dêh čar hăng abih bang ƀing pơ ala kơ mơnuih ƀôn sang dêh čar, mơnuih apăn bruă kơnuk kơna, mơnuih apăn bruă čar djru hrŏm hơmâo ngă pơgiong abih brua dưi jao kơ ƀing pơ ala mơnuih ƀôn sang dêh čar hăng pran jua mă bruă lăng nao tơpă, lăi sit hơdôm bruă aka ƀu dưi ngă laih anun ĕp hơdră pơsir, tơlơi dưi ngă  lĕ khom pơđĭ tui, anŏ aka ƀu dưi ngă khom pơsir tañ amăng hrơi blan pơ anăp.

 Khua git gai pơ ala mơnuih ƀôn sang dêh čar ta pơsit, bruă mă amăng 6 blan rơnuč thun dơ̆ng, boh nik ñu prăp lui jơnum lok 8, khua mua pơ ala tal 15, him lăng či pơphun amăng blan 10 thun anai, jơnum ƀing khua ngă bruă sa hnơ̆ng lok 6, pok pơhai tŭ yua hơdôm boh yôm phun, hơdră mă bruă amăng 3 blan tal 3 mơ̆ng ping gah amăng grup khua mua pơ ala, jơnum min apăn  bruă phun; djop jơnum pơkŏn mơ̆ng jơnum min apăn bruă phun pơ ala mơnuih ƀôn sang dêh čar.

 “Ƀing ta pơtum pok pơhai boh yôm phun amăng hơdră čih pơkra tơlơi phiăn dêh čar, hră pơtrun amăng thun 2024 dưi prăp lui ngă djơ̆ hrơi blan pơkă, djơ̆ tơlơi pơkă mơ̆ng anom bruă pơ ala mơnuih ƀôn sang dêh čar hơmâo pơhrua amăng bruă čih pơkra tơlơi phiăn, hră pơtrun kơ thun 2024 hăng hơdôm kơčăo bruă prăp lui djop tong ten pioh čih glăi tơlơi pơgôp hiăp, pơkra glăi brơi djơ̆ kơnang kơ jơnum lok 7 laih rơgao hơmâo pơčrong sai. Hơdôm kơ-iăng khua git gai pơ ala mơnuih ƀôn sang dêh čar wai lăng gah bruă jao hơgĕt khom jŭ yap glăi abih hơdôm boh yôm phun aka ƀu ba đĭ pioh kĭ ăt pơgiong tañ pioh kĭ”.

Khua git gai pơ ala mơnuih ƀôn sang dêh čar ơi Trần Thanh Mẫn lăi, pơ anăp anai, Jơnum min apăn bruă phun pơ ala mơnuih ƀôn sang hăng Kơnuk kơna pơphun jơnum hrŏm pok pơhai hơdôm tơlơi phiăn, hră pơtrun hơmâo pơsit giong. Biă mă ñu, Kơnuk kơna amra git gai bruă pơtô lăi, pơlar tui, pơtô hrăm tơlơi phiăn pioh pok pơhai hơdôm tơlơi phiăn, djop hră pơtrun, hră pơčrâo ngă tui kiăng djơ̆ hrŏm sa hnơ̆ng.

Khua git gai pơ ala mơnuih ƀôn sang dêh čar rơkâo, Ƀirô anom bruă khua pơ ala mơnuih ƀôn sang lăi pơthâo kơ Jơnum min apăn bruă phun pơ ala kiăng git gai, jŭ yap glăi, dăp hơdră pioh čih pơkra glăi hră pơkă tum teč, pơtô pơčrâo brơi, ming pơkra glăi 11 kơčăo bruă tơlơi phiăn dưi hơmâo khua git gai pơ ala mơnuih ƀôn sang dêh čar pơgôp hiăp brơi laih amăng mông jơnum lok 7 laih anun či pơsit hĭ amăng mông jơnum lok 8; prăp lui bruă khua mua pơ ala mơnuih ƀôn sang dêh čar pơgôp hiăp kơ 12 kơčăo bruă tơlơi phiăn hăng hơdôm hră pơtrun dưi pơhrua nao amăng hơdră čih pơkra tơlơi phiăn dêh čar, hră pơtrun thun 2024; lăi pơthâo, ngă giong hră či lăi pơthâo krăo lăng 2 pok hră pơtrun sa hnơ̆ng mơ̆ng Jơnum min apăn bruă phun pơ ala mơnuih ƀôn sang dêh čar amăng thun 2024, bơwih brơi kơ bruă či tơña lăi glăi amăng mông jơnum.

 Khua git gai pơ ala mơnuih ƀôn sang dêh čar ơi Trần Thanh Mẫn ăt kơđiăng, brơi kơtưn amăng bruă wai lăng kơđi čar brơi kơ abih bang mơnuih ping gah, ƀing ngă khua mua, anom bruă, mơnuih ngă bruă čar; biă mă ñu đing nao kơ hơdră pơkă, jơlan hơdră pơđĭ prăk blan kiăng ngă hiư̆m pă dưi bơkơnar, djơ̆ găl hăng hmao kru.