Pơhiăp ƀơi mông Jơnum, Khua pơ ala mơnuih ƀôn sang dêh čar ơi Trần Thanh Mẫn lăi, anai jing mông jơnum yôm biă mă, yua Khul khua apăn bruă ping gah Ƀirô pơ ala mơnuih ƀôn sang dêh čar hăng Khul khua apăn bruă phun git gai Ping gah dêh čar git gai či lăng glăi abih hơdôm bruă bơdjơ̆ nao bruă prăp lui mông jơnum ƀu tui tơđar tal 9, Khua pơ ala mơnuih ƀôn sang dêh čar tal 15 (pơphun mơ̆ng lơ 12 truh lơ 18/2/2025). Ngă lơphet 95 thun hrơi akǒ pơdong Ping gah cộng sản Việt Nam. Tui anun, lu anom bruă mơ̌ng kơnuk kơna, Ƀirô khua pơ ala mơnuih ƀôn sang gir ngă bruă hrơi mlăm mơtăm, wơ̌t hrơi năm hrơi tơjuh ngă bruă gơgrong kơtang, ngă hrǒm đah mơ̌ng dưi ngă truh kih bruă hơmâo jao.

Khua git gai pơ ala mơnuih ƀôn sang dêh čar, Jơnum min khua apăn bruă phun pơ ala mơnuih ƀôn sang ăt pơgôp hiăp kơ tơlơi phiăn Anom bruă gong gai plơi pla (pơkra glăi), tơlơi phiăn Anom bruă kơnuk kơna (pơkra glăi) hăng prăp lui tơlơi pơtrun amăng mông jơnum ƀu tui tơđar tal 9. Hơdôm tơlơi anai Khul khua apăn bruă phun pơ ala mơnuih ƀôn sang tǔ ư biă mă. Khua git gai pơ ala mơnuih ƀôn sang dêh čar ơi Trần Thanh Mẫn lăi pơtǒng: “Ƀing ta khǒm pơplih na nao tơlơi pơmin, hơdră ngă bruă, pơƀut tơlơi pơmin đǐ kyar lǒn ia; laih dong pơtrut tui tơlơi thâo rơgơi ngă bruă, gơgrong bruă, hơdră ngă bruă mơ̌ng tal jơnum giăm anai, biă ñu jơnum lok 7, 8 mơ̌ng khua pơ ala mơnuih ƀôn sang dêh čar. Thun blan rơgao, dua bơnah hơmâo ngă hrǒm klă biă yơh, mông anai khǒm ngă hrǒm klă hloh, hlâo kơ anun gơgrong bruă kơtang yơh mông anai khǒm kơtang hloh yua tơlơi đǐ kyar lǒn ia. Yǔ kơ tơlơi git gai mơ̌ng Khul khua apăn bruă phun git gai ping gah, Ding jum kơđi čar, Khul khua git gai ping gah hăng Khua git gai ping gah ơi Tô Lâm hơmâo lu wơ̌t lăi, bruă ngă hrǒm plah wah Kơnuk kơna hăng Ƀirô khua pơ ala mơnuih ƀôn sang khǒm djơ̌ hrǒm đah mơ̌ng dưi pơsir hǐ hơdôm tơlơi dǒ gun, tơnap tap amăng đǐ kyar bơwih ƀong huă mơnuih mơnam, pơhlôm pơgang lǒn ia, rơnuk rơnua hăng akǒ pơdong bruă kơđi čar”.

Khua git gai pơ ala mơnuih ƀôn sang dêh čar lăi pơhmư̌, hơdôm tơlơi amăng mông jơnum ƀu tui tơđar tal 9 yap truh mômg anai hơmâo tǔ ư abih hơdôm mơta tơlơi kah hăng sem lăng pơsit brơi 4 tơlơi phiăn; 5 tơlơi pơtrun bơwih brơi bruă dưm dăp, ngă giong tơlơi phiăn, tơlơi pơkôl pơkă mă yua amăng rim anom bruă kơđi čar; sem lăng pơsit 4 tơlơi pơkǒn tui hăng tơlơi dưi, amăng anun hơmâo bruă ruah mơnuih mă bruă; laih dong hơmâo sa tơlơi lăi pơthâo hăng khua mua pơ ala mơnuih ƀôn sang tui tơlơi pơkă.

Pơhiăp ƀơi mông jơnum, Khua dêh čar ơi Phạm Minh Chính lăng yôm hăng bơni biă bruă ngă hrǒm mơ̌ng khua mua pơ ala mơnuih ƀôn sang, jơnum min apăn bruă phun, ƀing khua git gai pơ ala mơnuih ƀôn sang, khua mơ̌ng hơdôm jơnum min pơ ala mơnuih ƀôn sang dêh čar; jai hrơi đăo kơnang, ngă hrǒm kjăp, tǔ yua kiăng dưi ngă lu bruă prong, biă ñu ngă khut khăt tǔ yua hơdôm tơlơi pơkôl pơkă mơ̌ng ping gah hăng kơnuk kơna amăng bruă mă mơ̌ng Ƀirô khua pơ ala mơnuih ƀôn sang ăt kah hăng Kơnuk kơna.

Khua dêh čar ơi Phạm Minh Chính pơsit, tơlơi kiăng hơmâo mơ̌ng Khul khua gum bruă git gai ping gah, Ding jum kơđi čar, Khul khua git gai ping gah, tơlơi črâo bruă mơ̌ng Khua git gai ping gah ơi Tô Lâm dua bơnah ngă hrǒm kjăp, ngă lu bruă amăng ƀiă hrơi, tǔ yua samơ̌ mut hrǒm kjăp gah tơlơi phiăn, hră pơ-ar:“Ƀing ta ƀơi mông jơnum ƀu tui tơđar tal 9 pơdah pran jua hơmâo bruă mă, hơmâo bruă lě khǒm pơsir. Bơ ta ngă lě khǒm giong, hơmâo rơ-oa. Lăng glăi hơdôm tal jơnum ƀu tui tơđar lăp djơ̌ hăng tơlơi glăk hơmâo, dưi pơsir hǐ tơlơi kiăng tơlơi čang mơ̌ng mơnuih ƀôn sang. Tơlơi ƀing ta gơñăm ngă tal anai lě dăp glăi anom bruă kơnuk kơna aset ƀiă tui hăng tơlơi pơtrun mrô 18, anai jing bruă hơkrǔ gah anom bruă kơnuk kơna. anom bruă aset, mơnuih mă bruă rơgơi hloh. Lơ̌m ƀing ta hơmâo tơlơi pơtrun anai, ngă tui Tơlơi pơtrun mơ̌ng Ding jum kơđi čar, hơdôm tơlơi klah čuñ glăi mơ̌ng Ping gah amra bơdjơ̌ nao tơlơi pơkă mơ̌ng tơlơi phiăm hơmâo pơkă laih mơ̌ng hơđăp. Pran jua mă bruă mơ̌ng Ping gah, Ding jum kơđi čar lě tơnap đam ƀơi ta pơkra đam anun, aka ƀu djơ̌ ƀơi gưl ƀơi thơ gưl anun pơkra”.

Lăi nao mông jơnum ƀu tui tơđar tal 9 hơmâo tơlơi yôm biă, tơnap biă mă samơ̌ yua kơ tơlơi đǐ kyar mơ̌ng lǒn ia, Khua git gai pơ ala mơnuih ƀôn sang ơi Trần Thanh Mẫn kiăng hơdôm bơnah bơdjơ̌ nao pơƀut ngă bruă, gir kơtir hloh, ngă hrǒm kjăp, tañ ngă giong bruă prăp rơmet pơdah pơ Khua mua pơ ala mơnuih ƀôn sang ăt kah hăng pơhlôm rơnuk rơnua kjăp khŏp, djru ngă truh kih mông jơnum./.