Thun blan laih rơgao, kơčăo bruă 8 hơmâo ba glăi lu boh tơhnal tŭ yua amăng tơlơi hơdip mơda kơ ƀing đah kơmơi hrơi hăng čơđai muai ƀơi tơring tơnap tap, ƀuh rơđah ñu pơthâo brơi amăng lu bruă mă djru tơlơi bơwih ƀong huă, pơtô pơblang kiăng thâo hluh lu, prong tui, pơgăn tơlơi phiăn hơđăp pơdŏ ung mơ̆ng muai bơnai mơ̆ng anet aka ƀu djop thun pơkă, tơlơi taih amang amăng sang anŏ.....Lơ̆m ngă tui, Khul mut phung đah kơmơi Việt Nam jing sang bruă pô pok pơhai hơdôm boh yom phun amăng kơčăo bruă 8. Khul hơmâo pơƀuh brơi bruă mă, prăp lui,  glăm ba hăng gir run prong biă mă, mơ̆ng bruă phrâo pơphun, ngă tui truh kơ bruă ba yua prăk kăk. Yua kơ anun, lu adơi amai đah kơmơi ƀun rin, ƀing đah kơmơi hlai ƀu hơmâo rơkơi sang, đah kơmơi blao hăng čơđai muai đah kơmơi amăng kual ataih, kual plơi pla tơnap aka ƀu hơmâo tŭ mă prăk djru čan ling bơwih ƀong huă, mơ̆ng anun kiăng djru gơñu hrưn đĭ amăng tơlơi hơdip mơda.

Khă hnun, hrŏm hăng boh tơhnal hơmâo tŭ mă laih klă hiam, pok pơhai kơčăo bruă 8 ăt bưp ƀu ƀiă ôh tơlơi tơnap tap gun gan. Hơmâo rơbêh 200 tơhnal pơkă pioh krăo lăng, amăng anun rơbêh 70 tơhnal pơkă pơdjơ̆ nao kơ bruă rơkơi bơnai. Tui hăng ơi Phùng Quốc Huy, Kơ-iăng khua anom bruă mơ̆ng Gơnong dlông wai lăng jơlan hơdră dêh čar pơkă kơ bruă anai hơmâo lăi, tơlơi anai pơphun tum teč, rơđah rơđong biă mă, samơ̆ ăt khom pơmin kơjăp mơ̆n kơ ƀing apăn bruă ƀơi gưl să, anih mơ̆ mrô mơnuih apăn bruă gơgrong ba sa hơnơ̆ng dŏ ƀiă đơi. Gơñu ƀu djop mrô mơnuih mă bruă laih anun gơnam yua mă bruă hyu jŭ yap, ĕp lăng čih pioh aka ƀu djop ôh. Gơnam yua atur boh thâo ia rơgơi tơlơi pơhing lu anih, ăt dŏ tơdu đơi, ngă kơ bruă čih pioh pơmut mrô hăng krăo lăng tơlơi pơhing bưp lu tơlơi tơnap tap.

 “Amăng bruă mă dăp hơdră, lu kơčăo bruă, črăn bruă pơkŏn hơmâo čih “đing nao kơ đah kơmơi hlâo”. Samơ̆, ƀing ta kiah ngă bruă dơ̆ tơlơi ngă tui jơlan hơdră man pơphô đôč, aka ƀu pơphun tum teč ôh “đing nao hiư̆m pă”. Tơlơi anai yơh ngă kơ ƀing ta aka ƀu dưi pơjing ñu jing hĭ tơhnal pơkă rơđah rơđong bơkơnar rơkơi bơnai, brơi ngă tui kơčăo bruă anun, pioh pơkă lăng rơnoh bruă hăng pơtong glăi”.

Yua kơ anun yơh, kiăng pơđĭ tui anŏ pơkă bơkơnar đah rơkơi hăng đah kơmơi pơ anăp anai lĕ, kiăng hơmâo hơdră tŭ yua sit nik. Blung hlâo lĕ, kiăng pơtum nao amăng hơbô̆ bruă, bruă mă hơmâo pơhaih rơđah rơđong tŭ yua, pơ ala hăng bruă ngă tŭ kơ pok pơhai lu ƀu ngă ten. Kah hăng, lu hơbô̆ bruă pơphun brơi tơlơi bơwih ƀong huă kơ ƀing đah mơnuih djuai ƀiă, djop anih pơtô hrăm brơi tơlơi thâo, bruă ngă, pôr tơlơi pơhing pơgăn tơlơi phiăn dŏ rơkơi bơnai aka ƀu djop thun....hơmâo ƀuh hơmâo boh tơhnal tong ten mơ̆n hăng kiăng pơlar tui lu.

Dua dơ̆ng lĕ, kiăng sem glăi tơlơi phiăn pơkă kơ bruă kah pơpha rơnoh prăk či yua. Tơdah rim kơ sang bruă raih daih, anet lĕ rơnoh prăk kah pơpha phara mơ̆n, bruă čih pioh, pơƀut hĭ hăng brơi čan prăk djru anun amra tơnap tap. Ơi Phùng Quốc Huy lăi lĕ, kiăng dŏ djă pioh rơnoh prăk djru kơ Khul đah kơmơi mut phung pioh pok pơhai lu bruă mă yom, ngă hnun kah amra gêh găl amăng bruă wai lăng hăng pok pơhai sit nik. Rơngiao kơ anun, kiăng jao tơlơi dưi kơ kual pơyŭ lu hloh, jao lu tơhnal pơkă hăng prăk kăk ƀơi să prăp lui dăp hơdră pơphun lu bruă mă djơ̆ găl hăng tơlơi gêh găl hăng anŏ či kiăng mơ̆ng rim anih, plơi pla ngă tui sit nik.

  “Ƀing ta kiăng pơhrŏ ƀiă rơnoh prăk djă glăi ƀơi Gơnong dlông, pơ ala kơ anun lĕ jao lu hloh kơ kual plơi pla mă yua. Tơring čar truh pơ să jing anih jĕ giăm thâo hluh tong ten hloh tơlơi hơdip mơda mơnuih ƀôn sang, jao tơlơi dưi kơ gơñu amra djru lu bruă mă krăo lăng tong ten hăng tŭ yua hloh”.

Sa tơlơi pơkŏn dơ̆ng ăt kiăng đing nao lĕ pơsir hĭ tơlơi phiăn juăt hơđăp dŏ djă pioh kah hăng brơi ană bă pơdŏ ung mơ̆ng muai bơnai mơ̆ng anet, dŏ ană anong rông ană wa....Anai lĕ phun ñu ngă rơnang hĭ tơlơi pơđĭ kyar, kơhnâo rơgơi kơ ƀing đah kơmơi hăng čơđai muai djuai ƀiă. Hrŏm hăng anun, kiăng ngă hrŏm plah wah hơdôm anom bruă kiăng huăi pơrơkua nao rai bruă mă, ba yua hơmâo boh tơhnal tŭ yua klă prăk kăk kơnuk kơna tuh pơ alin.

Bruă pơđĭ tui tơlơi gơgrong, glăm ba, kơnuih mơ̆ng ƀing đah kơmơi, đing nao wai lăng klă kơ čơđai muai ƀu kơnong jing tơlơi dưi, boh tŭ yua lăp đôč ôh, dŏ jing hơdră tuh pơ alin nao pơ rơnuk dĭ da hla kơñ, sui thun pơ anăp adih. Amăng čăl, rơnuk phrâo ră anai, bruă bơkơnar rơkơi bơnai kiăng ngă tui sit nik hloh; sit biă ñu hơmâo tơhnal pơkă rơđah rơđong tum teč, hơmâo anŏ pơkă lăng tong ten, hơmâo mơnuih mă bruă djop, laih anun hơmâo tơlơi gum hrŏm mơ̆ng khua mua kơnuk kơna, gong gai plơi pla. Ngă hnun kah, ƀing ta mơ̆ng ngă bruă ba glăi boh tơhnal pơblih hiam klă, hơđong kơjăp brơi tơlơi hơdip mơda ƀing đah kơmơi hrơi hăng čơđai muai kual mơnuih djuai ƀiă-pơgôp hrŏm ngă tui tŭ yua truh kih bruă mơ̆ng dêh čar pơtrun brơi bơlang ba bơkơnar đah rơkơi hăng đah kơmơi truh thun 2030.