Ngă tui tơlơi pơtrun mơ̆ng Ding jum kơđi čar kơ man pơdong sang hră kơ hơdôm boh să pơ guai dêh čar, amăng thun anai, Dak Lăk amra man pơdong 3 boh sang hră čem rông ană bă djuai ania ƀiă hăng prăk tuh pơ alin rơbêh 390 klai. Hơdôm boh sang hră anai hơmâo man pơdong ƀơi 3 boh să guai dêh čar kah hăng Ia Lốp, Ia Rvê hăng Buôn Đôn laih anun hơmâo man pơdong hrŏm mơtăm amăng lơ 2/11 pơ anăp.

Khua ging gah tơring čar ơi Lương Nguyễn Minh Triết lăi, Ia Lốp jing sa amăng 7 boh să ƀu hơmâo pơmut hrŏm ôh, yua hơmâo jơlan guai anun ñu hơmâo gêh gal wơ̆t hăng tơlơi lông lăng mơn, yua kual lŏn prong, mơnuih ƀôn sang aset, mrô sang anŏ rin hăng rin ƀơ ƀiă dŏ lu đôč. Khua ping gah tơring čar Dak Lăk kiăng tơring čar lăng rơđah tơlơi gêh gal, pơsir hĭ tơlơi tơdu, pơplih tơlơi pơmin đah mơ̆ng dưi đĭ kyar hơđong kjăp amăng rơwang phrâo.