Hăng 90,51% čô khua pơ ala tŭ ư, ƀing khua pơ ala tŭ ư Tơlơi pơtrun kơ akŏ bruă pơđĭ kyar bơwih ƀong huă - mơnuih mơnam thun 2026. Tơlơi pơtrun pơsit 15 rơnoh pơkă phun, amăng anun: Rơnoh đĭ kyar gơnam pơhrui glăi amăng dêh čar (GDP) gir hơmâo mơ̆ng 10% truh pơ ngŏ. GDP yap tui akŏ mơnuih hơmâo 5.400 truh kơ 5.500 USD. Anai jing rơnoh lu biă mă, samơ̆ tui hăng lu khua mua lơ̆m pơčrông sai lĕ bruă anai dưi mơn ngă, yua hơmâo phun atur laih amăng rơwang bruă anai. Ơi Trần Văn Lâm, khua pơ ala mơ̆ng Bắc Ninh pơsit, hơdôm boh yom hơmâo ngă, hrŏm hăng hơdră djru hơmao khua mua pơ ala mơnuih ƀôn sang čih pơkra giong amăng hơdôm tal jơnum giăm anai, sit jing tơlơi pơtrut pran jua kiăng Việt Nam mut amăng thun 2026 hăng tơlơi pơmin pran jua prăp rơmet hlâo, hơmâo pran, khin ngă:“Rơnoh đĭ kyar thun anai hơmâo rơbêh 8%. Laih anun prăp rơmet kơ rơwang tơdơi hơmâo laih khua mua pơ ala jơnum lu wơ̆t pơčrông sai či čih pơkra djơ̆ tơlơi phiăn, akŏ pơjing lu tơlơi gêh gal djru ba kơnuk kơna pơđĭ tui rơnoh đĭ kyar amăng thun 2026 hăng truh rơwang tơdơi dong kiăng dưi ngă lu hloh, laih anun gơmơi kơnang hăng hơdôm tơlơi ƀing ta hơmâo ngă, glăk ngă amra dưi ngă tui hăng hơdôm tơlơi ba tơbiă”.

Hăng 88,61% čô khua tŭ ư, tlam anai, Khua mua pơ ala mơnuih ƀôn sang dêh čar pơsit brơi Tơlơi pơtrun pơhrui, mă yua prăk kơnuk kơna thun 2026. Tui anun, tơlơi pơtrun pơhrui, mă yua prăk kơnuk kơna thun 2026 hăng mrô prăk pơhrui kơ kơnuk kơna lĕ rơbêh 2 klăk ha mơkrah klai prăk. Mrô prăk mă yua lĕ rơbêh 3 klăk klai prăk (mă pơhrua kơ hơdôm boh tơring pơhlôm hơmâo prăk blan đoi đom ñu 2 klăk 340 rơbâo prăk/blan).

Sa mơta bruă pơkŏn ăt hơmâo ƀing khua hăng mơnuih ƀôn sang lăp đing nao mơn, anun lĕ bruă livestream sĭ gơnam. Lơ̆m pơgôp hiăp kơ Kơčăo bruă Tơlơi phiăn sĭ mơdrô điện tử, ƀing khua pơtŏng anai lĕ sa tơlơi phiăn yom, ƀu kơnong pơplih bruă sĭ mơdrô amăng plang internet đôč ôh mơ̆ ăt jing phun atur kơ tơlơi bơwih ƀong mrô dêh čar. Yă Hòang Thị Thanh Thúy, grup khua mơ̆ng Tây Ninh lăi, mah tơlơi phiăn pơkă laih hăng pô livestream sĭ gơnam, samơ̆ ăt dŏ hơmâo lu anŏ hông mơn kah hăng: aka ƀu hơmâo hơdră wai lăng hlâo či pơdah đĭ hơdôm mơta gơnam ngă sat kơ tơlơi suaih pral, hrơi djă pioh lui tơlơi hơmâo pơdă đĭ aset đơi, aka ƀu pơkă rơđah ôh tơlơi gơgrong bruă hrŏm lơ̆m lăi pơthâo tơlơi soh glăi:“Kiăng pơhlôm lăp djơ̆ hloh hăng tơlơi pơplih tañ mơ̆ng bruă sĭ mơdrô tui live stream, kiăng pơmin nao bruă pơhrua tui tơlơi pơkă krăo lăng hlâo či pơdah đĭ livestream hăng hơdôm mơta gơnam ngă sat kơ tơlơi suaih pral; ngă rơđah tơlơi gơgrong bruă hrŏm mơ̆ng pô live stream lơ̆m pơƀuh tơlơi pơhing rơgao đơi ƀudah soh glăi pơhmu hăng hră pơ-ar gơnam tam; pioh sui ƀiă bruă livestream hơmâo pơdah đĭ; pơhrua tui tơlơi pơkă kiăng pơƀuh live stream, pơgăn tơlơi mơit hiăp ča čot; seeding ngă mă đôč, laih anun hơmâo tơlơi pơkă či pơhŭi hlâo lơ̆m ƀuh mrô mơnuih dŏ lăng lu đơi, mơ-it hiăp hling hlang”.

Hăng 15 klăk čô mơnuih hơdip hrŏm hăng telephôn rơgơi, samơ̆ tơlơi phiăn aka ƀu hơmâo ôh tơlơi pơkă phara hơjăn či pơgang ba tơlơi dưi, tơlơi rơnuk rơnua kơ ƀing čơđai ƀơi anih sĭ mơdrô điện tử. Yua hnun,  yă Nguyễn Thị Việt Nga, khua pơ ala mơ̆ng Hải Phòng kiăng:“Laih dong, lơ̆m ƀuh livestream hơmâo boh tơhnal ƀu lăp djơ̆ hăng gru grua phiăn juăt, ƀu djơ̆ hăng tơlơi phiăn, ngă sat kơ ƀing čơđai muai lĕ kiăng hơmâo hơdră lăi pơthâo glăi, ngă hrŏm glông livestream hăng anom bruă wai lăng či lŏm hĭ tañ hơdôm tơlơi anun”.

Ngă rơđah bruă anai, Kơ-iăng khua dêh čar ơi Bùi Thanh Sơn brơi thâo:“Tơlơi phiăn ră anai ăt gir pơmut hrŏm hơdôm boh tơhnal mơ̆ ƀing ta dưi wai lăng klă mơnuih blơi ăt kah hăng pô mut hrŏm glông sĭ mơdrô điện tử. Rơngiao kơ anun, tơlơi phiăn ăt črâo rơđah tơlơi gơgrong bruă mơ̆ng pô livestream hăng pô sĭ. Hrơi anai ƀing gơmơi amra pơhmư̆ dong tơlơi pơgôp hiăp mơ̆ng ƀing khua pơ ala đah mơ̆ng git gai anom bruă čih pơkra tơlơi phiăn pơhrua tui, čih pơkra giong bruă anai, biă ñu lĕ pơgang ba ƀing čơđai”.