Pơhiăp amăng mông jơnum, Kơ-iăng Khua dêh čar ơi Trần Hồng Hà lăng yôm tơlơi gir run mơ̆ng Ding jum man pơdong, djop anom bruă gơnong dlông, djop tơring čar hăng khul ngă bruă bơwih ƀong sĭ mơdrô kiăng hơmâo ngă bruă dưi ba glăi boh tơhnal kah hăng ră anai.

Kơ-iăng Khua dêh čar brơi thâo, Kơčăo bruă man pơdong 1 klăk boh sang, anih dŏ djru mơnuih mơnam tơnap tap, ƀing mă bruă apah jing kông ñơn tơnap tap truh kơ thun 2030, sa bruă pơphun mơtam mơ̆ng akŏ thun anai, kiăng ba bruă prong anai dưi ngă djơ̆ anŏ kiăng mơ̆ng mơnuih mă bruă tơnap kơƀah sang dŏ anŏ đih. Tơdah man pơdong giong djop ring bruă pơdong sang kơ mơnuih mơnam tơnap lĕ amra djru hrŏm prong prin, yôm pơphăn biă mă amăng jơlan hơdră pơhlôm ba tơlơi bơwih ƀong huă kơ mơnuih mơnam tơnap tap.