Phường Tiến Thành, tơring čar Lâm Đồng gum hrŏm lu khul grup hăng ƀing mơnuih čơmah pơphun jơlan hơdră “Mơmŏt ngui blan bơrơmi” brơi ƀing čơđai tơnap tap amăng ƀon lan. Amăng jơlan hơdră anai, ƀing čơđai hơmâo lăng arăng suang ania čơgrai, lăng lu tơlơi ngui adôh suang yua ƀing čơđai đĭ adôh suang hăng hmư̆ tơlơi akhan kơ met Cuội-amai Hằng Nga. Ƀrô tal anai, ƀing pơ ala khua mua phường Tiến Thành hăng hơdôm anom bruă djru ba ƀơk rơbêh 1.550 anung gơnam, abih tih  nua ñu rơbêh 125 klăk prăk brơi ƀing čơđai sang anŏ tơnap tap dưi čơkă bơyan ngui blan bơrơmi mơ-ak.

Ƀơi sang hră gưl I Phan Thanh 2 (anih tal 2), să Hồng Thái, tơring čar Lâm Đồng, ƀing pơ ala Mũi Né Resort ăt ƀơk 100 anung gơnam hăng 20 pok hră pơhlôm nua ia jrao brơi ƀing čơđai djuai ania ƀiă tơnap tap. Hơdôm gơnam djru anai amra juh alum pran jua hmao tlôn, pơsur pran gir kơtir hrăm hră kơ ƀing čơđai amăng thun hrăm phrâo.

Hlăk ai tơring čar, Gơnong bruă ia jrao tơring čar Quảng Ngãi hrŏm hăng hơdôm anom bruă phrâo ngă hrŏm pơphun jơlan hơdră “Mơak tê̆t blan bơrơmi thun 2025” ƀơi tơdron lăk 16/3, phường Kon Tum. Rơbêh 130 čô čơđai mơ̆ng phường Kon Tum hăng Anih mă bruă mơ̆ng Hlăk ai čơđai anet Diên Hồng gum ngui, ba pơƀuh tơlơi adoh suang mơak amăng hrơi čơkă tê̆t trung thu blan bơrơmi ria.

Hơdôm tơlơi adoh bơni kơ Wa Hồ, tơlơi khăp sang anŏ hrŏm hăng jua čing, ayun suang, ngă brơi hrơi ngui ngor jai mơak hloh, dik dak hloh. Suang kơdăt ania čơgrai, djă hyu apui kơđen dian, biă ñu lĕ tơlơi ngă sen “Tơlơi akhan yang blan” jing tơlơi ngă pơhưč ƀing čơđai hăng mơnuih ƀôn sang hloh. Hăng tơlơi ngui “Apui kơđen dian tŭi rơđah tơlơi khăp”, jơlan hơdră iâu pơthưr pơčruh hơmâo rơbêh 800 klăk prăk mơ̆ng hơdôm anom bruă, brơi 1.800 anung gơnam trung thu hăng 300 anung prăk hrăm hră kơ ƀing čơđai tơnap tap samơ̆ gir hrăm hră ƀơi tơring čar.