Ƀơi phương Mũi Né, tơring čar Lâm Đồng, grup hyu mă bruă mơng Kông ang tơring čar hơmâo nao tơl sang yă Nguyễn Thị Tiếp, 79 thun, kiăng mă čơđeh asar ADN. Yă Tiếp hơmâo dua čô ană đah rơkơi anun lĕ Nguyễn Văn Nô, djai pơsăn drơi thun 1968 hăng Nguyễn Văn Ốm, djai pơsăn drơi thun 1973. Rơbêh 50 thun rơgao, sang anŏ ăt čang rơmang tañ ĕp ƀuh tơlang tơleh dua čô tơhan anai. Bruă mă čơđeh asar ADN ƀơi sang mơtăm ngă bang hyu tơlơi čang rơmang amra tañ ĕp ƀuh tơhan djai pơsăn drơi. Yă Lê Thị Tư, ană đah kơmơi yă Tiếp ol kơdol brơi thâo: “Sang anŏ hok mơ-ak biă mă lơm mă čơđeh asar ADN. Anai lĕ tơlơi čang rơmang mơng sang anŏ sui laih, samơ̆ hlâo adih aka ƀu djop tơlơi gal kiăng ngă. Ră anai, sang anŏ čang rơmang tañ ĕp ƀuh tơlơi pơhing bơdjơ̆ nao pô sang.”

Ăt ƀơi phương Mũi Né, sang anŏ ơi Trần Văn Hùng ăt aka ƀu ĕp ƀuh pơsat dor tơhan djai pơsăn drơi Trần Văn Năm, ayong ñu, djai pơsăn drơi thun 1966. Tơdơi kơ sui thun dŏ tơguăn, ơi Hùng čang rơmang bruă mă hăng pơčrang nao rai ADN amra ngă sang anŏ tañ ĕp ƀuh anih dor pô sang. “Hơdră bruă mă čơđeh asar ADN kiăng kơ ba hyu ĕp, thâo anăn krăn pô tơhan djai pơsăn drơi yôm phiăn biă mă. Sang anŏ čang rơmang tañ ĕp ƀuh pô sang, hơmâo anih pioh hơ-ŭ hơdor, nao tŭi ñang, anai lĕ tơlơi juh alum hăng tơlơi čang rơmang sui laih.”

Amăng rơwang tal 1 hơdră bruă 500 hrơi mlăm, tơring čar Lâm Đồng hơmâo pơphun 32 tal hơduah ĕp, ling tơhan hơmâo hyu ĕp, klơi rŭ đĭ 26 per tơlang tơhan, mă čơđeh asar ADN hăng 17 čô mơnuih. Laih dong, pơgiong bruă mă meh tơlang ƀơi 3.625 akŏ pơsat djip tơlơi gal ƀơi 11 boh pơsat dor tơhan, tañ ƀiă tui tơlơi pơkă 3 blan. Kông ang tơring čar Lâm Đồng ăt mă 1.371 čơđeh asar ADN mơng ƀing pô sang tơhan djai pơsăn drơi.

Pok pơhai tal 2 anai, Lâm Đồng him lăng mă giăm 1.074 čơđeh asar ADN mơng ƀing pô sang tơhan. Năm grup hyu mă bruă hơmâo akŏ pơjing, hơmâo 3 grup dŏ ha anih hăng 3 grup đuăi hyu, nao tơl sang ƀing pô sang tha rơma, ruă kraih ƀudah ƀu anăm nao rai. Hrŏm hăng čơđet asar, tơhan kông ang gum hrŏm hăng gong gai ƀon lan pel ĕp, pơsit tong tơlơi pơhing, pơtrut pơsur hơdôm sang anŏ mut hrŏm, anăm wơr hĭ ƀing mơnuih hơmâo djop tơlơi gal kiăng kơ mă. Đại tá Hoàng Đăng Hải, anom bruă tơhan pôlih wai lăng bruă pơhlôm hơđong mơnuih mơnam, kông ang tơring čar Lâm Đồng brơi thâo: “Kâo pô hơmâo arăng jao git gai sa grup hyu mă bruă, nao tơl sang kiăng kơ mă čơđeh asar ADN kơ ƀing pô sang tơhan. Ƀing gơmơi gum hrŏm ngă bruă hăng pran gơgrong hloh, gir run pơgiong klă bruă jao./.