Bơyan phang thun 2025-2026, abih bang tơhan kual 5 hơmâo hyu ĕp, klơi rŭ đĭ 481 per tơlang tơhan. Amăng rơwang tal 1 amăng hơdră bruă anai, dong mơng kơnôl 15/3 truh kơnôl 1/11/2026, hơdôm grup tơhan hơmâo klơi rŭ đĭ 390 per tơlang tơhan amăng lŏn ia, 6 per tơlang ƀơi dêh čar Lao hăng 35 per tơlang ƀơi dêh čar Kur. Tơhan kual 5 hăng hơdôm boh ƀon lan tŭ mă giăm 1.300 tơlơi pơhing lăi pơthâo kơ anih dor tơhan, hơmâo hơduah ĕp hăng sem lăng tong ten 820 tơlơi pơhing.

Amăng rơwang tal 2, tơhan kual 5 gir run hyu ĕp, klơi rŭ đĭ giăm 1.000 per tơlang tơhan, pơgiong bruă răk pioh hră pơ-ar kơ tơhan djai pơsăn drơi, anih dor tơhan. Ling tơhan tŏ tui gum hrŏm hăng anom bruă bơdjơ̆ nao 3 boh tơring čar Dơnung dêh čar Lao hăng 4 boh tơring čar amăng dêh čar Kur pơsit tong tơlơi pơhing, pơphun hyu ĕp, gir run klơi rŭ đĭ rơbêh 100 per tơlang tơhan ƀơi dua boh dêh čar ha guai amăng bơyan phang thun 2026-2027. Thun 2027, ling tơhan ba tơbiă hơnong pơkă pơgiong bruă sem lăng amăng kual, pơsit tong anih hyu ĕp, hyu klơi rŭ tal 2 hăng mă meh tơlang mơng 100% mrô pô sang tơhan dŏ kơƀah tơlơi pơhing lăi nao anih dŏ amăng ƀon lan.