Tơdơi kơ rơbêh ha thun pok pơhai hơbô̆ bruă gong gai ƀon lan 2 gưl, Lâm Đồng ăt dŏ lu tơlơi gun amăng wai lăng lŏn mơnai. Hơdôm hơpluh rơbâo ektar lŏn mơnai dưm dăp pioh mă bô-xit, titan samơ̆ bơdjơ̆ nao kual plơi pla, plơi prong hăng hơdôm ring bruă; hơdôm rơbâo boh sang anŏ glăk dŏ hơdip amăng lŏn glai ƀudah hơdôm kual aka ƀu pơsit brơi pơdong plơi pla. Lu kual lŏn ngă hmua ăt dŏ bơrơsua hăng ƀing gong gai jao ngă hmua, pla đang glai.

 Ơi Bon Yô Soan, kơ-iăng Khua Jơnum min djop djuai ania mơnuih mơnam Việt Nam tơring čar Lâm Đông brơi thâo, tơlơi phiăn lŏn mơnai thun 2024 hăng hơdôm pok hră pơ-ar črâo ba ngă pơplih klă, samơ̆ amăng hrơi blan ngă tui ăt bưp tơnap yua tơhnal pơkă hăng bruă ngă tui aka ƀu pơmut hrŏm, sit biă ñu hăng hơdôm bruă dŏ đôm glăi mơng hlâo: “Mơnuih ƀôn sang ruah khua čang rơmang Khua pơ ala mơnuih ƀon sang dêh čar, Kơnuk kơna hăng djop Ding jum, gơnong bruă tŏ tui pel ĕp, pơgiong hơdôm tơlơi pơkă amăng tơlơi phiăn kơ lŏn mơnai tui jơlan gah tong ten, pơmut hrŏm, amuñ mă yua, laih dong hơmâo hơdră pơsir hĭ hơdôm bruă dŏ đôm glăi sui thun, kiăng kơ bĕ hĭ bruă ƀom kiơng, pơgang ba tơlơi dưi djơ̆ tơlơi phiăn mơng mơnuih ƀôn sang”.

Lơm kiăo tui lăng Jơnum ƀu tui tơđar lok I, Khua pơ ala mơnuih ƀon sang dêh čar XVI, mơnuih ƀôn sang ruah khua tơring čar Lâm Đồng pơdah tơlơi čang rơmang kơ bruă pơplih pơkra amăng tơlơi phiăn lŏn mơnai thun 2024 mơng Ƀirô Khua pơ ala mơnuih ƀon sang dêh čar hăng Kơnuk kơna amra pok phư bruă mă yua lŏn mơnai amăng rơwang pơđĭ kyar phrâo.

Hăng nua lŏn, ƀing pơ ala gong gai hăng anom bruă bơdjơ̆ nao tơring čar Lâm Đồng rơkâo Kơnuk kơna pơsit tơhnal pơkă wai lăng, anăp nao mă yua lŏn mơnai tong ten. Hrŏm hăng anun, kiăng pơgiong anih čih pioh hră pơ-ar lŏn mơnai kiăng pơthâo tong ten, ngă gêh gal brơi bruă sĭ mơdrô, jao glăi mă yua lŏn mơnai hăng huăi ƀuh anŏ gun phrâo amăng wai lăng.

Ơi Lê Trọng Yên, kơ-iăng Khua Jơnum min mơnuih ƀon sang tơring čar Lâm Đồng rơkâo hơmâo tơhnal pơkă bruă pơhrui glăi lŏn mơnai djơ̆ thun blan pơkôl hăng sa, dua akŏ bruă, sit biă ñu amăng bruă klơi mă gơnam amăng atur lŏn: “Hơdôm akŏ bruă mă gơnam amăng atur lŏn mơ̆ ƀing gơmơi pơhrui glăi lŏn hlao mơtăm ăt ngă tơnap tap. Yua mơnuih ƀôn sang lơm arăng pơhrui glăi lŏn mơnai, ƀing ta kiăng ĕp brơi anih bơwih ƀong kơ mơnuih ƀôn sang, yua hơget ƀing ta ƀu hơmâo tơhnal pơkă, hơdră bruă pơhrui glăi lŏn djơ̆ hrơi pơkôl. Bruă pơplih pơkra tơlơi phiăn pơhrui glăi lŏn mơnai djơ̆ hrơi pơkôl amra hrŏ ƀiă prăk duh djru pơdong plơi pla hăng hrŏ ƀiă prăk yua klơi mă alumin”./.