Bơyan hơjan hlim thun hlâo, hơdôm tal angĭn kruaih ngă sang dŏ kơ sang anŏ yă Nguyễn Thị Dung (kual Sơn Hà, tơring kual Na Dương, tơring glông Lộc Bình, tơring čar Lạng Sơn) jai dêk dôk. Yak nao bơyan puih, angĭn thut tui luh ƀơi pơnăng ngă rơ-ơ̆ rơ-ŏt amăng sang. Mah hơmâo gir run pơkrem prăk kak sui thun samơ̆ yua sang anŏ tơnap tap đơi, anun kiăng dưi man pơdong sang boh sang prong rơhaih, hơgŏm angĭn mơng yă Dung ăt aka ƀu dưi ngă…Yua anun, tết anai dưi čơkă thun phrâo amăng sang prong rơhaih rơbêh 40 met karê hơmâo pơnăng sir, bơbung kjăp, rang khăng ngă yă Dung hok mơ-ak biă mă:

“Rơkơi kâo ruă kơañăk mơng thun 1991, kâo ăt ruă aka na nao mơn, ană atâo yua rơbuh đih ăt rơngiă 2 thun anai laih, dŏ kơnong sa čô ană đah rơkơi hyu mă bruă kiăng kơ rông ba 5 čô yua anun tơlơi hơdip tơnap tap biă mă. Mơng hrơi hơmâo tơlơi pơtrun ruh hĭ sang tơ̆i rơ̆i, Ping gah, Kơnuk kơna, Ding jum kông ang, djop gơnong bruă, khul grup, ƀing čơmah hơmâo đing nao djru brơi man pơdong sang prong rơhaih, sang anŏ gơmơi hok mơ-ak biă mă”.

Hăng pran jua “Anăm brơi hlơi ôh dŏ glăi gah tlôn”, tơring glông Lộc Bình, tơring čar Lạng Sơn glăk pơtrut tañ bruă man pơdong 292 boh sang prong rơhaih brơi hơdôm boh sang anŏ ƀun rin, giăm ƀun rin, sang anŏ tui hơdră djru. Rĭm boh sang nua ñu giăm 110 klăk prăk, amăng anun Ding jum kông ang djru brơi 70 klăk prăk. Ơi Trịnh Tuấn Đông, Khua Jơnum min mơnuih ƀôn sang tơring glông Lộc Bình, tơring čar Lạng Sơn brơi thâo, hơdôm boh ƀon lan amăng tơring glông glăk pơtrut tañ hăng dưi ngă pơgiong tui hơnong pơkă ba tơbiă.

“Bruă pok pơhai akŏ bruă ruh hĭ sang tơ̆i rơ̆i, sang dŏ jang jai lĕ tơlơi črâo trun prong mơng Ping gah hăng Kơnuk kơna, tơlơi anai yôm phăn biă mă, djru brơi neh met wa, sit biă ñu lĕ hơdôm boh sang anŏ ƀun rin, giăm ƀun rin, sang anŏ tui hơdră djru dưi  tŭ mă tơlơi đing nao mơng djop gưl. Ƀing ta kiăng gum tơngan hrŏm pơgôp ruah hĭ sang tơ̆i rơ̆i, sang dŏ jang jai, djru brơi neh met wa hơmâo sang phrâo kiăng bơyan čơkă thun phrâo pơđao pran jua. Lơm pok pơhai ƀing gơmơi ăt pơtrut pơsur abih bang mơnuih amăng tơring čar hăng pran jua hơmâo hơget djru brơi anun, kiăng ngă hiưm pă dưi man pơdong 292 boh sang brơi neh met wa čơkă thun phrâo tui phiăn juăt mơ-ak mơ-ai hăng pơđao pran jua”.

Yap truh lơ 17/12/2024, Jơnum min djop djuai ania mơnuih mơnam Việt Nam tơring čar Lạng Sơn hơmâo tŭ mă rơbêh 77 klai prăk, amăng anun hơmâo jao brơi jang jai prăk kơ hơdôm boh tơring glông man pơdong sang phrâo brơi hơdôm boh sang anŏ tơnap tap hăng nua ñu giăm 51 klai prăk. Hơdôm sang anŏ hơmâo djru brơi sang dŏ lĕ rơbêh 2.400 boh sang, bruă man pơdong dưm dưm rơbêh 80%. Ơi Hồ Tiến Thiệu, Khua Jơnum min mơnuih ƀôn sang tơring čar Lạng Sơn pơsit tong, tơring čar gir run ruh hĭ giăm 2.500 sang tơ̆i rơ̆i, sang dŏ jang jai brơi hơdôm boh sang anŏ ƀun rin, giăm ƀun rin, sang anŏ djru hơkrŭ tơnap tap…hlâo kơ blan 4/2025.

“Ƀing gơmơi đing nao prong hloh kiăng gir run ruh hĭ sang tơ̆i rơ̆i, sang dŏ jang jai amăng thun 2024-2025, hơmâo jak iâu gum pơgôp mơng mơnuih mơnam hăng abih tih giăm 160 klai prăk. Ră anai bruă mă glăk pok pơhai ječ ameč, djơ̆ hăng jơlan gah, tơlơi git gai mơng Khua dêh čar lĕ pơjing bruă mă hrŏm amăng mơnuih mơnam, kiăng abih bang mơnuih gum tơngan hrŏm mơ̆ ƀu kơnong sa anom bruă hơpă ôh, bruă anai hơmâo lar hyu djop anih, ba glăi tơlơi đăo gơnang, ngă hur har pran jua mơnuih ƀôn sang. Anai lĕ bruă mă yôm phăn djru brơi mơnuih mơnam, pơdah tơlơi đing nao mơng Ping gah hăng kơnuk kơna brơi mơnuih ƀôn sang, sit biă ñu lĕ hơdôm boh sang anŏ tơnap tap. Hơdôm boh sang anŏ aka ƀu hơmâo sang dŏ sir kjăp mơ̆ truh tết Ất Tỵ anai amra hơmâo sang phrâo, anai lĕ tơlơi juh alum hăng ngă hur har pran jua hơdôm boh sang anŏ amăng tơring čar”.

Bơyan bơnga glăk trun rai laih, hơdôm boh sang “Gum pơgôp” hơmâo man pơdong ƀu djơ̆ kơnong ba glăi tơlơi khăp pap, pơdah pran jua thâo djru tơdruă mơng mơnuih mơnam đôč ôh mơ̆ ăt lĕ kiăng juh alum, pơtrut pran jua kiăng neh met wa kual čư̆ siăng giăm guai Lạng Sơn đong pran jua pơđĭ kyar bơwih ƀong huă, hơđong tơlơi hơdip mơda, hrưn đĭ pơklaih mơng ƀun rin./.