Ƀơi tơdrun kompan Quy Nhơn, hơdôm hơpluh čô khua mua, ling tơhan pơgng guai dêh čar amăng ia rơsĭ mrô 2 hăng puih kơđông pơgang guai dêh čar amăng jang tơdrun kompan Quy Nhơn dik dăk hăng bruă mă pơdŭ trun 120 tơn braih yua anom bruă djă pioh kông ngăn braih mơ̆ng dêh čar, ba nao djru brơi kơ mơnuih ƀôn sang tơring čar Gia Lai. Ia hŏu ƀlĕ brĭ brĭ ƀơi tơkuai hăng mơsah abih bra hơpăl djop pô samơ̆ gơñu ăt gir run ngă bruă abih pran jua ƀu pơdơi ôh, kiăng hmao tŭ mă braih anun ba nao djru kơ ană plơi pla ƀơi să Quy Nhơn Bắc, Quy Nhơn Đông hăng Tuy Phước, hơdôm kual răm ƀăm kơtang hloh ia ling dăo ngă. Khua tơhan trung tá, Nguyễn Tùng Giang, khua apăn bruă kơđi čar Puih kơđông tơhan pơgang guai dêh čar amăng jang tơdrun kompan Quy Nhơn, brơi thâo:

“Ƀing gơmơi jak iâu lu mơnuih pơdrong čơmah djru ba hơmâo 3000 anung gơnam, 300 blah abăn khăn, 30 khô̆i ia ba nao djru ană plơi pla amăng kual ia lip ƀu tơbiă hyu. Hrơi blan pơ anăp, ƀing gơmơi ăt mơ-it nao ƀing tơhan djru mơnuih ƀôn sang kiăng mă bruă pơwơ̆t glăi tơlơi hơdip mơda kah hăng tơđar”.

Hrŏm hăng tơhan pơgang guai dêh čar djru abih pran jua tŭ mă gơnam djru hăng djru pơdŭ pơgiăng gơnam arăng djru, lu puih kơđông tơhan pơgang guai dêh čar hăng ƀing tơhan blah ngă pơpha hyu mă bruă nao tơl djop plơi pla djru ba tơlơi hơdip mơda ană plơi. Ƀơi să Ngô Mây hăng Cát Khánh, 20 čô khua mua, ling tơhan pơgang guai dêh čar ƀơi Cát Khánh ngă hrŏm hăng tơhan amăng plơi pla, pơpha nao 15 boh rơdêh pơgiăng gơnam nao djru pơ hơdôm plơi Chánh Hưũ, Chánh Định, Chánh Hội hăng Vân Trim. Sa anăp nao djru mơ̆ng tơhan blah ngă tơhan pơgang guai, trun nao pơ djop anih jơlan pơčah, lŏn tơhlom, kuăi pơhuet hĭ lŏn ngă gun jơlan, duñ mă boh pơtâo, kiăng hơmâo jơlan mơnuih ƀôn sang rô nao rai, djru glăm ba gơnam, rơnăk atông sang kơ mơnuih ƀôn sang. Thiếu tá, Nguyễn Hữu Tự Thắng, khua apăn bruă kơđi čar, Kơ-iăng Khua puih kơđông tơhan pơgang guai dêh čar Cát Khánh, kah pơpha:

“Ră anai, lu arăt jơlan phun nao rai hluh laih. Puih kơđông tơhan pơgang guai Cát Khánh ngă hrŏm hăng lu khul tơhan pơkŏn dŏ amăng să hyu djru, jak iâu ƀing pơdrong, mơnuih čơmah djru ba, tŭ mă gơnam arăng mơ-it brơi kơ mơnuih ƀôn sang gơnam ia mơñum, mơnong ƀong huă, gơnam yua rĭm hrơi, ia jrao, bao nao truh pơ mơnuih ƀôn sagn či kiăng yua; djru kih rơmet duñ djah djâo, kuăi hlŭ ƀơi lan sang hră, kiăng ƀing čơđai sang hră tañ glăi hrăm hră”.

Ƀơi sang hră gưl dua Nguyễn Bá să Tuy Phước, Lữ đoàn 573 tơhan kual 5 djru kuăi hlŭ, dơlut, dăp glăi kơƀang grê, rơnăk sang hră, anih hrăm, prăp brơi kơ čơđai sang rhă pơwơ̆t glăi hrăm hră klă hloh hăng rơnuk rơnua dŏ amăng anih hrăm. Nai neh pơtô hrăm hră Hồ Thị Minh Phụng ol kơdol pran jua lăi:

“Ƀing tơhan ƀô̆ đô̆i hơmâo djru kơ sang hră, tơdah dŏ tơguan ƀing nai hă sang anŏ ƀing gơñu aka ƀu hmao rơmet mơ̆n hiư̆m thâo rai mă bruă ƀơi sang hră. Yua kơ anun, bơni lu biă mă kơ ling tơhan djru kơ djop sang hră hmao djru brơi kơ čơđai sang hră tañ pơwơ̆t glăi hrăm hră”.

Amăng tal hơjan hlim ia ling dăo kơtang aka ƀu hơmâo djơ̆ ôh phrâo anai, hơdôm hơpluh rơbâo čô khua mua, ling tơhan kual 5, khul ling tơhan mrô 34 hăng khua sang bruă tơhan blah ngă tơring čar Gia Lai hơmâo pơphun hrŏm djru kơ mơnuih ƀôn sang, ngă hrŏm hăng tơhan kông an laih anun gong gai kơnuk kơna amăng kual plơi pla pơphun hyu djru pơklaih brơi mơnuih ƀôn sang amăng mông ječ ameč, pơdŭ đuăi mơnuih ƀôn sang mơ̆ng anih hŭi rơhyưt hơdôm rơtuh rơbâo čô đuăi nao dŏ pơ anih hơđong; pok pơhai nao djru hơdôm hơpluh rơbâo čô mơnuih ƀôn sang amăng hŭi rơhyưt hloh yua lŏn adai ngă. Yua hơmâo pơdjru mă bruă khut khăt, hmao kru anun, mah tơlơi răm ƀăm prong kông ngăn yap hơmâo rơbêh 1000 klai prăk, Gia Lai ăt plai ƀiă mơ̆n hơmâo tơlơi djai brŭ lu mơnuih. Hăng kual ia ling dăo ƀơi Gia Lai, ling tơhan jing kah hăng pông kơsu djru pơklaih tơlơi hơdip mơnuih ƀôn sang, anih ưh kơnang hơđong, gum hrŏm mơnuih ƀôn sang dưi găn rơgao tơlơi lông lăng hŭi rơhyưt.

Bơ ƀơi să Đồng Xuân, tơring čar Dak Lak, Đại tá Nguyễn Trường Sinh, Khua khul tơhan Sư đoàn 2, tơhan kual 5, brơi thâo, ia ling dăo kơtang ngă răm lu ring bruă pioh kơ mơnuih ƀôn sang hăng sang anŏ mơnuih ƀôn sang. Khul bruă mă mơ̆ng ƀing tơhan blah ngă djru mơnuih ƀôn sang lu hăng prong biă mă, kih rơmet rah, pơsir anŏ hơdjă ia rơgoh, anih dŏ, kiăng huăi hơƀak jrak kơtang, djru mơnuih ƀôn sang pơhrêp glăi pưk sang đang hmua dơ̆ng. Hăng pran jua gir run khut khăt hloh, anom bruă tơhan gir ngă giong tañ bruă jao djru ba amăng kual ia ling dăo ngă.

“Ƀing khua mua, ling tơhan Sư đoàn 2 gir run khut khăt hloh, hăng hrơi mông jao hmar hloh, amra gir run gum hrŏm gong gai kơnuk kơna amăng kual plơi pla, ƀing ling tơhan djru bruă amăng kuall pơsir hĭ hơdôm phun hlâo hloh, anih răm kơtang kiăng tañ pơphun glăi bruă mă mơ̆ng gong gai kơnuk kơna, biă mă ñu anih hrăm hrăm sang ia jrao laih anun sang bruă kơnuk kơna, bơwih brơi kơ mơnuih ƀôn sang tañ pơwơ̆t glăi bruă mă kah hăng tơđar”.

Đại tá Đinh Văn Hưng, khua apăn bruă kơđi čar gah sang bruă khua tơhan tơring čar Dak Lak brơi thâo, tơdơi kơ ngă giong bruă djru pơklaih mơnuih ƀôn sang, ră anai djop sang bruă tơhan pơtum nao djru ba mơnuih ƀôn sang rơnăk hĭ pưk sang đang hmua, anih dŏ, plơi pla, pơkra glăi jơlan glông nao rai, pơhrêp glăi sang hră, sang ia jrao, pơkra glăi atông sang mơnuih ƀôn sang răm, djru ba mơnong ƀong huă, ia jrao, ia mơñum brơi kơ mơnuih ƀôn sang, wơ̆t abăn khăn, sum ao pơđao, gŏ amŏ tơnă asơi, hơbai añăm kiăng mơnuih ƀôn sang hơđong tơlơi hơdip mơda.

“Bruă ngă khut khăt kơtang hloh mơ̆ng ƀing khua mua, ling tơhan pơgang guai dêh čar, djop puih kơđông tơhan amăng kual, tơhan blah ngă mơ̆ng tơring čar hlăk dŏ mă bruă amăng plơi pla, mă bruă lui mơ̆ng truh hrơi rŭ pơdong glăi tơlơi răm ƀăm ia ling dăo ngă, biă mă ñu anŏ răm ƀăm ia ling dăo anai kơtang đơi, djop puih kơđông khom ngă giong bruă jao kah mơ̆ng glăi pơ anih mă bruă ngă tui hơdôm bruă tŏ tui dơ̆ng”.

Amăng tal hơjan hlim, ia ling dăo truh, rup rap ƀing ling tơhan sa wơ̆t dơ̆ng kơđŏm glăi amăng pran jua ană plơi, ƀu kơnong ling tơhan blah ngă pơgang lŏn ia đôč ôh, dŏ jing anih ưh kơnang tong ten hloh kơ mơnuih ƀôn sang sit hơmâo tơlơi răm ƀăm truh yua lŏn adai ngă. Hlŭ dơlut ia kor ba aka krô, tơlơi hơdip mơda mơnuih ƀôn sang dŏ pơrơkă pơrơkưng djah djâo, kơƀah djop mơta mơnong ƀong huă, gơnam yua, tơngan khul ling tơhan ăt dik dăk mă bruă dŏ glăi hăng ană plơi, pơdong glăi sang, hrêp glăi atông, rơnưh anih dŏ kơđăp, kih rơmet lan sang, jơlan glông, sang hră, anih jơnum, sang bruă, pong pơnăng, păng pơga djru ba ană plơi laih anun pơpha brơi asơi huă, añăm ƀong ƀu lui mơnuih ƀôn sang ư̆ rơpa ôh. Ling tơan djru mơnuih ƀôn sang amăng kual ia ling dăo ƀu kơnong hăng pran jua đôč ôh, hăng tơlơi pơmin, tơlơi kjăp pap sit nik, Anun yơh tơlơi pơtrun mơ̆ng hơtai boh pran jua mơ̆ng sa čô tơhan rơnuk wa Hồ amăng rơnuk lŏn ia rơnuk ngă sang rơnang ngă hmua lŏn ia huăi hơmâo tơlơi blah mơkang wang plơi ră anai.