Dua boh sang hơmâo abih tih prăk tuh pơ alin 5 klai prăk yua Ding jum ling tơhan djru brơi, kiăng pơhlôm brơi anih jơnum ngui, kơtưn pran gum pơgôp ling tơhan-mơnuih ƀôn sang hăng pơgôp djă pioh gru grua djuai ania. Anom bruă git gai ling tơhan tơring čar Dak Lak hơmâo jao ngă pô tuh pơ alin, gum hrŏm hăng gưl Ping gah, gong gai ƀon lan pok pơhai man pơdong.

Lơm anun, sang jơnum plơi pla ƀơi ƀuôn Kđoh hơmâo man pơdong tui rup sang gru grua djuai ania Êđê, prong 150 met karê; sang ƀơi thôn 12, să Ia Rvê prong 180 met karê, hơmâo man pơdong tui sang jơnum juăt yua. Hơdôm boh sang jơnum anai amra jing anih mơnuih ƀôn sang pơbưp, pơlăi nao rai bruă bơwih ƀong, pơphun ngui adôh suang, bơrơguăt drơi jăn. Ƀrô tal anai, hơdôm anom bruă hơmâo ƀơk gơnam brơi ană plơi pla, sang anŏ tui hơdră djru hăng hơdôm boh sang anŏ tơnap tap amăng ƀon lan.