Ƀơi Sang hră gưl II Chu Văn An (să Ia O, tơring čar Gia Lai), đại tá Đoàn Ngọc Báu- Khua anom bruă git gai tơhan wai pơgang guai tơring čar Gia Lai nao ƀơk gơnam juh alum thun hrăm phrâo brơi 2 čô čơđai tui jơlan hơdră “Čung ba čơđai nao sang hră” hăng 20 čô čơđai pơkŏn amăng akŏ bruă “Ƀing apăn bruă, ling tơhan čung ba čơđai nao sang hră”, hăng abih tih nua ñu rơbêh 150 klăk prăk. Hơdôm gơnam ƀơk anai pơdah prăk khăp pap, tơlơi glăm ba mơng tơhan giăm guai brơi ƀing čơđai.

Anai ăt lĕ tơlơi pơsur kiăng ƀing čơđai găn rơgao tơnap tap, hơđong pran jua hrăm hră. Jŭ yap rôk tui jơlan guai Gia Lai, hơdôm anom bruă tơhan wai pơgang guai tơring čar hơmâo ƀơk brơi 85 anung gơnam (nua ñu 2 klăk prăk sa anung) tui jơlan hơdră “Ană rông puih kơđong tơhan” hăng 193 anung gơnam, rĭm anung 7,4 klăk prăk amăng akŏ bruă “Čung ba čơđai nao sang hră”. Abih tih prăk mă yua amăng tal anai giăm 1,6 klai prăk.