Kual Dap Kơdư prong giăm 55.000km2, anih hơmâo 5 klăk čô mơnuih hăng 54 phung djuai hơdip hrŏm. Hrŏm hăng neh met wa djuai ƀiă pơ anai, Dap Kơdư ăt jing anih mơ̆ lu djuai ania pơkŏn mut rai dŏ, bơwih ƀong, amăng anun lu mơnuih tơnap biă, mơnuih ƀôn sang dŏ amăng sang phŏ, sang tơ̆i lu biă.

Kiăng djru ba mơnuih ƀôn sang tơnap tap, rim thun hơdôm boh tơring čar, plơi pla amăng kual lêng kơ tuh pơ alin hơdôm hơpluh klai prăk, man pơkra hơdôm rơtuh boh sang gum pơgôp djuai ania. Truh pơ thun 2025 anai, man sang phrâo, lŏm lui sang dŏ tơ̆i sang phŏ jing bruă pơplih prong biă, lơ̆m hơdôm anom bruă, gong gai plơi pla ngă tui tơlơi jak iâu mơ̆ng Khua dêh čar, gir ruh abih hơdôm boh sang dŏ tơ̆i, man pơdong sang dŏ hiam, kjăp hloh amăng đơ đam dêh čar. Jơlan hơdră anai yôm biă mă, ƀu kơnong djru hơdôm boh sang anŏ rin, sang anŏ tơnap tap man pơkra sang dŏ phrâo kjăp, ăt ngă ană plơi kơnang hloh kơ gong gai kơnuk kơna.

“Mơnuih gum tơngan man pơdong sang dŏ phrâo,  glăm ba bruă wai lăng rơnuk rơnua”, lăi nao tơlơi gir run prong phara biă mơ̆ng kông an djŏp gưl, jing mơnuih gơgrong bruă amăng jơlan hơdră lŏm lui sang dŏ tơ̆i, sang phô̆, pơjing tơlơi đăo kơnang ƀơi kual Dap Kơdư.

Amăng hơdôm hrơi či abih blan 7, lơ̆m glăk hơmâo pơ-iă, Thiếu tá Trần Văn Dũng – Kơ-iăng khua kông an să guai dêh čar Quảng Trực (tơring čar Lâm Đồng) hrŏm hăng ƀing gŏp trun nao pơ ƀôn Bu Prăng 1A luk simăng, pơdŭ ƀrik, man pơgiong hĭ hơdôm boh sang dŏ glăi, đah mơ̆ng tañ jao glăi sang dŏ kơ 66 boh sang anoư amăng să. Thiếu tá dũng brơi thâo, amăng hrơi mông abih bang anom bruă, khul grup mă bruă tui gong gai 2 gưl, bruă mă mơ̆ng Kông an să lu hloh 2 wơ̆t hăng hlâo kơ anun. Yua hnun, ƀing adơi ayong lêng kơ pơđĭ pran, pơtăng arăt biă mă đah mơ̆ng dưi ngă 3 mơta bruă sa wơ̆t: Bruă ngă hră pơ-ar, wai lăng rơnuk rơnua wơ̆t hăng lŏm lui sang dŏ tơ̆i sang phô̆ amăng plơi pla, dưi ngă djơ̆ hăng hơdră ba pơƀuh blung a.

“Kông an să hơmâo jơnum hăng jao bruă kơ rim grup kiăng thâo rơđah grup man sang dŏ kiăo tui rim kual plơi pla, ƀôn lan hơmâo hơdôm boh sang anŏ, hơmâo anăn man pơdong sang tui jơlan hơdră djru kơ ƀing sang anŏ dŏ amăng sang tơ̆i, sang phŏ. Gơmơi krăp lăng bruă man pơdong anai kiăng ngă brơi kjăp, pơnăng ten, atur khăng, hăng pơbung kjăp. Rơngiao kơ anun dong, ăt krăp lăng bruă jao glăi sang dŏ kơ neh met wa, kiăng dưi tañ đĭ dŏ”.

Ƀơi tơring čar Gia Lai, bruă lŏm lui sang dŏ tơ̆i sang phô̆ ăt glêh kơtang mơn, yua dah hơmâo pơkra brơi 12.500 boh sang, amăng anun Kông an gơgrong man pơkra rơbêh 6.500 boh sang. Kiăng tañ ngă giong, ƀing khua, mơnuih apăn bruă kông ang hyu ĕp mă pô mơnuih man pơkra sang kjăp tơngan, nao tơña hơdôm boh sang sĭ pơtâo čuah, pơsơi pơsă…Hơmâo mơđa dong brơi tom prăk blan ñu pơkom lui. Trung tá Lê Đình Hải – Kơ-iăng khua kông an să Ia Pa, tơring čar Gia Lai jing sa čô mơnuih ngă bruă anun. Ñu jing sa čô mơnuih yôm biă amăng hrơi đĭ dŏ sang mơ̆ng yă Kpă Huê, tha ƀu hơmâo pô čem rông, rơwen rơwô pơ plơi Ma San, să Ia Pa. Yă Rmah H’Đa, Khua plơi Ma San brơi thâo:

“Plơi Ma San phrâo anai hơmâo 2 čô kơnuk kơna djru man pơkra sang dŏ phrâo. Hơjăn sang yă Kpă Huê yua ơi Hải djru ba 80 klăk; sa boh sang pơkŏn dong hơmâo Kơnuk kơna djru 60 klăk. Thâo hluh tơlơi lăng ba mơ̆ng Kơnuk kơna hăng Ping gah, neh met wa amăng plơi lêng kơ ngă tui klă tơlơi pơtrun, tơlơi git gai mơ̆ng Ping gah, tơlơi phiăn mơ̆ng Kơnuk kơna; ƀu hmư̆ tui ôh tơlơi arăng pơčut pơčao, lêng kơ gum pơgôp, ngă brơi plơi pla jai hrơi đĭ kyar tui”.

Trung tá Lê Đình Hải brơi thâo, bruă ñu brơi prăk ñu pơkom či man pơdong sang dŏ kơ ană plơi, ha bơnah yua kiăng ngă bang hyu bruă ngă hiam mơ̆ng jơlan hơdră lŏm lui sang dŏ tơ̆i phô̆, ha bơnah dong, anai jing bruă ngă kiăng dưi mut hrŏm, jê̆ giăm hăng ană plơi mơ̆ng sa čô khua kông an wai lăng plơi pla:

“Yă Kpă Huê jing mơnuih phara hloh hăng pô pơkŏn yua dah ñu rơwen rơwô, dŏ tom ană tơčô ñu laih anun ƀu hơmâo nih ngă hmua pla đang hơget ôh, sang dŏ hai tơ̆i mơn. Ñu ƀu hơmâo anăn lŏm lui sang dŏ tơ̆i phŏ ôh, kâo pô pơmin nao pơmin rai mơn, anun glăi tơña lăng bơnai kâo. Kâo pơčrông, lăi pơthâo rơđah hăng bơnai kâo lĕ ta ngă bruă jê̆ giăm ană plơi, ƀing gơ̆ djru ba ta dưi ngă giong bruă, laih anun ta kiăng brơi kơ ñu sa boh sang kiăng ñu hơdip mơak lui kơ djai. Kâo lăi tui anun jing bơnai kâo tŭ, laih anun kâo lăi pơhmư̆ hăng Ping gah, iâu arăng glăi man sang brơi yă Huê”.

Mơ̆ng bruă sem lăng, kual Dap Kơdư hơmâo năng ai 18.000 boh sang anŏ tơnap, ƀu hơmâo sang dŏ. Kiăo tui jơlan hơdră iâu pơthưr man podong sang phrâo mơ̆ng Kơnuk kơna, hơdôm boh tơring čar čih pơkra hơdră ngă bruă tong ten, iâu pơthưr djru brơi prăk kăk, abih bang mơnuih gum lŏm lui sang dŏ tơ̆i sang phô̆ ƀơi hơdôm boh tơring. Tơhan kông an jing anom bruă nao hlâo ngă tui, lơ̆m gơgrong hơduah ĕp prăk kăk, gơnam pioh man pơkra sang hăng mơnuih mă bruă, laih dong nao lăng, pơtrut pơsur ƀing man sang kiăng tañ giong, krăp lăng ƀơi rơbêh 12.700 boh sang. Truh rơnuč blan 7, abih bang hơdôm boh sang dŏ phrâo yua tơhan kông an man pơkra, hơmâo mă yua laih, jao glăi kơ hơdôm boh sang anŏ. Amăng hrơi mơak mơai đĭ dŏ sang phrâo, amai H’Miên Ayun, ƀơi tơring čar Dak Lăk lăi:

“Kâo mơak biă mă yơh, ƀu thâo lăi hiư̆m pă dong tah. Hơmâo sang dŏ phrâo baih, huăi hơdip amăng sang tơ̆i phô̆, hơjan hlim kơsaih, pơ-iă pơčrang dong tah”.

Bơni kơ pran jua găn rơgao tơnap tap, yua kơ mơnuih ƀôn sang wơr drơi pô, yua kơ mơnuih ƀôn sang mơ̆ bơwih brơi, mơ̆ng tơhan kông an kual Dap Kơdư, Trung tướng Phạm Thế Tùng, Kơ-iăng khua Ding jum kông an lăi, amăng hrơi mông anom bruă kơnuk kơna glăk pioh mông dăp glăi, tơhan kông an ƀrô ngă giong bruă wai lăng rơnuk rơnua ƀrô krăp lăng bruă man pơkra sang dŏ phrâo kơ ană plơi, anai jing tơlơi gir prong biă mă. Bruă ngă mơ̆ng tơhan kông an pơ hơdôm boh tơring čar Dap Kơdư ƀu kơnong djru hơdôm rơbâo boh sang anŏ tơnap tap dưi mut dŏ amăng sang phrâo đôč ôh ăt ngă ană plơi kual Dap Kơdư đăo kơnang kjăp tui hăng Ping gah, Kơnuk kơna, kơnang kơ hơdră gum djru.

“Ding jum kông an bơni biă mă kơ pran jua mơ̆ng Kông an hơdôm boh tơring čar kual Dap Kơdư hăng hơdôm anom bruă yua Ding jum wai lăng phun pơ anai, hăng tơlơi gơgrong bruă prong, ngă bruă gir, abih pran jua hăng tơlơi pơmin “yua kơ mơnuih ƀôn sang mơ̆ bơwih brơi”, jing ječ ameč ngă giong bruă prong biă amăng bruă man pơkra sang dŏ kơ mơnuih ƀôn sang. Kâo đăo kơnang, hăng anih dŏ phrâo, kjăp, hơdôm boh sang anŏ amra hơđong pran mă bruă pơkra gơnam, hrưn đĭ amăng tơlơi hơdip mơda, pơhlôm rơnuk rơnua hơđong amăng plơi, djru akŏ pơjing hăng đĭ kyar bơwih ƀong huă - mơnuih mơnam amăng plơi”.

Dap Kơdư ră anai hơmâo čư̆ hơmâo ia rơsĭ laih. Hăng hơdôm boh sang phrâo man pơkra, neh met wa ƀơi hơdôm boh plơi pơtruh kjăp laih hăng tơlơi hơdip pơ anăp. Jơlan hơdră lŏm lui sang dŏ tơ̆i phô̆ yua Khua dêh čar pơtrun hăng boh than hơmâo ngă ƀu kơnong kơđom gru tơlơi khăp pap, pơtrut lŏn ia đĭ kyar phrâo đôč ôh ăt pok rai hơdră iâu pơthưr abih bang anom bruă kơnuk kơna hăng mơnuih ƀôn sang gum ngă, pơsir brơi tơlơi tơnap tap mơ̆ng mơnuih tơpuôl. Tơdơi kơ pơmut hrŏm, hơdôm boh tơring ƀơi Dap Kơdư hơmâo glai, hơmâo čư̆. Bruă djru ană plơi tơnap tap tañ hơmâo sang dŏ hơđong amra jing kưl đĭ kiăng mơnuih ƀôn sang kual Dap Kơdư tañ hrưn nao pơ ia rơsĭ prong.

“Amăng jơlan hơdră tơdơi, črăn 2 mơ̆ng tơlơi čih “Lŏm lui sang dŏ tơ̆i, sang phô̆ - ngă kjăp pran đăo kơnang mơ̆ng djŏp plơi pla kual Dap Kơdư”, amra lăi nao tơlơi bang hyu, pơhưč bruă ngă khăp pap mơ̆ng jơlan hơdră anai, pơtrut pran jua hăng râu mơdrư tơlơi čang rơmang gum pơgôp mơ̆ng abih bang khua mua, mơnuih apăn bruă”.