Thun hrăm phrâo anai, Y Hiển Nhi, ană đah kơmơi bơn A Trang, plơi Kram, să Rơkơi, tơring čar Quảng Ngãi mut hrăm anih 1B sang hră đôm lăm dua gưl -gưl sa hăng gưl dua să Rơkơi. Dua wơ̆t hrơi tơjuh laih rơgao, rim hrơi mơtam ñu nao pơ sang hră kiăng ngă juăt hăng anih dŏ, sang hră phrâo. Hơdôm hrơi blung a dŏ sư̆ rơbư̆ đôč, hơmâo nai neh tŭ jum, pơtô brơi, amôn Y Hiển Nhi juăt laih hăng sang hră phrâo anai.

Rơkơi bơnai bơn A Trang amĭ ama ñu, abih ha hrơi dŏ pơ hmua anun bruă ba nao ană hrăm hră, hăng tŭ glăi ană mơ̆ng sang hră lĕ sa tơlơi bơngơ̆t prong biă mă Thun hrăm phrâo anai, A Trang hơđong mơ̆n pran jua lơ̆m sang hră dua gưl anai dưi man pơdong ƀơi să Rơkơi giong laih, ană amôn čơđai sang hră hơmâo anăn kơnuk kơna čem rông ba dŏ glăi hlao, hlơi aka ƀu hơmâo anăn lĕ dŏ glăi amăng tơhrơi, kơnuk kơna djru ha črăn, amĭ ama pơčruh prăk gơnam ƀong huă kơ ană bă dŏ glăi pơ sang hră, huăi rơngiă mông amĭ ama nao čơkă tlam mơguah.

“Pơ anai, mơnuih ƀôn sang nao hmua abih ha hrơi, ƀơi anŏ yang hrơi dong ƀu hơmâo mông wăn nao čơkă ană bă ôh. Tơdah dưi dŏ glăi yang hrơi dong ƀơi sang hră lĕ, amĭ ama čơđai sang hră plai ƀiă gleh glar, yua kơ bruă mă, nao pơ hmua dŏ glăi mă bruă hăng tơkai tơngan đôč, abih ha hrơi ataih mơ̆ng sang, ƀu dưi nao čơkă ană bă pơ sang hră ôh. Ră anai, amĭ ama čơđai sang hră gơmơi mơak biă mă ƀuh ană bă dưi nao sang hră hơđong, rơnuk rơnua, laih anun sang hră hơmâo amăng jang krĕp. Kơnuk kơna djru ba kual giăm guai dêh čar djơh hăng anai, amĭ ama čơđai sang hră mơak biă mă. Ăt čang rơmang tơdơi anai ană bă hrăm hră gir run hrăm thâo, anăm ngă kơ amĭ ama rơngôt ôh”.

Čơđai sang hră, dưi pơpha hrăm amăng 34 boh anih, amăng anun 20 anih hrăm gưl sa hăng 14 anih hrăm gưl dua. Kơ hơdră pơdong anih huă ƀong, anih dŏ, tơlơi rơnuk rơnua, pơhlom pơgang apui ƀong sang hăng rơnăk mơnong ƀong huă rơgoh hơdjă mơ̆ng tañ hnuăl hloh. Khua mua sang hră pok anih pơtô brơi ƀing mơnuih mă bruă amăng sang hră, wơ̆t ƀing nai pơtô hrăm, truh kơ ƀing ngă bruă wai lăng khul čơđai sang hră dŏ glăi hăng čơđai sang hră dŏ pơ rơngiao, kơnong dŏ glăi huă tơhrơi hai.

Sang hră đôm lăm dua gưl, gưl sa hăng gưl dua ƀơi să Mo Rai hlăk man pơdong ƀiă giong laih, aka ƀu dưi mut thun hrăm phrâo ôh. Să hlăk iâu pơtum abih glông bruă kơđi čar hăng tơhan plơi, tơhan pơgang guai dêh čar hăng kông ty 78, Binh đoàn 15, djru hrŏm kiăng ngă pơgiong sang hră djơ̆ hrơi pơkă.

Yua kơ sang hră phrâo aka man giong, čơđai sang hră gưl sa hăng gưl dua dŏ hrăm gliă pơ sang hră hơđăp jăng jai, kiăng hmao thun hrăm phrâo. Ơi Trương Công Chính, khua git gai ping gah să Mo Rai brơi thâo, truh ră anai, khul nai pơtô, ƀing wai lăng amăng sang hră hơmâo čih anăn pơhrua djop laih.

Črăn 1, tơring čar Quảng Ngãi mă yua 4 boh sang hră đôm lăm dua gưl ƀơi hơdôm să Yuk Nông, Sa Long, Rơkơi hăng Mô Rai amăng kơnôl 5/9/2026. Anom bruă pơtô hăng pơjuăt tơring čar Quảng Ngãi ngă hrŏm djop să, plơi pla, pơhrua nao mơnuih apăn bruă ngă khua, nai pơtô kiăng ngă giong bruă iâu pơmut thun hrăm phrâo hruaih, pơphun anih dŏ, anŏ ƀong huă kơ čơđai sang hră. Gơnam yua ba pơtô hrăm ăt khom prăp lui djop.

Ơi Nguyễn Ngọc Thái, Khua Gơnong bruă Pơtô hăng Pơjuăt tơring čar Quảng Ngãi brơi thâo, tơring čar hơmâo 9 boh sang hră gơnong dlông tuh pơ alin, hơmâo 4 boh sang hră črăn 1 hăng 5 boh sang hră črăn 2, dưi mă ngă giong, abih tih rơnoh prăk man pơdong lĕ 2000 klai:

“Anai lĕ jơlan hơdră djơ̆ lăp biă mă, jĕ giăm, bơwih brơi kơ bruă hrăm hră pơar đôč ôh, pơdjơ̆ nao kơ bruă gum hrŏm pơgang rơnuk rơnua, hơđong, pơgang guai dêh čar, huăi rung răng. Gơnong bruă Pơtô hăng Pơjuăt tơring čar Quảng Ngaĩ lăi pơthâo hăng jơnum min mơnuih ƀôn sang tơring čar brơi iâu pơtum lu mơnuih mă bruă, kơtưn ngă lu mông, pơblih nao rai mă bruă amăng hrơi mlam kiăng tañ ngă giong ba yua amăng thun hrăm phrâo djơ̆ tơhnal pơkă ƀơi tơring čar”.

Mơ̆ng să Rơkơi truh pơ Mo Rai, Sa Long, Yuk Nông, tơring čar Quảng Ngãi, hơdôm boh sang hră phrâo hlăk tơbiă đĭ pơƀuh ƀô̆ mơta hiam rô̆ plah wah amăng kual glai klô giăm guai dêh čar, ba tơlơi đăo kơnang hăng tơlơi čang rơmang prong kơ ƀing čơđai sang hră, amĭ ama hăng nai pơtô. Lơ̆m ƀing čơđai dưi hrăm djop, hơmâo anih dŏ hơđong, mơnuih ƀôn sang ăt gir run dŏ glăi ƀơi guai dêh čar, plơi pla ataih pơđĭ kyar bơwih ƀong huă či kual giăm guai dêh čar.