Ră anai, tơring čar Dak Lăk hơmâo rơbêh 1.060 čô mơnuih ană plơi kơnang hmư̆ hing, amăng 49 phung djuai ania hơdip pơ tơring čar. Gơñu jing mơnuih ba jơlan, ngă gru, thâo hluh dlăm tơlơi phiăn, tơlơi dŏ dong ƀong huă, tơlơi kiăng khăp mơ̆ng neh wa, jing mơnuih mơ̆ ană plơi kơnang biă; pơtruh brơi mơnuih ƀôn sang hăng gong gai, gir ngă bruă pơđĭ kyar bơwih ƀong huă - mơnuih mơnam, bong kjăp rơnuk rơnua, pơkơdong glăi tơlơi pơmin sat răm pơčut pơčao mơ̆ng ƀing ayăt, ƀing hil neč, pơblư̆ lŏn ia, djru ngă hơđong kơđi čar amăng plơi pla.

Ƀơi mông bưp, ƀing khua hơmâo lăi nao bruă iâu pơthưr pơtô ba mơnuih ƀôn sang, bơyai kơđi, ngă gong jơlan bơmơak brơi, akŏ pơdong plơi pla phrâo, iâu pơthưr hlăk ai nao ngă tơhan. Ơi Y Tum Ayun, mơnuih ană plơi kơnang ƀơi ƀuôn Ea Tuk, să Čư̆ Pơng, lăi tơlơi pơmin ha pran jua mơ̆ng neh met wa jing phun atur kjăp či akŏ pơdong plơi pla trơi pơđao, yâo mơ-ak. Yua hnun, rim čô mơnuih kiăng gir gum pơgôp, hơdip rơnôm, gum akŏ pơdong plơi pla:“Ăt nao hrŏm hăng ping gah, gong gai să akŏ pơdong plơi pla pơđĭ kyar bơwih ƀong huă, rơnuk rơnua kơđi čar, rơnuk rơnua mơnuih mơnam ƀơi să, plơi pla, por pơthâo, pơtô brơi neh met wa hơdôm tơlơi pơhing lăp djơ̆, iâu pơthưr neh wa gir bơwih ƀong, lăng ba ană bă hrăm hră, gir run pơklaih hĭ rin rơpa”.

Ƀing khua ăt pơčrông sai, lăi pơthâo hơdră ngă bruă pơđĭ tui tơlơi pơmin kơđiăng, pơkơdong mơnuih ngă soh sat, ngă rung răng, pơblư̆ kơnuk kơna, pơđĭ tui tơlơi gum pơgôp tơhan hăng mơnuih ƀôn sang.

Pơhiăp ƀơi mông bưp, Đại tá Niê Ta, Khua anom bruă git gai tơhan tơring čar Dak Lăk bơni kơ hơdôm tơlơi gum pơgôp prong, yôm mơ̆ng ƀing tha pơi, khua plơi, mơnuih ană plơi đăo kơnang hăng bruă pơgang lŏn ia, bruă ling tơhan. Laih dong kiăng mơnuih ană plơi đăo kơnang pơmut hrŏm hơbit tơlơi phiăn kơnuk kơna hăng tơlơi phiăn plơi pla, pơtô pơblang iâu pơthưr neh met wa rơ-uñ, mơ-ak:“Thâo kjăp jơlan hơdră, tơlơi pơtrun mơ̆ng Ping gah, tơlơi phiăn Kơnuk kơna, pơmut lăp djơ̆ tơlơi phiăn kơnuk kơna hăng tơlơi phiăn plơi pla kiăng pôr pơthâo iâu pơthưr mơnuih ƀôn sang hơdip hăng ngă bruă tui tơlơi phiăn. Pôr pơthâo, iâu pơthưr neh met wa djŏp djuai ania anăm hmư̆, anăm ƀong ia bah hơdôm tơlơi pơčut pơčao, pleč ƀlor mơ̆ng ƀing ayăt roh, ƀing pơblư̆ lŏn ia ngă rung răng lŏn ia, tơlơi ngă pô wai lăng Lŏn ia”.

Ƀrô tal anai, Anom bruă git gai tơhan tơring čar Dak Lăk hơmâo brơi hră bơni kơ 30 čô rơgơi djru bruă pơgang lŏn ia, bruă tơhan amăng thun 2025, djru akŏ pơdong abih bang mơnuih ƀôn sang gum pơgang rơnuk rơnua lŏn ia./.