Hơdôm hrơi rơgao, hơjan prong lu hrơi, ngă kơ lu să gah Ngŏ (tơring čar Phú Yên hơđăp) dŏ kơđông, ƀu thâo mut tơbiă, ƀu ƀiă ôh sang anŏ ƀu hơmâo asơi huă añăm ƀong, ƀu hơmâo sum ao, ia jrao gun, lơ̆m anun bruă nao djru tơnap mơn yua ia blai đĭ kơtang biă. Anăp pran jua kơ kual ia dăo, lu khul grup, ƀing juăt djru mơnuih tơnap, ječ ameč tŭ mă, kah pơpha, anung gơnam mơ-it kơ hơdôm plơi pla ƀu thâo tơbiă hyu. Jơnum min djŏp djuai ania mơnuih mơnam Việt Nam tơring čar Dak Lăk mơit hră iâu pơthưr mơnuih ƀôn sang gum rŭ glăi, ming pơkra tơlơi truh lŏn adai ngă, lăi rim tơlơi gum djru mah aset hai ăt yom mơn amăng bruă djru neh met wa găn rơgao tơlơi truh răm ƀăm, tañ hơđong glăi tơlơi hơdip.

Kiăng pơhlom ƀu lui hlơi ư̆ rơpa ôh ƀudah hŭi rơhyưt, gong gai kơnuk kơna tơring čar Gia Lai hơmâo brơi mă yua braih apiăng mơnong ƀong huă djru ba mơnuih ƀôn sang. Ơi Nguyễn Tuấn Thanh, Kơ-iăng khua Jơnum min mơnuih ƀôn sang tơring čar Gia Lai brơi thâo, tơring čar hlăk pơtum đut tơhnal amăng bruă djru pơgang ba mơnuih ƀôn sang. Ƀơi anih ba nao mơnuih ƀôn sang dŏ, tơring čar Gia Lai djru dŏ hrŏm lăng ba hrơi mlam, kiăng huăi hơmâo tơlơi rung răng, djru ba ia jrao gun, mơnong ƀong huă, biă mă ñu ia mơñum kơ hơdôm rơtuh čô mơnuih khom đuăi mơ̆ng sang. Lu kơthung mì tôm, ia mơñum, abăn buk, apui pit pơčrang….ba nao pơ kual mơnuih ƀôn sang dŏ. Ƀu kơnong mơnuih ƀôn sang amăng tơring čar đôč ôh, lu khul mơnuih djru tơlơi khăp pap tơring čar pơkŏn ăt nao pơ Gia Lai, djă ba ia jrao, ao hơjan, mơnong ƀong huă tañ pioh djru mơnuih ƀôn sang.