Čơkă hrơi Jơnum ruah khua ping gah dêh čar tal 14 ƀu kơnong dŏ tơguan đôč ôh ăt glăk ngă hăng hơdôm bruă ngă sit nik, nao hrŏm hăng tơlơi hơdip mơnuih ƀôn sang. Ƀơi lu boh tơring mơ̆ng Dak Lak, bruă kơtưn hơdip hiam, pơhrup hiam plơi pla, ngă hiam anih anom, ayuh hyiăng, akŏ pơdong khul gum pơgôp abih bang djuai ania hơmâo pơtrut kơtang kah hăng hơdôm “ring bruă amăng pran jua ană plơi” čơkă mông Jơnum. Ƀơi ƀut plơi 6A, phường Thành Nhất, hrơi mông čơkă Jơnum ruah khua ping gah dêh čar tal 14 hơmâo pơdah rơđah hăng bruă mă yua grup ping gah hăng ƀut plơi pơphun. Ơi Nguyễn Ngọc Thu, Khua ping gah plơi, Khua ƀut plơi 6A brơi thâo:“Čơkă hrơi Jơnum ruah khua ping gah dêh čar tal 14, Ƀut plơi 6A pơphun bruă akŏ pơjing tơlơi hơdip hiam amăng plơi. Pơkra jơlan hla gru čar hăng iâu mơnuih ƀôn sang pơkra jơlan kiăng hiam, agaih, čơkă hrơi Jơnum. Mơnuih ƀôn sang čang rơmang hăng đăo kơnang abih pran jua kơ mông Jơnum anai, hăng klao hok biă mă. Čang rơmang Jơnum anai amra truh kih hloh dong, ba glăi tơlơi hiam klă tŭ yua kơ mơnuih ƀôn sang”.

Ƀơi hơdôm boh plơi djuai ania aset, biă ñu pơ guai, pran jua čơkă Jơnum ruah khua hơmâo tŭi jă kơtang biă mă, biă ñu amăng khul hlăk ai tơdăm dra, djă ba pran kơtưn đĭ, triang bơwih ƀong. Ƀơi plơi Drang Phôk, să Buôn Đôn, hlăk ai ruah bruă čơkă mông Jơnum hăng bruă ngă sit, akŏ pơdong plơi pla hiam, đĭ kyar hơđong. Amai H Ly A Knul, Khua hlăk ai ƀuôn Drang Phôk, să Buôn Đôn, tơring čar Dak Lăk lăi:“Hlăk ai ƀuôn Drang Phôk pơsit hăng bruă ngă sit nik, hyu kih rơmet, iâu neh met wa čơkă Jơnum ruah khua ping gah dêh čar tal 14. Gơmơi čang rơmang mông jơnum pơ anăp, amra hơmâo lu hơdră djru ba hlăk ai pơ guai, dưi bơwih ƀong hăng đĭ kyar bơwih ƀong amăng sang anŏ hăng amăng plơi”.

Hơdôm bruă ngă anun brơi ƀuh, Jơnum ruah khua ping gah dêh čar tal 14 jing anŏ kơnang, jing anih mơit tơlơi čang kơ hơdră ngă bruă sit nik, djơ̆ hăng tơlơi kiăng, biă ñu hăng kual mơnuih ƀôn sang djuai ƀiă, kual ataih, pơ guai dêh čar.

Hrŏm hăng mơnuih ƀôn sang, ƀing khua amăng plơi - pô pok pơhai jơlan hơdră mơ̆ng Ping gah mut amăng tơlơi hơdip - ăt glăk krăp lăng mông Jơnum hăng lu tơlơi čang rơmang.Ƀơi phường Ea Kao, tơlơi čang anun nao hrŏm hơbit hăng tơlơi kiăng pơplih tơlơi pơmin git gai, pơkra giong hơdră ngă bruă, tơlơi phiăn, pơtrut pran jua brơi ƀing khua khin pơmin khin ngă, gơgrong bruă yua kơ tơlơi đĭ kyar mơ̆ng plơi pla. Ơi Đặng Gia Duẩn, Khua Ping gah phường Ea Kao, tơring čar Dak Lăk lăi:“Jơnum anai amra pơčrông hơdôm bruă yom mơ̆ng lŏn ia, amăng anun gơmơi čang rơmang amra hơmâo tơlơi lăp đing nao hloh kơ khua mua amăng să, phường. Mah khua mua sang să hlâo adih ƀudah khua ƀơi tơring čar, tơring glông glăi pơ anai hai kâo pơmin rim čô khua djă hơnong pran jua kiăng plơi pla đĭ kyar. Yua hnun, bruă tŭi rơđah pran jua anun hiư̆m pă kiăng tơlơi plih prong, kiăng hơmâo hơdră brơi ƀing khua pơčeh phrâo, pơlir hăng jao bruă, kah pơpha gưl ngă bruă đah mơ̆ng dưi ba tơbiă hơdră ngă bruă, hơdră djru bơdjơ̆ nao kiăng plơi pla dưi đĭ kyar”.

Mơ̆ng plơi prong truh pơ ƀon lan, mơ̆ng kơdư truh pơ dơnung, truh pơ guai dêh čar, hơdôm tơlơi čang rơmang anun glăk pơtum glăi kar hăng glông ia rô: pran đăo kơnang kơ Ping gah, kơ jơlan đĭ kyar mơ̆ng lŏn ia amăng rơnuk phrâo. Hăng Dak Lăk - anih hơmâo lu phung djuai hơdip hrŏm, hơmâo lu tơlơi gêh găl samơ̆ ăt lu mơn tơlơi lông - Jơnum ruah khua ping gah hơmâo mơnuih ƀôn sang mơit tơlơi čang rơmang pok rai jơlan ngă bruă phrâo, đĭ kyar hloh, kiăng Dak Lăk lăi hơjăn hăng hơdôm boh tơring amăng dêh čar lăi hrŏm đĭ kyar tañ hăng hơđong hloh amăng rơwang phrâo.