![VOV Tây Nguyên/Nay Jek pơblang](/themes/custom/vov_4/images/avatar.png)
Grup khua mua pơ ala mơnuih ƀôn sang dêh čar ƀơi tơring čar Dak Nông hơmâo pơphun dua wơ̆t jơnum, bưp mơnuih ruah khua ƀơi să Trường Xuân, tơring glông Dak Song, să Dak Som, tơring glông Dak Glong. Jơnum lok laih rơgao, mơ̆ng ƀing pơ ala mơnuih ƀôn sang dêh čar hơmâo pơsit hơdôm pok hră pơtrun kơ jơlan hơdră tuh pơ alin čuk pơkra jơlan rơdêh đuăi hmar Gia Nghĩa–Chơn Thành hăng anŏ glông, ataih giăm truh 130 km, rơnoh prăk tuh pơ alin abih tih lĕ 25.540 klai prăk.
Lu mơnuih ruah khua pơdah rai pran jua hok mơak mơ̆n, lăng yôm tơlơi glăm ba mơ̆ng Grup khua mua pơ ala mơnuih ƀôn sang ƀơi tơring čar Dak Nông hơmâo lăi pơthâo tơlơi kiăng mơ̆ng ană plơi pla, pơtruh brơi amăng mông jơnum prong khua mua pơ ala mơnuih ƀôn sang dêh čar, kơ bruă kiăng čuk jơlan rơdêh đuăi hmar. Mơnuih ruah khua čang rơmang biă mă kơčăo bruă anun tañ pok pơhai, pioh kơ jơlan rơdêh đuăi hmar anun tañ ngă giong, djru kơ bruă rô nao rai, pơgiăng gơnam sĭ mơdrô, laih anun djru mơnuih ƀôn sang tañ mơ̆n dưi nao pơkă lăng pơjrao duăm ruă pơ sang ia jrao prong hloh.
![Mơnuih ruah khua ƀơi Dak Nông čang rơmang biă mă jơlan rơdêh đuăi hmar Gia Nghĩa-Chơn Thành tañ pok pơhai čuk pơkra](https://vov4-media.solidtech.vn/sites/default/files/styles/large/public/2024-07/cu_tri_mong_cao_toc_som_trien_khai_8-7.jpg)
Tơlơi pơhing kơ bruă anai, ơi Ngô Thanh Danh, Khua git gai ping gah tơring čar Dak Nông, Khua grup pơ ala mơnuih ƀôn sang dêh čar ƀơi tơring čar Dak Nông brơi thâo, hăng pran jua mă bruă gơgrong ba prong mơ̆ng dua boh tơring čar Dak Nông hăng Bình Phước, lu wơ̆t rơkâo đĭ hăng kơnuk kơna čih pơkra hră pơkă hnong, ƀư̆ pơkra, čih ming glăi lu wơ̆t brơi djơ̆ găl pioh čuk pơkra jơlan rơdêh đuăi hmar mơ̆ng Gia Nghĩa, tơring čar Dak Nông nao truh pơ Chơn Thành tơring čar Bình Phước amra ngă tui mơ̆ng rơnuč thun 2024, laih anun khom brơi ngă giong truh thun 2026, hăng mă yua sit nik amăng thun 2027. Tơring čar hlăk rơkâo đĭ ngă hiư̆m pă, tơdơi kơ anun jơlan rơdêh đuăi hmar mơ̆ng Gia Nghĩa nao pơ Ƀuôn Ma Thuột ăt dưi pok pơhư prong hloh, đah mơ̆ng djru kơ kual Dap Kơdư tañ pơđĭ kyar:
“Mơnuih ruah khua rơkâo čuk pơkra prong ƀiă jơlan 14 mơ̆ng Gia Nghĩa nao truh pơ tơdrông tua 20, jơlan anai lĕ ƀing gơmơi ăt rơkâo laih mơ̆n. Giong čuk pơkra jơlan rơdêh đuăi hmar mơ̆ng Gia Nghĩa-Chơn Thành, ƀing gơmơi rơkâo dơ̆ng tuh pơ alin čuk pơkra jơlan rơdêh đuăi hmar mơ̆ng Gia Nghĩa nao pơ Ƀuôn Ma Thuột, sit mơ̆n amăng rơwang bruă pơ anăp amra ngă tui. Hăng jơlan anai, ta dưi lăi jơlan nao rai hluh gah amăng kual Dap Kơdư dơ̆ng, hnun kah dưi pơđĭ kyar. Ră anai rơdêh nao rai ƀơi tơring čar Dak Nông lu biă mă, rim hrơi pơkă lăng hơmâo 2500 boh rơdêh găn rơgao ƀơi anih mă prăk duh jia apah jơlan rô, tơdah hrơi ngă lơphet pơdơi pơdă lĕ rơdêh rô nao rai lu hloh 2-3 wơ̆t pơkă hăng tơđar”.
Ƀơi mông bưp, mơnuih ruah khua djop tơring čar lăi pơthâo hăng ƀing khua mua pơala mơnuih ƀôn sang dêh čar lu tơlơi aka ƀu găl. Mơnuih ƀôn sang ruah khua tơring glông Phú Thiện, tơring čar Gia Lai lăi pơthâo bruă ngă hră pơar brơi kơ mơnuih ƀôn sang hră yua lŏn dŏ kaih, tơnap tap đơi. Mơnuih ƀôn sang ruah khua, Hoàng Thanh Tùng, ƀơi grup mrô 3, tơring kual Phú Thiện brơi thâo:
“Lu wơ̆t mơnuih ƀôn sang nao ba hră pơar, rơkâo čih pơkra anŏ pơblih đơ đam lŏn hmua, sang dŏ mơ-it kơ sang bruă ngă hră pơar lŏn sang či tơring glông, kiăng man pơdong sang rông čim ačăng črah. Sang bruă ngă hră pơar anai hơmâo ăt mă laih mơ̆n hră pơar djơ̆ hăng tơlơi phiăn pơkă samơ̆ tŭ mă tơlơi lăi glăi lĕ, tơguan khua mua tơring čar lăi glăi. Truh mông anai, hră pơar ba nao rơbêh 5 blan laih, aka ƀu ƀuh lăi glăi ôh. Yua hơgĕt ƀu gưt pơblih brơi kơ mơnuih ƀôn sang tui hăng tơlơi phiăn pơkă, dŏ tơguan nao tơlơi lăi glăi sui tui anun ? Dưi mơ̆n hă, pơblih tơlơi dưi ngă brơi hră yua lŏn kơ sang bruă ngă hră ƀơi tơring glông dơ̆ng pô wai lăng jĕ giăm hăng ană plơi pla hloh”.
![Ơi Ngô Thanh Danh, Khua grup pơ ala mơnuih ƀôn sang dêh čar ƀơi tơring čar Dak Nông](https://vov4-media.solidtech.vn/sites/default/files/styles/large/public/2024-07/ngo_thanh_danh_8-7.jpg)
Mơnuih ƀôn sang plơi prong Bảo Lộc, tơring čar Lâm Đồng ăt lăi pơthâo, bruă pơkă hnong anih mă kông ngăn amăng lŏn tơnah dŏ bơrơkua nao rai hăng hnong pơkă pơkŏn dơ̆ng mơ̆ng gơnong dlông adih hăng ƀơi tơring čar. Tơlơi anai yơh, ngă kơ lu tơlơi dŏ gun amăng tơlơi phiăn pơkă, ngă tơnap kơđông hĭ lơ̆m pok pơhai ngă tui lu ring bruă phun ƀơi tơring čar. Yă Phạm Thị Hường, dŏ ƀơi phường Lộc Tiến, plơi prong Bảo Lộc brơi thâo, abih bang 2 hektar lŏn đang mơ̆ng sang anŏ gơñu đôm amăng anih arăng pơkă hnong, anun yơh hră lŏn gơñu aka ƀu dưi nao mơ-it pioh ngă anŏ pơhlôm či čan prăk mơ̆ng sang bruă prăk kơnuk kơna, kiăng hơmâo prăk tuh pơ alin mă bruă, pơkra ming, sĭ mơdrô, pơkra glăi sang ƀudah kah pơpha brơi kơ ană bă trun sang pha, hăng djop bruă mă pơkŏn lêng kơ đôm glăi abih. Tơlơi hơdip mơda sang anŏ hlăk bưp tơlơi tơnap tap gun gan hĭ:
“Hăng sang anŏ gơmơi ƀuh dŏ lu tơlơi gun gan biă mă. Kâo dŏ pơ anai hơdôm hơpluh thun hăng anai laih, ră anai rơkâo pơblih yua lŏn kiăng pơdong sang ƀu dưi lơi, kiăng pơdong brơi sang kơ ană bă tơnap đơi, anun yơh tơlơi bơwih ƀong huă ăt ƀu hơmâo tơlơi pơđĭ kyar ôh. Sang anŏ gơmơi hrup hăng lu sang anŏ mơnuih ƀôn sang amăng tơring mơ̆n, rơkâo kơnuk kơna pơkă hnong kơ bruă ĕp kông ngăn amăng gŭ lŏn pơ anai tañ, tơdah dưi ngă brơi hră anun lĕ, ngă brơi kơ ană plơi pla, tơdah ƀu dưi hă ăt pơsir brơi mơ̆n kơ gơmơi hơmâo hơdră pơkŏn, dŏ lui na nao djơh hăng anai rung răng pran jua biă mă”.
Čih pioh tơlơi pơgôp hiăp mơ̆ng ană plơi pla, mơnuih ruah khua grup khua mua pơ ala mơnuih ƀôn sang dêh čar hơmâo rơkâo khua mua djop gơnong bruă, anom bruă hăng gong gai kơnuk kơna pô hlơi hơmâo tơlơi dưi pơsir khom lăi glăi mơtam hơdôm tơlơi mơnuih ƀôn sang tơña anun. Hăng hơdôm tơlơi pơprong hloh pơdjơ̆ nao tơlơi dưi mơ̆ng ding jum anom bruă gah gơnong dlông adih lĕ, ƀing pơala mơnuih ƀôn sang dêh čar ăt čih pơƀut glăi pioh mơ-it kơ djop anom bruă hơmâo tơlơi dưi pơsir.
Viết bình luận